Icipandwa 38

Kuti Nacita Shani pa Kuti Ntemwe Ifya kwa Lesa?

Joshua uuli ne myaka 16, nalala mu busanshi. Banyina baiminina pa mwinshi e lyo bamweba bukali bukali ati, “Joshua, ima! Bushe tawishibe ukuti lelo tuleya mu kulongana?” Abafyashi ba kwa Joshua balefwaya ukuti akabe Inte ya kwa Yehova, kanshi lyonse ulupwa lwakwe lulaya mu kulongana kwa Bwina Kristu. Lelo shino nshiku, Joshua tafwaya ukuyako.

“Mayo na imwe, bushe mfwile fye ukuya mu kulongana?”

Banyina batila, “Tendeka fye ukuipekanya kabili leka no kuilishanya. Nshilefwaya ncelwe na lelo!” Bapilibuka e lyo bafumapo no kufumapo.

Cilya fye banyina balefumapo, Joshua atila, “Umfweni mayo! Ni mwe mwasalile ukulapepa uku, te kutila ninshi na ine e ko mfwile ukulapepa.” Joshua aishiba ukuti banyina na bamumfwa pantu baiminina. Lyena ukwabula ukumwasuka bakonkanyapo ukwenda.

Joshua aumfwa ububi pa fyo alanda. Talefwaya nangu panono ukukalifya banyina. Lelo talefwaya no kulomba ubwelelo pa fyo alanda. Ico engacita fye ku . . .

Uku ninshi Joshua aleilishanya, atendeka ukuipekanya. Lyena atendeka ukuisosha ati: “Bushiku bumo nkaisalila ne mwine ukwa kupepa. Ine nalipusanako na basangwa pa Ng’anda ya Bufumu. Teti mbe Umwina Kristu!”

 BUSHE walyumfwapo ifi Joshua aleyumfwa? Bushe limo umona kwati ilyo bambi baleipakisha ukucita ifya kwa Lesa, iwe uipatikisha fye? Ku ca kumwenako:

● Bushe umona ukusambilila Baibolo kwati kubelenga ifya ku sukulu?

● Bushe taufwaya ukuya mu kushimikila ku ng’anda ne ng’anda?

● Bushe ukulongana kulakutendusha?

Nga wayasuka ukuti ee wifuupulwa. Kuti wasambilila ukuipakisha ukubombela Lesa. Leka tumone ifyo wingacita ifyo.

UBWAFYA 1 Ukusambilila Baibolo

Umulandu kwayafisha. Nalimo umona kwati “tawatemwa ifya ukubelenga belenga.” Limbi cilakwafya ukubika sana amano ku kusambilila pa nshita iitali! Nalimo umona kwati ifya ku sukulu ifyo ufwile ukubelenga fyalifula sana.

Umulandu ufwile ukulasambilila Baibolo. Baibolo yafuma kuli Lesa kabili “ilasambilisha abantu no kubafwa, kabili ilabalungika no kubafunda ifyo balingile ukwikala.” (2 Timote 3:16, Baibolo ya Contemporary English Version) Ukulabelenga Baibolo no kutontonkanya sana pa fyo ulebelenga kuti kwa kwafwa ukumfwikisha ifingi ifyo ushaishibe kale. Ulingile ukwishiba ukuti pa kuti fye ukwate ifintu ifyacindama ulingile ukubombesha. Nga ulefwaya ulea-angala bwino icangalo, ufwile ukwishiba no kulakonka amafunde babomfya pa kwangala ico cangalo. Nga ulefwaya ukuba no bumi busuma, ufwile ukulatukusha umubili. Na pa kusambilila pa wakupangile, ufwile ukusambilila Baibolo.

Ifyo abaice banobe balandilepo. Tshedza atile: “Ilyo naile kwi sukulu lya ku sekondari nalingile ukupingulapo ifyo nali no kucita. Abana be sukulu banandi balecita fye ifili fyonse ifyabipa, naleti: ‘Bushe ifi balecita e fyo ningile ukulacita?  Bushe ifyo abafyashi balensambilisha e cine?’ Nali no kuipingwilapo ne mwine.”

