“Nalitemwa Ing’anda yesu iya Bufumu!” e fyalandile Nicole, nkashi uuli ne myaka 17 uwa ku Colombia. “E cifulo apo ningaba no lupwa lwandi ulwa ku mupashi.” Bushe naimwe e fyo mumfwa?

 Mwi sonde lyonse Inte sha kwa Yehova balalongana mu Mayanda ya Bufumu nalimo ukufika fye na kuli 63,000. Ifi fikuulwa filalenga tulepepa Lesa bwino. Kwaliba ubusuma na bumbi ubwaba muli ifi fikuulwa. Ba David, ba painiya wa nshita yonse abekala ku Colombia balandile ukuti: “Ing’anda yesu iya Bufumu ilalenga abantu balefwaisha ukusambilila icine. Abantu abengi abesa mu kulongana pa muku wa kubalilapo balapapa ukumona ifyo tusunga bwino ici cikuulwa.” Ifi taficitika fye mukukana ishiba. Lelo tulabombesha ukuwamya e lyo no kusunga bwino Ing’anda yesu iya Bufumu. Bushe tukumanisha shani ukubomba uyu mulimo?

 Ifilonganino ifibomfya Ing’anda ya Bufumu e fyakwata no mulimo wa kuisakamana. Pa kuti baleisakamana bwino, ba munyinefwe na bankashi balawamya Amayanda yabo aya Bufumu lyonse. Balasunga bwino ifi fikuulwa kabili balawamya ne fintu ifinono ifileonaika.

 Pa kwafwilisha ifilonganino ukulasunga bwino Amayanda ya Bufumu, Dipartimenti ya Local Design/Construction (LDC) ilasonta bamunyinefwe abakusambilisha ababwananyina ifya kusunga bwino Amayanda yabo aya Bufumu. Munyinefwe umo uubomba uyu mulimo, asakamana Amayanda ya Bufumu ukutendekela pali 6 ukufika kuli 10. Alatandalila bakasabankanya mu filonganino no kubasambilisha ifya kusakamana bwino Ing’anda yabo iya Bufumu. Lyonse pa numa ya myaka itatu alabebeta Ing’anda ya Bufumu imo na imo no kumona amafya ayo balingile ukubombelapo.

 Bamunyinefwe na bankashi balatasha sana pa fyo uyu umubomfi wa ba LDC Abasambilisha ifya kusakamana bwino Amayanda yabo aya Bufumu. Ba nkashi Indhumathi, abekala ku India, balandile ukuti: “Ifyo batusambilishe fyaliweme. Twalitemenwe sana ukusambilila ifya kusunga bwino Ing’anda yesu iya Bufumu.” Munyina Evans uwa ku Kenya, alandile ukuti: “Twasambilile ukuti pa kuti twilabomfya sana indalama ishingi tulingile ukulawamya bwangu amafya ayanono ilyo ya shilasanguka amafya ayakalamba.”

 Indalama ishibomba mu mwaka pa kusakamana e lyo no kusunga bwino Ing’anda ya Bufumu, a limo kuti shacepako e lyo limo shafula sana ukulingana no kubelele Ing’anda ya Bufumu, imyaka ipitilepo ukufuma apo baikuulile, e lyo no bwingi bwa filonganino ifibomfya iyo Ing’anda ya Bufumu. Bushe tulipila shani fyonse ifilekabila ukulipila?

 Imisangulo eibomba ukusakamana Ing’anda ya Bufumu. Munyinefwe Alexander, uwikala ku Kazakhstan, alondolwele ukuti: “Imisangulo imo ibomba kuli Intarneti e lyo ne fintu fimbi ifibomfiwa pa Ng’anda ya Bufumu pamo nga amenshi na malaiti. E lyo imisangulo imbi ibomba ku fintu ifyo tubomfya sana pamo nga amagilavusi, ifya kubomfya pa kuwamya e lyo na penti.” Imisangulo imbi ibomfiwa ku kwafwilisha imilimo iikalamba kabili iikabila indalama ishingi iibombwa mwi sonde lyonse.

