Ibuuku lya Kubalilapo Ilya kwa Samwele 22:1-23
22 E ico Davidi afumine kulya+ aya ku lucengo lwa Adulamu.+ Ilyo bamunyina na ba mu ng’anda ya kwa wishi bonse baumfwile, balimukonkele uko kwine.
2 Kabili abaume bonse abali na mafya, abali ne nkongole na bonse abali ne fya kuilishanya bailelongana kuli ena. Abailelongana kuli Davidi bali nalimo 400 kabili aishileba intungulushi yabo.
3 Pa numa Davidi afumine kulya aya ku Mispe mu Moabu kabili alombele imfumu ya Moabu+ ati: “Shi lekeni batata na bamayo bekale na imwe mpaka nkeshibe ifyo Lesa akancitila.”
4 E ico abashile ne mfumu ya Moabu, kabili baikele nayo inshiku shonse isho Davidi aikele uko afiseme.+
5 Mu kupita kwa nshita, kasesema Gadi+ aebele Davidi ati: “Witwalilila ukwikala uko wafisama. Kabiye ku calo ca Yuda.”+ E ico Davidi alifumineko, kabili aileingila mu mutengo wa Herete.
6 Shauli alyumfwile ukuti Davidi na baume abo ali nabo balibasangile. Shauli aumfwile ifi ninshi naikala mu Gibea+ mwi samba lya cimuti ca mutamariski apasansama. Alikete ifumo ninshi ababomfi bakwe bonse nabamushinguluka.
7 Lyena Shauli aebele ababomfi bakwe abamushingulwike ati: “Shi umfweni mwe bena Benjamini. Bushe umwana wa kwa Yese+ na o akamupeela bonse impanga na mabala ya myangashi? Bushe akasonta imwe bonse ukuba bacilolo ba mabumba ya bantu 1,000 na bacilolo ba mabumba ya bantu 100?+
8 Bonse mwalyumfwana pa kuti mumpondokele! Tapali uwanjebele ukuti umwana wandi alipangana icipangano no mwana wa kwa Yese!+ Pali imwe tapali nangu umo uunangulukilako, kabili tapaba uwanjebako ukuti umwana wandi uwa kuifyalila alitunka umubomfi wandi pa kuti alembelamina nge fi fine cili lelo.”
9 Lyena Doege+ umwina Edomu, uwali umukalamba wa babomfi ba kwa Shauli amwebele ati:+ “Nalimwene umwana wa kwa Yese afika ku Nobu kuli Ahimeleke umwana wa kwa Ahitubu.+
10 Kabili alimwipushisheko na kuli Yehova pa fyo alingile ukucita, amupeela ne fya kulya. Alimupeele no lupanga lwa kwa Galyati umuPelishiti.”+
11 Ilyo line fye imfumu yatumine aba kuyaita Ahimeleke umwana wa kwa Ahitubu shimapepo e lyo na bashimapepo bonse aba mu ng’anda ya kwa wishi abaleikala ku Nobu. E ico bonse balishile ku mfumu.
12 Nomba Shauli alandile ati: “Umfwa iwe mwana Ahitubu!” na o atile: “Mukwai ndeumfwa mwe shikulu.”
13 Shauli amwipwishe ati: “Cinshi calenga iwe no mwana wa kwa Yese mumpondokele? Cinshi wapeelele umwana wa kwa Yese ifya kulya no lupanga, kabili cinshi wamwipushishisheko kuli Lesa? Alandwisha kabili alambelamina nge fi fine cili na lelo.”
14 Ahimeleke ayaswike imfumu ati: “Nani pa babomfi benu uwaba ne cishinka kuli imwe nga Davidi?+ Aupa umwana wenu mwe mfumu,+ mukalamba wa balinshi benu kabili alicindikwa mu ng’anda yenu.+
15 Bushe lelo e muku wa kubalilapo naipushishako Davidi kuli Lesa?+ Te kuti mpondokele imwe iyo! Mwe mfumu mwipeela ne mubomfi wenu na bonse aba mu ng’anda ya kwa tata umulandu, pantu ne mubomfi wenu nshaishibe nangu cimo pali ifi mwalanda.”+
16 Lelo imfumu yamwebele aiti: “Nangu cibe shani Ahimeleke na bonse aba mu ng’anda ya kwa wiso+ mwalafwa.”+
17 E lyo imfumu yaebele abaleilonda abaishingulwike aiti: “Pilibukeni mwipaye bashimapepo ba kwa Yehova, pantu bali ku lubali lwa kwa Davidi! Balishibe ukuti alifyukile lelo tabanjebele!” Lelo ababomfi ba mfumu tabalefwaya ukwipaya bashimapepo ba kwa Yehova.
18 Lyena imfumu yaebele Doege+ aiti: “Pilibuka wipaye bashimapepo!” Ilyo line fye Doege umwina Edomu+ alipilibwike aipaya na bashimapepo. Pali bulya bushiku aipeye bashimapepo*+ 85.
19 Alipeye na ba mu musumba wa bashimapepo uwa Nobu+ ku lupanga; aipeye abaume, abanakashi, abana kumo no tunya, ing’ombe, impunda ne mpaanga ku lupanga.
20 Lelo Abiatari,+ umo pa bana ba kwa Ahimeleke umwana wa kwa Ahitubu alipuswike, kabili abutukile kuli Davidi.
21 Abiatari aebele Davidi ati: “Shauli naipaya bashimapepo ba kwa Yehova.”
22 E lyo Davidi aebele Abiatari ati: “Nalishibe bulya bwine bushiku+ ilyo Doege umwina Edomu ali kulya ukuti nangu cibe shani ali no kuyaeba Shauli. Nine nalenga ukuti aba mu ng’anda ya kwa wiso bonse bafwe.*
23 Ikala na ine. Wisakamana, pantu onse uukafwaya ukukwipaya* ninshi alefwaya ukwipaya ine;* nakulakucingilila.”+
Amafutunoti
^ Mu ciHebere, “abaume abafwele efode ya nsalu.”
^ Nelyo “imyeo yonse ifwe.”
^ Nelyo “ukwipaya umweo obe.”
^ Nelyo “ukwipaya umweo wandi.”