Nelisa atile: “Lyonse nalicetekele ukuti ifyo nasambilile fyali fya cine, lelo ico nalekabila kushininwa pa fyo nalesambilila. Nalekabila ukusalapo pa lwandi ukuti uku e ko nalefwaya ukulapepa te kulayako fye pantu e ko ulupwa lwandi balepepa.”

Ifyo wingacita. Panga programu yobe iya kuisambilisha ifya kwa Lesa. Ulesambilila ifyo ulefwaya ukusambililapo e lyo ne fyo ulemona ukuti e fyo ulefwaya ukwishiba. Sala ifyo ulefwaya ukufwailishapo. Nomba kuti wacita shani pa kuti ufisange? Kuti wabelenga mu Baibolo e lyo no kubebeta ifyo wasuminamo, nalimo kuti wacita ifyo ukubomfya icitabo pamo nga Bushe Cinshi Baibolo Isambilisha? *

Tendeka ukubombelapo! Conga ✔ pa malyashi yabili nelyo yatatu aya mu Baibolo ayali pe samba ayo wingafwaya ukusambililapo nelyo nga ulefwaya kuti walemba ama lyashi ulefwaya we mwine.

 □ Bushe Lesa e ko aba?

□ Kuti nashininkisha shani ukuti abalembele Baibolo ni Lesa e walebeba?

□ Mulandu nshi mfwile ukusuminina ukuti ifintu fyabumbilwe fye?

□ Ubufumu bwa kwa Lesa cinshi, kuti nashininkisha shani ukuti e ko bwaba?

□ Kuti nalondolola shani ifyo nasambilila mu Baibolo ukuti e ficitika umuntu nga afwa?

□ Mulandu nshi mfwile ukushininwa ukuti abafwa bakabuuka?

□ Kuti naishiba shani ukuti uku e kupepa kwa cine?

․․․․․

UBWAFYA 2 Ukushimikila

Umulandu kwayafisha. Ukulanda na bantu bambi pa fyaba mu Baibolo nelyo ukukumanya abo usambilila nabo ilyo uleshimikila cilatiinya.

Umulandu ufwile ukulashimikila. Yesu aebele abasambi bakwe ati: ‘Kalengeni abasambi. Mulebasambilisha ukulakonka fyonse ifyo namwebele.’ (Mateo 28:19, 20) Lelo kwaliba imilandu na imbi iyo ulingile ukulashimikila. Ilyo ukufwailisha kumo kwacitilwe pa baice, casangilwe ukuti mu fifulo fimo abaice abengi balisumina ukuti Lesa e ko aba kabili balicetekela ne fyo Baibolo ilanda. Lelo, aba bene abaice tabakwata isubilo line line ilya kuti ifintu ku ntanshi fikawama. Ilyo ulesambilila Baibolo, uleshiba ifyebo ifyo abaice banobe abengi balefwaisha  ukwishiba kabili ifyo balekabila! Nga uleshimikilako bambi ifyo ulesambilila mu Baibolo ukaba ne nsansa, kabili ukalenga umutima wa kwa Yehova ukusekelela.—Amapinda 27:11.

Ifyo abaice banobe balandilepo. Nelisa atile: “Ine no munandi twalepekanya ifya kulanda pa kushimikila, kabili twalisambilile ne fyo twingacita nga twasanga abashilefwaya kabili ne fyo twingabwelela ku bo twalandile nabo. Ilyo natendeke ukushimikila sana, natendeke ukuipakisha.”

Shontay atile: “Nkashi umo uwancilako imyaka 6 alingafwa sana. Alansenda mu kushimikila kabili limo alansenda mu kulya nankwe ica kulya ca lucelo. Alinangile amalembo ayankoseleshe ukwaluka mu fyo ntontonkanya. Nomba ndashimikila sana, ne calenga fintu nalemona kuli uyu nkashi. Ndatasha sana pa fyo angafwile!”