 Nga kuli imilimo iilingile ukubombwa pa Ng’anda ya Bufumu iilekabila indalama ishicilile pa sho bamunyinefwe babomfya ukusakamana ing’anda ya Bufumu mu myeshi ibili nelyo itatu, baeluda balingile ukweba umubomfi wa ba LDC uusambilisha ifya kusunga no kuwamya ifileonaika pa Mayanda ya Bufumu. Nga ca kuti ba LDC basuminishako ukuti uyo mulimo ubombwe, e balipila indalama ishilekabilwa ukubomba kabili shifuma pa misangulo tusangula ishibomba ku mulimo wa mwi sonde lyonse. Mu mwaka wa mulimo uwa 2023, ifikuulwa 8,793 e fyo bawemye, kabili indalama shabombele shafikile ku madola ya ku America 76.6 milioni. Katulandeko pa fikuulwa fibili.

 Ing’anda ya Bufumu iyaikele imyaka 15 ku Angola, yalikwete ifyaonaike ifingi. Ifya malaiti fyonse fyalyonaike, ifibumba fyalikwete imilale, kabili abena mupalamano baleilishanya ukuti amenshi ayalefuma pa Ng’anda ya Bufumu yaleya pa mayanda yabo. Ba LDC balipekenye ukubombela pa fyaonaike. Indalama ishabombele pa kuwamya shali amadola ya ku America 9,285. Abena mupalamano balitashishe sana kabili balitemenwe ne fyo umulimo wabombelwe.

 Ing’anda ya Bufumu imo Ku Poland, ameshi yaleingila pa mutenge, karpeti yalyonaike sana ica kuti teti baiwamye. Ba LDC balisuminishe umulimo wa kuwamya umutenge e lyo no kubikamo karpeti imbi mu Ng’anda ya Bufumu. Indalama ishabombele pali uyu mulimo shali amadola ya ku America 9,757. Ici cikalenga pakapite imyaka iingi pa kuti bakabombelepo pa fintu ifikalamba pali iyi Ng’anda ya Bufumu na kabili.

 Umulimo wa kuwamya taulenga fye imisangulo ukulabomfiwa bwino lelo ulalenga ne shina lya kwa Yehova ukulumbanishiwa. Munyinefwe Shaun, uwa ku Tonga, alandile ukuti: “Uyu mulimo tubomba uwa kuwamya, ulalenga tulepepa Yehova mu Ng’anda ya Bufumu iya busaka, ukwabula icimfulumfulu kabili ici cilenga abantu ukulatontonkanya ifisuma pe shina lyakwe. Tulatemwa ukwitako abantu ku Ng’anda yesu iya Bufumu pantu tatumfwa insoni.”

 Ifwe bonse kuti twabombako umulimo wa kuwamya no kusunga bwino ififulo fyesu ifya kupepelapo. Munyinefwe Marino, uusambilisha ifya kuwamya no kusunga bwino Amayanda ya Bufumu ku Australia, alandile ukuti: “Ifwe bonse kuti twabombako uyu mulimo uusuma nga nshi uwa kusakamana Amayanda yesu aya Bufumu. Nga twacita ifi, ninshi tulesungilila imisangulo pa kuti bengaibomfya kuli fimbi ifilekabila sana ukubombelwapo.”

 Munyinefwe Joel, uwa ku India, alaba sana ne nsansa ilyo alebombako umulimo wa kusunga bwino Ing’anda ya Bufumu. Alandile ukuti: “Ukubomba na ba bwananyina kulalenga ndetontonkanya sana pa fyo cikaba mu calo cipya.” Ba Nicole, abo tulandilepo kale balandile ukuti: “Nalibombeleko ukukolopa panshi ilyo bamunyinefwe balewamya apalesuuma amenshi umwakusambila. Nangu ca kuti nshawemye ifyaonaike, nalyafwilisheko ukucingilila amasanso.”

 Nga kuti mwatemwa ukubombako umulimo wa kuwamya Ing’anda yenu iya Bufumu, mukalande na ba eluda mu cilonganino cenu. Na kabili, imisangulo intu musangula tayafwilisha fye ukuwamya Ing’anda yenu iya Bufumu lelo ilafwilisha ukuwamya Amayanda ya Bufumu mwi sonde fye lyonse. Kuti mwasangwilako ukubomfya utubokoshi twa musangulo utwaba mu Nga’anda yenu iya Bufumu nelyo ukubomfya webusaiti yesu apatila donate.dan124.com. Tulatasha nga nshi pali bukapekape bwenu.