Yeremia 37:1-21
37 Kabili imfumu Sidekia+ mwana Yoshia+ atendeke ukuteka ukupyana pali Konia+ mwana Yehoyakimu,+ uo Nebukadresari imfumu ya ku Babiloni yabikilepo ukuba imfumu mu calo ca kwa Yuda.+
2 Lelo ena na babomfi bakwe na bantu ba mu calo tabaumfwile ku mashiwi ya kwa Yehova+ ayo alandiile muli Yeremia kasesema.+
3 Ne Mfumu Sidekia yatumine Yeukali+ mwana Shelemia na Sefania+ mwana Maaseya+ shimapepo kuli Yeremia kasesema, aiti: “Tupepeleko kuli Yehova Lesa wesu.”+
4 Kabili Yeremia aile mu bantu no kubwelako,+ pantu ninshi tabalamubika mu cifungo.
5 E lyo kwaishile ibumba lya bashilika ba kwa Farao ilyafumine ku Egupti;+ na bena Kaldi abaleshinga Yerusalemu baumfwile ulwa bashilika. E ico balifumineko no kuleka ukulwisha Yerusalemu.+
6 E lyo icebo ca kwa Yehova caishile kuli Yeremia, no kutila:
7 “Yehova, Lesa wa kwa Israele, atila, ‘E fyo musose ku mfumu ya kwa Yuda, iimutumine ku kunjipusha,+ amuti: “Mona! Ibumba lya bashilika ba kwa Farao ilileisa kuli imwe ku kumwafwa likabwelela ku calo ca liko, ku Egupti.+
8 Na bena Kaldi bakabwela no kulwisha uno musumba, bakaupoka no kuoca ku mulilo.”+
9 Yehova atila: “Mwi-ibepa,+ amuti, ‘Abena Kaldi bakaya no kuleka ukutulwisha,’ pantu tabakaye iyo.
10 Pantu nangu mwalyumine ibumba lyonse ilya bashilika ilya bena Kaldi abalemulwisha,+ kabili pali bena pashala fye abaume abo balasa ifumo,+ kuti baima cila muntu mwi tenti lyakwe no koca uno musumba ku mulilo.”’”
11 Nomba ilyo ibumba lya bashilika ilya bena Kaldi lyaile no kuleka ukulwisha Yerusalemu+ pa mulandu we bumba lya bashilika ilya kwa Farao,+
12 e lyo Yeremia aimine ukufuma ku Yerusalemu no kuya ku calo ca kwa Benjamini+ no kupoka impanga yakwe mu kati ka bantu bakwe.
13 Nomba ilyo ali ku Mpongolo ya kwa Benjamini,+ kwali umukalamba wa balinshi, ishina lyakwe Iria mwana Shelemia mwana Hanania. Apo pene aikete Yeremia, ati: “Ulewila ku bena Kaldi!”
14 Lelo Yeremia atile: “Bufi!+ Nshilewila ku bena Kaldi.” Lelo taumfwile kuli ena. E ico Iria aikete Yeremia no kumutwala kuli bacilolo.
15 Na bacilolo+ bafuliilwe Yeremia,+ no kumuuma,+ bamubika na mu cifungo,+ mu ng’anda ya kwa Yehonatani+ kalemba, pantu e yo basangwile icifungo.+
16 Ilyo Yeremia aingile mu cifungo ca pa nshi*+ na mu miputule ya pa nshi, aikele mulya inshiku ishingi.
17 Ne Mfumu Sidekia yatumine bamo ku kuyamuleta, kabili imfumu yatendeke ukumwipusha amepusho, mu ng’anda ya iko, ukwafisama.+ Kabili yatile: “Bushe kuli icebo icifumine kuli Yehova?” Na o Yeremia atile: “E ko cili!” Kabili atile: “Ukapeelwa mu minwe ya mfumu ya ku Babiloni!”+
18 E lyo Yeremia atile ku Mfumu Sidekia: “Bushe nabembuka shani kuli iwe na babomfi bobe na bantu aba,+ pa kuti mumbike mu cifungo?
19 Bali kwi nomba bakasesema benu abaseseme kuli imwe abati, ‘Imfumu ya ku Babiloni tayakese mu kulwisha imwe na cino calo’?+
20 E ico umfwa, we shikulu imfumu. Umfwa ukupapaata kwandi,+ kabili wimbwesesha ku ng’anda ya kwa Yehonatani+ kalemba, epali nafwila kulya.”+
21 Ne Mfumu Sidekia yaebele bamo, na bo babikile Yeremia mu Lubansa lwa Balinshi;+ kabili balemupeela umukate cila bushiku ukufuma ku musebo wa bapanga umukate,+ mpaka ilyo umukate onse wapwile mu musumba.+ Awe Yeremia aleikala mu Lubansa lwa Balinshi.+
Amafutunoti
^ Mu ciHebere apa paba ati, “ing’anda umwali ne cishima.”