Ifyo wingacita. Abafyashi bobe nga bakusuminisha, fwaya umukalamba umo mu cilonganino cenu uo wingalabomba nankwe mu mulimo wa kushimikila. (Imilimo 16:1-3) Baibolo itila: “Icela cinoona icela. No muntu anoona icinso ca muntu munankwe.” (Amapinda 27:17) Mwaliba ubusuma ubwingi mu kubomba na bakalamba mu mulimo wa kushimikila pantu balipita mu fingi. Alexis uuli ne myaka 19 atile, “Na kuba tacayafya ukubomba na bakalamba.”

Tendeka ukubombelapo! Ukulunda pa bafyashi bobe, lemba pe samba ishina lya muntu wa mu cilonganino uwingalakwafwa ukushimikila.

․․․․․

UBWAFYA 3 Ukusangwa ku kulongana

Umulandu kwayafisha. Pa numa ya kwikala mu kalasi akasuba konse, ukwikala iawala limo nelyo ukucilapo ukulakutika ku malyashi yalelanda pali Baibolo kuti camoneka kwati mulekokola sana.

Ico ufwile ukusangilwako. Baibolo itucincisha ukuti: “Tutontonkanye pa banensu ku kucincishanya ku kutemwa kabili  ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.”—AbaHebere 10:24, 25.

Ifyo abaice banobe balandilepo. Elda atile: “Ukupekanya kwalicindama sana. Inshita shimo ufwile ukuikoselesha fye ukupekanya. Nga nauipekanya, kuti waipakisha ukulongana pantu ninshi nawishiba ifilelandwapo kabili kuti wa-asukapo.”

Jessica atile: “Inshita imo, natendeke ukumona ukuti nga na-asukapo pa kulongana, ukulongana kwalewama sana.”

Ifyo wingacita. Ulepekanya, kabili uleasukapo. Ici cikalenga ukaleumfwa ukuti na iwe ulesangwilako ukuti ukulongana kuwame.

 Tupeele icilangililo: Finshi wingatemwapo—ukutamba icangalo pa TV nelyo ukuteyako mu cibansa? Kwena, ukuteyako icangalo kulabapo bwino ukucila ukulatambako fye. Kanshi kuti cawama sana nga uleibimbamo mu kulongana kwa Bwina Kristu ukucila ukwikalamo fye.

Tendeka ukubombelapo! Pa ncende ili pe samba, lemba inshita wingalatendeka ukupekanya ukulongana pa mamineti 30 cila mulungu.

․․․․․

Abaice abengi baleimwena ukuti amashiwi yaba pa Amalumbo 34:8 ya cine. Patila: “Sondeni no kumona ukuti Yehova musuma.” Cilawama ukulyako ica kulya icisuma ukucila ukumfwa fye ukuti naciwama. Kanshi caliwama ukusonda ica kulya. E fyo caba na ku kupepa Lesa. Sonda no kumona ubusuma bwaba mu kuibimbamo mu fya kwa Lesa. Baibolo itila uushumfwa fye no kulabako lelo uucita ifyo ilanda “akaba uwa nsansa ilyo alecita ifyo fine.”—Yakobo 1:25.

IFYO TUKALANDAPO MU CIPANDWA CIKONKELEPO

Kuti wacita shani pa kuti uletantika ifyo ufwaya ukucita no kufifikilisha?

[Futunoti]

ILEMBO ILIKWETE ICISHINKA CIKALAMBA

“Mupilibuke pa kwalula amatontonkanyo yenu, pa kuti mushininkishe mwe bene ico Lesa afwaya, icisuma, icapokelelwa kabili icapwililika.”—Abena Roma 12:2.

IFYO WINGACITA

Fwaya ibuuku, kabili ulelembamo ifishinka ifikalamba ilyo uli mu kulongana. Ukasanga ukuti ukulongana kulepwa bwangu kabili cikakwangukila ukusambilila!

BUSHE WALISHIBA UKUTI . . . ?

