Yeremia 4:1-31
4 Nga walabwela we Israele, e fyo Yehova alanda,“Nga walabwelela kuli ineKabili nga walafumya ifilubi fyonse ifya bunani pa ntanshi yandi,Tawakaye mu kululumba mu calo cimbi.+
2 Nga walapa auti,‘Na pali Yehova!’ kabili uli uwa cishinka, uwa mulinganya, kabili ulecita ifyalungama,Lyena inko shikapaalilwa muli ena,Kabili shikaitakishisha muli ena.”+
3 Pantu Yehova aeba abaYuda na bekala mu Yerusalemu ati:
“Limeni amabala mu mpanga iyo mwingalimamo,Kabili mwilabyala imbuto mu myunga.+
4 Isembululeni pa kuti mulecita ifyo Yehova afwaya,Sembululeni ne mitima yenu,+Mwe baYuda na mwe bekala mu Yerusalemu,Pa kuti ubukali bwandi bwi-isa pali imwe ngo muliloPa mulandu wa fyabipa ifyo mucita,+Kabili bwibilima ica kutila te kuti kube nangu umo uwa kubushimya.”
5 Bilisheni ici mu Yuda na mu Yerusalemu.
Sansuleni amashiwi yenu pa kubilisha kabili lisheni intandala mu calo conse.+
Bilikisheni amuti: “Longaneni,Kabili natubutukile mu misumba ya malinga ayakosa.+
6 Imyeni icishibilo ica kulangilila inshila ya ku Sione.
Kabiyeni umwa kuuba, mwi-iminina fye ukwabula ukucitapo nangu cimo,”
Pantu ndeleta ubucushi ubukalamba ukufuma ku kapinda ka ku kuso,+ ubonaushi ubukalamba.
7 Afuma mu mutengo+ nge nkalamo;Uonaula inko aisa,+
Afuma mu cifulo umo ekala pa kuti onaule icalo cobe ica kuti abantu nga bacimona bakulapapa.
Imisumba yobe ikaba ifitantaala, takuli umuntu nangu umo uukalaikalamo.+
8 E ico fwaleni insamu,+Loosheni* kabili lileni,Pantu ubukali bwa kwa Yehova ububilima ngo mulilo tabulafuma pali ifwe.
9 Yehova alanda ati, “Muli bulya bushiku, umutima wa mfumu ukatompoka,+No mutima wa ntungulushi na o ukatompoka;Bashimapepo bakatiina, kabili bakasesema bakapeshiwa amano.”+
10 Lyena nalandile nati: “Iye mwe Shikulu Mulopwe Yehova! Namubepa aba bantu+ na bekala mu Yerusalemu, mwalandile ati, ‘Mukekala umutende,’+ e lyo ninshi ulupanga luli pa mikoshi yesu.”*
11 Pali ilya nshita aba bantu na bekala mu Yerusalemu bakabeba abati:
“Umwela uwakaba uulefuma pa tupili twa mu ciswebebe apashaba nangu cimoUkapyanga umwana umwanakashi* uwa bantu bandi;Tauleisa mu kululula imisungu nelyo mu kuwamya ingano.
12 Nkeba umwela uwa maka ukafume kuli ifi ififulo.
Nomba nkabapingula.
13 Moneni! Akesa nga makumbi ya mfula,Kabili amaceleta yakwe yaba ngo mwela uukalamba.+
Bakabalwe bakwe balabutukisha ukucila bakapumpe.+
We bulanda kuli ifwe pantu nabatonaula!
14 Samba umutima obe we Yerusalemu, pa kuti mufume ifyabipa, pantu e lyo walapusuka.+
Ni lilali ukaleka ukutontonkanya pa fyabipa?
15 Ishiwi lilebila imbila mu Dani,+Kabili lilebilisha ubucushi mu mpili sha mu Efraimu.
16 Ebeni inko pali ifi;Bilisheni ifi mu Yerusalemu.”
“Bamalonda* balefuma ku calo ca kutali,Kabili bakasanswila imisumba ya mu Yuda amashiwi yabo.
17 Bamushinguluka nga filya bamalonda bashinguluka ibala ilishacingililwa,+Pa mulandu wa kuti alimpondokela,”+ e fyo Yehova alanda.
18 “Bakakukandila pa mibele yobe na pa fyo ucita.+
Ubucushi ubukesa pali iwe bukalamba,Pantu bucipondoka bobe bwalifika ku mutima obe.”
