Abapingushi 16:1-31
16 Bushiku bumo Samsone aile ku Gasa uko ailemona cilende kabili aile ku mwakwe.
2 Lyena kwali abashimikile abena Gasa abati: “Samsone naisa kuno.” E ico balishingulwike incende iyo alipo kabili balimubelamine ubushiku bonse pa mpongolo ya musumba. Baikele fye tondolo ubushiku bonse, baleti: “Nga bwaca fye, tulemwipaya.”
3 Lelo Samsone aleele fye ukufika ubushiku pa kati. Lyena pa kati ka bushiku alibuukile kabili aileikata ifiibi fya pa mpongolo ya musumba kumo ne nceshi shibili isha mpongolo e lyo afishimpula kumo no mupindo. Afibikile pa mabeya e lyo anina na fyo pa muulu wa lupili ulwalungatana na Hebrone.
4 Pa numa atemenwe umwanakashi wa ku Mupokapoka wa Soreke, ishina lyakwe ali ni Delila.+
5 E ico bakateka ba baPelishiti baile ku mwanakashi no kumweba abati: “Umusembeleke+ kabili umwipushe icilenga alekwata amaka ya musango yu, kabili umwipushe ifyo twingacita pa kuti tukamucimfye, tukamukake kabili tukamunashe. Nga wacita ifi, tukakupeela indalama sha silfere 1,100 cila muntu.”
6 Pa numa Delila aebele Samsone ati: “Shi njebeni, uko amaka yenu ayafula ifi yafuma e lyo ne fyo bengabomfya pa kumukaka pa kuti bamunashe.”
7 Samsone amwebele ati: “Nga bankaka ne nshinga* ishipya 7 ishibishi, kuti nanaka no kuba fye nge fyaba abaume bonse.”
8 E ico bakateka ba baPelishiti baleteele Delila inshinga ishipya 7 ishibishi, kabili alimukakile.
9 Nomba abaume balimubelamine mu muputule wa mu kati kabili umwanakashi amupundiile ati: “Samsone, wafwa abaPelishiti abo baisa!” Ilyo line aputwile inshinga, nga filya ubushishi bwa kolokondwe buputuka nga bwakumya ku mulilo.+ Kabili tabaishibe ukwalefuma amaka yakwe.
10 Lyena Delila aebele Samsone ati: “Moneni! Mwambepa. Nomba shi njebeni ico bengabomfya pa kumukaka.”
11 E ico amwebele ati: “Nga bankaka ne myando iipya iyo bashatala ababomfyapo kuti nanaka no kuba fye nge fyo abaume bonse baba.”
12 E ico Delila abuulile imyando iipya amukaka e lyo amupundila ati: “Samsone, wafwa abaPelishiti abo baisa!” (Ili lyonse ninshi abamubelamine bekele mu muputule wa mu kati.) Ilyo line aputwile imyando ku maboko yakwe kwati aleputula ubushishi.+
13 Lyena Delila aebele Samsone ati: “Mucili mulembepa fye.+ Njebeni ico bengabomfya pa kumukaka.” Na o amwebele ati: “Nga wanduka ifikuti 7 no bushishi bwa kupikwilako amaka kuti yapwa.”
14 E ico akakiile ifikuti ku ca kupikwilako, e lyo amupundila ati: “Samsone, wafwa abaPelishiti abo baisa!” E ico alishibwike kabili afumishe ica kupikwilako no bushishi bwa kupikwilako mu mushishi.
15 Lelo umwanakashi amwebele ati: “Kuti mwanjeba shani amuti, ‘Nalikutemwa,’+ e lyo ninshi umutima wenu tawaba na kuli ine? Nomba yaba imiku itatu mumbepa fye kabili tamwanjeba uko amaka yenu ayafula ifi yafuma.”+
16 Apo cila bushiku alemupatikisha kabili alemupamfya, asukile anenuka.*+
17 E ico amwebele ati: “Nshatalabeyapo umushishi, pantu ndi muNasiri wa kwa Lesa ukutula fye ilyo nafyelwe.*+ Nga bambeya umushishi, amaka yandi kuti yapwa, kabili kuti nanaka naba fye nge fyo abaume bonse baba.”
