Pa myaka yonse ilyo kwali icibindo, ba Lennart Johnson na bena mwabo ba Virginia e lyo na ba Roy Brandt na bena mwabo ba Juanita balitwalilile ukubomba bumishonari. Ba Lennart batile: “Ine na ba Roy Brandt balitwitile ku balashi ku kutulubulwisha. Na kuba, ilyo tabalatwita balitile munyinefwe Manuel Hierrezuelo ku kuyabamona.” Ku ca bulanda, uyu munyinefwe balimwipeye ilyo balemulubulwisha, lelo afwile uwa cishinka. Nomba, cali shani kuli ba Lennart na ba Roy? Ba Lennart bakonkenyepo abati: “Ilyo twafikile fye balitwipwishe umo umo, kabili balekopa na fintu twalelanda. Takwali nangu cimo icacitike, lelo ilyo papitile imyeshi ibili, balisabankenye mu manyunshipepala ukuti ubuteko bwa kwa Trujillo bwalifumishepo icibindo ico bwabikile pa Nte sha kwa Yehova no kuti twali no kutampa ukushimikila na kabili.”

Ilyo umwaka wa 1950 ushilafika, mu Dominican Republic mwali bakasabankanya 261 abaleshimikila imbila nsuma. Lelo, ilyo bafumishepo icibindo mu August 1956, bakasabankanya ba mbila nsuma bafikile 522. Aba bwananyina balitemenwe nga nshi ilyo baishibe ukuti nomba bali no kukwata ubuntungwa bwa kulashimikila pa numa ya kukakwa, ukubindwa no kusopwa pa myaka 6.

Finshi abantu ba kwa Yehova bacitile pali ici ica kupapusha icacitike? Tabaikete na ku cani, balitendeke ukuteyanya bwino umulimo! Abali mu filonganino balifwaile incende isha kulonganinapo kabili balyakenye icifulo ca kushimikilamo no kupanga amafaelo ya filonganino ayapya. Aba bwananyina balitemenwe sana ilyo baishibe ukuti nomba kuti baorda no kupokelela impapulo. Apo nomba balibasuminishe ukushimikila, balicincile ukubombesha muli uyu mulimo. Pa numa fye ya myeshi itatu,  ilyo calefika mu November 1956, bakasabankanya abaleshimikila bafikile 612.

Na lyo line, bashimapepo ba ku Katolika tabapoosele na nshita, batendeke amapange ya kusuusha ba Nte. Apo Trujillo alisaine icipangano na ba ku Vatican, bashimapepo ba ku Katolika balikoselepo ukutunka ubuteko ukuti bulofye ba Nte. Shimapepo wa ku Katolika Oscar Robles Toledano, alilembele kalata kuli kalemba mukalamba uwa buteko, Virgilio Álvarez Pina, no kulomba ubuteko ukuti bumutungilile muli kampeni yakwe iya “kulenga abena Dominican ukwiluka pa kuti belufiwa ku fisambilisho ifyabipa ifya ‘Nte sha kwa Yehova.’”

Toledano alondolwele ukuti ico alefwaisha “kufubalisha umulimo wa kupanga abasambi uwa Nte sha kwa Yehova.” Na kabili, Toledano alembele ukuti belasuminisha ukulaleta impapulo mu calo, “maka maka icitabo ca ‘The  Truth Shall Make You Free’ (Icine Cikamulenga Abantungwa) na magazini ya Ulupungu lwa kwa Kalinda.”

Intungulushi sha mapepo na bantu babo balyumene akapi no buteko bwa kwa Trujillo pa kuti basanse ba Nte. Mu June 1957, Francisco Prats-Ramírez, intungulushi ya cipani ca Dominican Party, alembeele Trujillo kalata umo alondolwele ukuti: “Ndepanga ukuti tukalanshanyepo pa fya kucincitila amapange ayabi aya Nte sha kwa Yehova aya kukanafwaya ukucitako ificita abekala calo.”

Tapapitile ne nshita amapange ayabi ayo bakwete pali ba Nte yalibombele nge fyo icitabo citila, Trujillo—Little Caesar of the Caribbean calandile ukuti: “Mu lusuba lwa mu 1957, mu manyunshipepala ya mu Dominican mwali amalyashi ayengi umo aba mu buteko baletunganya Inte sha kwa Yehova ukuti baletunka abantu ukwimina ubuteko no kuti balecita ifintu na fimbi ifibi sana. Abantu basakatwike ilyo shimapepo wa lukuta lwa Jesuit, Mariano Vásquez Sanz asuushishe akabungwe ka ba Nte pa mulabasa wa kwa Trujillo uwa La Voz Dominicana [The Dominican Voice], kabili atile ba Nte balelwisha ubuteko pa kuti abantu bakwate insambu mu makwebo ya mu calo, balacita ifyabipa, ‘ni ncenjeshi, fipondo, kabili balwani ababipa sana.’ Na kabili, kuli na kalata iyo bashikofu babili Ricardo Pittini na Octavio Antonio Beras basainepo umo balekoselesha bashimapepo bambi ukucingilila abantu babo kuli ‘bucipondoka bwabipisha ubwa fisumino fye calici.’”

Amapange ya ba macalici na ba mu buteko yalibombele. Mu July, akabungwe ka Congress of the Dominican Republic kalibikileko ifunde ilya kubinda Inte sha kwa Yehova. Tapapitile na nshita, bakapokola batampile ukuuma no kucusha aba bwananyina. Bonse pamo abo baikete bali 150.