Abapingushi 21:1-25
-
Bapususha umukowa wa kwa Benjamini (1-25)
21 Nomba abaume ba mu Israele balapile uyu mulapo mu Mispa:+ “Takuli nangu umo pali ifwe uukofya umwana wakwe umwanakashi ku bena Benjamini.”+
2 E ico abena Israele baishile ku Betele+ kabili baikele pa cinso ca kwa Lesa wa cine ukufika icungulo, balelila no kuloosha nga nshi.
3 Kabili baleti: “Mwe Yehova Lesa wa kwa Israele, cinshi icintu ca musango uyu cicitikiile mu Israele? Cinshi mu Israele mushibelele umukowa umo lelo?”
4 Ubushiku bwakonkelepo abantu babuukile lucelocelo, kabili bakuulile iciipailo mu Betele batuulapo ne mituulo ya koca ne mituulo ya mutende.+
5 Lyena abena Israele balandile abati: “Pa mikowa yonse iya bena Israele, nani ashishile mu kulongana pa cinso ca kwa Yehova?” pantu balilapile umulapo uukalamba uwa kuti uushaile kuli Yehova ku Mispa, balingile ukumwipaya.
6 E ico abena Israele bali no bulanda pa fyacitikiile abena Benjamini bamunyinabo. Balandile abati: “Umukowa umo lelo nauputulwa mu Israele.
7 Twalacita shani pa kuti tufwaile abashelepo abanakashi ba kuupa, apo twalilapa kuli Yehova+ ukuti tatwakofye abana besu kuli bena?”+
8 Baipwishe abati: “Pa mikowa ya bena Israele, ni bani abashaishile kuli Yehova pa Mispa?”+ Basangile ukuti pa ba ku Yabeshe-gileadi tapali nangu umo uwaile mu nkambi umo abantu balonganine.
9 Ilyo bapendele abantu, basangile ukuti pa bena Yabeshe-gileadi tapali nangu umo uwaile.
10 E ico ulukuta lwatumine abaume 12,000 aba maka nga nshi. Babebele abati: “Kabiyeni kepayeni abena Yabeshe-gileadi ku lupanga, muyeipaila kumo na banakashi na bana.+
11 Ifi e fyo mufwile ukuyacita: Muyeipaya abaume bonse e lyo na banakashi bonse abalaalapo na baume.”
12 Pa baleikala mu Yabeshe-gileadi basangilepo abakashana banacisungu 400. E ico babaletele mu nkambi pa Shilo+ mu calo ca Kanaani.
13 Lyena ulukuta lonse lwatumine aba kuyalanda na bena Benjamini abali ku cilibwe ca Rimone+ abailebeba ukuti nomba kuti batampa ukumfwana nabo.
14 E ico pali ilya nshita abena Benjamini balibwelele. Lyena babapeele abanakashi ba mu Yabeshe-gileadi abo bashaipeye,+ lelo abo basangile balicepele ica kuti tabakumene abaume abena Benjamini.
15 Kabili abantu bali no bulanda pa fyacitikiile abena Benjamini+ pantu Yehova alibapaatwile ku mikowa ya bena Israele.
16 E ico abakalamba ba lukuta batile: “Twalacita shani pa kuti tufwaile abaume abashele abanakashi ba kuti boope, pantu abanakashi abena Benjamini bonse baliloba?”
17 E lyo batile: “Abena Benjamini abapuswike bafwile batwalilila ukwikala mu mpanga ya bupyani bwabo pa kuti umukowa wabo wiloba mu Israele.
18 Lelo te kuti tuufye abana besu ku baume abena Benjamini, pantu fwe bena Israele twalilapa atuti: ‘Abe uwatiipwa uukofya umwana wakwe ku bena Benjamini.’”+
19 Lyena batile: “Cila mwaka ku Shilo+ kulaba umutebeto wa kwa Yehova. Shilo yabela ku kapinda ka ku kuso aka Betele, kabili ku kabanga ka musebo uukalamba uwafuma ku Betele waya ku Shekemu kabili ku kapinda ka ku kulyo aka Lebona.”
20 E ico baebele abaume abena Benjamini abati: “Kabiyeni kabelameni mu mabala ya myangashi.
21 Kabili nga mwamona abakashana* ba ku Shilo bafuma batampa ukucindila pamo na banabo ninshi baleshinguluka, mukafume mu mabala ya myangashi, kabili cila muntu akasendepo umukashana wa kuupa pa bakashana ba mu Shilo. Lyena mufwile ukubwelela ku mwenu ku Benjamini.
22 Kabili bashibo nelyo bandume yabo nga baisa mu kuilishanya, tukabeba atuti: ‘Tubeleleni uluse pa fyo bacitile, pantu twalifililwe ukubasangila abanakashi ba kuupa ilyo twaile ku nkondo,+ kabili na imwe nga mwali no mulandu amubapeela abanakashi ba kuti boope.’”+
23 E ico abaume abena Benjamini balicitile ifyo babebele, kabili cila muntu alisendelepo umwanakashi wa kuupa pa banakashi abalecinda. Lyena balibwelelemo ku mpanga yabo iya bupyani kabili balikuulile imisumba yabo cipya cipya,+ batendeka no kwikalamo.
24 Kabili pali ilya nshita abena Israele balisalangene pa Shilo, kabili cila muntu abweleele ku mukowa wakwe na ku lupwa lwakwe. Cila muntu abwelele ku mpanga yakwe iya bupyani.
25 Muli shilya nshiku mu Israele tamwali imfumu.+ Cila muntu alecita fye ifyo alefwaya.*