18 Ilyo Delila amwene ukuti alimwebele fyonse, ilyo line fye aitile bakateka ba baPelishiti+ kabili abebele ati: “Uno muku iseni, pantu nanjeba fyonse.” E ico bakateka ba baPelishiti baile kuli ena ninshi nabasenda ne ndalama.
19 Delila alengele Samsone alaala utulo pa molu yakwe; lyena aitile umwaume umo kabili amubeyele ifikuti 7. Pa numa Delila alikwete amaka pali Samsone, pantu amaka yakwe yaile yalepwa.
20 Nomba umwanakashi amupundiile ati: “Samsone, wafwa abaPelishiti abo baisa!” Alishibwike mu tulo kabili atile: “Nalafuma nga filya ncita lyonse+ kabili nalaipususha.” Lelo taishibe ukuti Yehova alimushile.
21 E ico abaPelishiti balimwikete bamutonkola na menso. Lyena bamutwele ku Gasa kabili bamukakile na maceni ya mukuba; kabili alebomba umulimo wa kupela ingano mu cifungo.
22 Lelo umushishi wakwe walitendeke ukumena na kabili pa numa ya ku mubeya.+
23 Bakateka ba baPelishiti balongene pamo pa kuti batuulile lesa wabo Dagone+ ilambo ilikalamba na pa kuti basefye, pantu baleti: “Lesa wesu napeela Samsone umulwani wesu mu minwe yesu!”
24 Ilyo abantu bamumwene balilumbenye lesa wabo, kabili baleti: “Lesa wesu napeela umulwani wesu mu minwe yesu, uwaonawile icalo cesu+ no kwipaya abantu besu abengi.”+
25 Apo balesekelela, balandile abati: “Iteni Samsone ese atusansamusheko.” E ico bafumishe Samsone mu cifungo pa kuti abasansamushe, kabili bamwimike pa kati ka nceshi shibili.
26 Lyena Samsone aebele akalumendo akamwikete pa kuboko ati: “Leka njikate ku nceshi ishaikasha cino cikuulwa pa kuti nshintilileko.”
27 (Nomba mu cikuulwa mwaiswile abaume na banakashi. Bakateka bonse aba baPelishiti nabo e mo bali, kabili pa mutenge pali abaume na banakashi nalimo 3,000 abaletamba ilyo Samsone alebasekesha.)
28 Samsone+ nomba alilile kuli Yehova ati: “Shikulu Mulopwe Yehova, napaapaata njibukisheni mwe Lesa kabili nkosheni+ pa muku wa kulekeleshako, kabili lekeni njilandwile pa baPelishiti pa linso lyandi limo fye.”+
29 Lyena Samsone aiminine pa kati ka nceshi shibili ishaikeshe icikuulwa, kabili aikete ukuboko kwa ku kulyo ku luceshi lumo e lyo ukuboko kwa ku kuso aikete ku luceshi lumbi.
30 Samsone apundile ati: “Lekeni mfwile* pamo na baPelishiti!” Lyena asunkile inceshi na maka yakwe yonse, kabili icikuulwa cabongolokeele bakateka na bantu bonse abalimo.+ E ico abo aipeye pa bushiku afwile, balifulile ukucila abo aipeye ilyo ali uwa mweo.+
31 Pa numa bamunyina na balupwa lwa kwa wishi bonse baile mu kumusenda. Balimuletele no kumushiika mu nshiishi ya kwa Manoa+ wishi pa kati ka Sora+ na Eshtaole. Ali kapingula wa bena Israele pa myaka 20.+
Amafutunoti
^ Nelyo “imishipa ya nama.”
^ Nelyo “wasukile umweo wakwe wanenuka.”
^ Mu ciHebere, “ukutula fye ilyo nafumine mwi fumo lya kwa mayo.”
^ Nelyo “umweo wandi ufwile.”