19 Naumfwa ububi,* naumfwa ububi!
Umutima wandi ulekalipa nga nshi.*
Umutima wandi ulekulunkunta.
Te kuti njikale tondolo,Pantu ning’umfwa* ukulila kwa ntandala,Ning’ufwa icongo ca nkondo.+
20 Abantu nabashimika ukuti ifyabipa filekonkana ukucitika,Pantu icalo conse nabaconaula.
Mu kupumikisha amatenti yandi+ nabayonaula,Nabayonaula mu nshita fye iinono.
21 Ni lilali nkaleka ukumona icishibilo,No kumfwa ukulila kwa ntandala?+
22 Pantu abantu bandi bawelewele;+Tabambikako amano.
Bana abatumpa kabili abashiiluka.
Bacenjela fye mu kucita ifyabipa,*Lelo tabaishiba ukucita ifisuma.
23 Naloleshe icalo, kabili moneni! tamwali nangu cimo kabili baliconawile.+
Naloleshe na mu muulu, lelo tamwali ulubuuto na kabili.+
24 Naloleshe impili, kabili moneni! shaletenta,No tupili twaletenkana.+
25 Naliloleshe, kabili moneni! takwali umuntu nangu umo,Ne fyuni fyonse ifya mu lwelele fyalifulumwike.+
26 Naliloleshe, kabili moneni! ibala lya fimuti ifitwala ifisabo lyasangwike amatololo,Kabili imisumba ya liko yonse bali-ibongolwele.+
Yehova e walengele ifi ficitike,Pa mulandu wa bukali bwakwe ububilima ngo mulilo.
27 Pantu Yehova alanda ati: “Icalo cikonaulwa,+Lelo nshakaconaule conse.
28 E mulandu wine icalo cikaloosesha,+Kabili imyulu ikafiita.+
Pantu ninanda, ninsala ifya kucita,Kabili nshakaalule ifyo mpangile ukucita,* nelyo ukubweshamo umutima.+
29 Pa mulandu wa congo ca banina pali bakabalwe na bapoosa imifwi,Aba mu musumba bonse bafulumuka.+
Baingila mu mitengo,Kabili banina pa fimabwe.+
Imisumba yonse baisha,Kabili tapali nangu umo uleikalamo.”
30 Nomba apo nabasampa ifintu fyobe fyonse, cinshi walacita?
Walefwala ifya kufwala ifyakashika ce,Waleiyemfya ne fibekobeko fya golde,Kabili waleipenta ifyafiita mu menso pa kuti yalemoneka ayakulu.*
Lelo waleicusha fye ifi waleiyemfya,+Pantu abalekukumbwa nabakukaana;Nomba balefwaya ukukwipaya.*+
31 Pantu ning’umfwa ishiwi ilileumfwika kwati lishiwi lya mwanakashi uulwele,Ning’umfwa ubukali nga bulya umwanakashi omfwa pa kupaapa ibeli,Ning’umfwa ishiwi lya mwana mwanakashi Sione uuletusaila.
Natambalika amaboko yakwe kabili alelanda+ ati:
“We bulanda kuli ine, pantu ninaka* pa mulandu wa bepaya!”
Amafutunoti
^ Nelyo “Kunkunsheni pa fifuba.”
^ Nelyo “e lyo ninshi ulupanga nalufika pa myeo yesu.”
^ Amashiwi ya kuti “umwana umwanakashi uwa bantu bandi,” tayalelanda pa muntu iyo. Mashiwi ya mampalanya nalimo ayalelanda pa kumfwila uluse nelyo pa kulangulukilako.
^ Mu ciHebere, “abalinshi.” Aba bali bashilika abalelinda umusumba pa kuti beshibe ilyo bengausansa.
^ Mu ciHebere, “Mu mala mulekalipa.”
^ Mu ciHebere, “Naumfwa ubukali mu fibumba fya mutima wandi.”
^ Nelyo “umweo wandi naumfwa.”
^ Nelyo “Bakwata fye amano ya kucita ifyabipa.”
^ Nelyo “nshakalanguluke.”
^ Nelyo “pa kuti ukushe icinshingwa ca menso yobe.”
^ Nelyo “Nomba balefwaya umweo obe.”
^ Nelyo “umweo wandi naunaka.”
