Abapingushi 2:1-23
2 Lyena malaika wa kwa Yehova+ afumine ku Gilgali+ aya ku Bokimu kabili aebele abena Israele ati: “Namufumishe mu Egupti no kumuleta mu calo ico nalapile ukuti nkapeela ifikolwe fyenu.+ Na kabili namwebele nati, ‘Nkatwalilila ukusunga icipangano ico napangana na imwe.+
2 Na imwe tamulingile ukupangana icipangano na bekala muli cino calo+ kabili mufwile ukubongolola ifiipailo fyabo.’+ Lelo tamwakonka ifyo namwebele.+ Cinshi mwacitila ifi?
3 E co namwebeele no kuti, ‘Nshakamutamfisheko aba bantu,+ kabili bakaba nge citeyo kuli imwe,+ kabili bakamubeleleka ica kuti mukalapepa balesa babo.’”+
4 Ilyo malaika wa kwa Yehova aebele abena Israele bonse aya mashiwi, batendeke ukulila imisowa.
5 E ico bainike ilya ncende ati Bokimu,* kabili palya pene e po batuuliile Yehova amalambo.
6 Ilyo Yoshua aebele abantu ukuti baleya, abena Israele baile cila muntu ku mpanga iyo bamwakenye pa kuti ayeipoka.+
7 Abantu balitwalilile ukubombela Yehova mu nshiku shonse isho Yoshua ali no mweo, na mu nshiku shonse isha bakalamba abashele aba mweo ilyo Yoshua afwile kabili abamwene ifipesha amano fyonse ifyo Yehova acitiile abena Israele.+
8 Lyena Yoshua umwana wa kwa Nuni, umubomfi wa kwa Yehova, alifwile ninshi ali ne myaka 110.+
9 E ico bamushiikile mu mpanga yakwe mu Timnati-herese+ mu citungu ca mpili ica kwa Efraimu, ku kapinda ka ku kuso aka Lupili lwa Gaashi.+
10 Bonse aba muli ilya nkulo bafwile nge fyafwile ifikolwe fyabo, kabili pakonkele inkulo imbi iishaishibe Yehova ne fyo acitiile abena Israele.
11 E ico abena Israele balecita ifyabipa mu menso ya kwa Yehova kabili balebombela* ba Baali.+
12 E ico balipondokele Yehova, Lesa wa bashibo uwabafumishe mu calo ca Egupti.+ Balebombela balesa bambi abo abantu ababashingulwike balepepa,+ kabili balebakontamina, ica kuti balekalifya Yehova.+
13 Bashile Yehova kabili balebombela Baali ne fimpashanya fya kwa Astarte.+
14 E ico ubukali bwa kwa Yehova ububilima ngo mulilo bwaishile pa bena Israele, kabili abapeele mu minwe ya balwani babo abalebasansa no kubapoka ifintu.+ Abapeele* mu minwe ya balwani babo ababashingulwike,+ kabili tabakwete amaka ya kucimfya abalwani babo.+
15 Lyonse nga baya mu kulwa inkondo, ukuboko kwa kwa Yehova kwalebalwisha ica kuti balecula,+ nga filya fine Yehova alandile kabili nga filya fine Yehova alapile kuli bena,+ kabili balecula nga nshi.+
16 E ico Yehova alebasalila bakapingula, kabili balebapususha ku balebapoka ifintu.+
17 Lelo na bakapingula bene tabalebomfwila, balepepa* balesa bambi no kubakontamina. Balifumine bwangu mu nshila iyo ifikolwe fyabo fyaendelemo, ifyalekonka amafunde ya kwa Yehova.+ Tabaali nge fikolwe fyabo ifyalekonka amafunde.
18 Lyonse Yehova nga abasalila kapingula,+ Yehova aleba no yo kapingula, kabili alebapususha ku balwani babo inshiku shonse isho uyo kapingula aleba no mweo; pantu Yehova alebomfwila uluse*+ pa fyo baleteta pa mulandu wa kuti kwaleba abalebatitikisha+ no kubacusha.
19 Lelo kapingula nga afwa, balecita ifyabipa na kabili ukucila ifyalecita bashibo pantu balebombela balesa bambi no kubapepa.+ Tabalekele ukucita ifyabipa, batwalilile fye ukuba bacintomfwa.
20 Ubukali bwa kwa Yehova ububilima ngo mulilo bwasukile bwaisa pa bena Israele+ kabili atile: “Apo aba muli ulu luko tabasungile icipangano+ ico napangene ne fikolwe fyabo kabili tabang’umfwila,+
21 na ine nshakabatamfisheko uluko nangu lumo pa nko isho Yoshua ashacimfishe ilyo ashilafwa.+
22 Pa kuti nkamone nga ca kuti abena Israele bakakonka inshila ya kwa Yehova+ nge fyo bashibo bakonkele.”
23 E ico Yehova alilekele ishi inko shatwalilila ukwikala mu calo. Tashitamfishemo bwangu, kabili tashipeele mu minwe ya kwa Yoshua.
Amafutunoti
^ Ilyalola mu kuti “Abalila.”
^ Nelyo “balepepa.”
^ Mu ciHebere, “abashitishe.”
^ Mu ciHebere, “balecita bucilende na.”
^ Nelyo “alebalangulukilako.”