Caliba fye bwino ukwishiba nga ca kuti ifyo wasuminamo fyaliba fye bwino. Na kuba, ukwipusha amepusho e lyo watendeka ukufwaya amasuko e nshila isuma iya kwishibilamo ifyo wasuminamo pali Lesa nga fya cine.—Imilimo 17:11.

IFYO NDEFWAYA UKUBOMBELAPO!

Nakulabelenga Baibolo pa mamineti ․․․․․ cila bushiku kabili nakulabomfya amamineti ․․․․․ cila mulungu ukupekanishamo ukulongana.

Pa kutila nkalebikako sana amano nga ndi mu kulongana, nka ․․․․․

Ifyo ningatemwa ukwipusha abafyashi pali ili lyashi ni fi ․․․․․

AMEPUSHO YA KUTONTONKANYAPO

● Mulandu nshi abaice nalimo bamwena ifya kwa Lesa kwati filomfwisha ubunang’ani? ․․․․․

● Ni mbali nshi shitatu ishikumine bucibusa bobe na Lesa ishili muli cino cipandwa isho wingafwaya ukubombelapo? ․․․․․

[Amashiwi pe bula 278]

“Icilonganino ca mapepo nabamo te bafyashi bansalile, naisalile ne fye ne mwine. Yehova e Lesa wandi, kabili nshifwaya ukucita ifingonaula bucibusa bwandi nankwe.”—E fyalandile Samantha

 [Akabokoshi ne Fikope pe bula 280]

Balitantike Ifyo Balefwaya Ukucita

Baibolo itila: ‘Tamwishibe icikamucitikila mailo.’ (Yakobo 4:14) Limo umuntu kuti afwa fye ninshi acili fye umwaice kabili ukwabula ukwenekela. Ilyo ulebelenga ifyacitikile Catrina na Kyle, mona ifyo ukutantika ifyo balefwaya ukucita no kufifikilisha kwabafwile ukupanga ishina lisuma na Yehova Lesa mu myaka fye iinono iyo bali no mweo.—Lukala Milandu 7:1.

Catrina aali fye ne myaka 18 ilyo afwile, lelo ilyo aali ne myaka 13 alilembele ifyo alefwaya ukucita. Alefwaya ukubombako umulimo wa nshita yonse, ukuyamukushimikala ukwali ukukabila, no kubombela pamo na bawishi umulimo wa kukuula Amayanda ya Bufumu. Alembele ati: “Ninjipeela ukulabombela fye Yehova Lesa!” Ico Catrina alefwaisha “kulakonka amafunde ya kwa Lesa, pa kutila lyonse alelenga umutima wakwe ukusekelela.” Pa cililo cakwe, Catrina bamulondolwele ukuti “ali mukashana uwayemba uwabikile amano ku kubombela Yehova inshiku shonse isha mweo wakwe.”

  Ilyo ali fye umwaice, Kyle bamusambilishe ukukwata amabuyo. Ilyo afwile mu busanso bwa pa musebo ninshi ali fye ne myaka 20, balupwa lwakwe basangile ibuuku ilyo alelembamo ifyo alefwaya ukucita ifyo banyina bamusambilishe ilyo ali fye ne myaka 4. Pa fyo alembelemo pali ukubatishiwa, ukulandako amalyashi mu Ng’anda ya Bufumu, no kubombelako pa maofeshi yakalamba aya Nte sha kwa Yehova pa kutila engafwilishako ukupanga ifitabo ifyali no kwafwa abantu ukusambilila pali Lesa. Ilyo balupwa lwakwe babelengele ifyo Kyle alelemba mwi buuku ilyo ali umwaice, banyina batile, “Alifikilishe fyonse ifyo alembele.”

Finshi iwe ufwaya ukucita? Apo teti wishibe icingakucitikila mailo, kuti cawama cila bushiku ulebombesha ukufikilisha ifyo ufwaya ukucita. Nga ulefwaya ukupashanya Catrina na Kyle, ulebomfya inshita yobe mu kucita ifintu ifyacindamisha ukufika pantu wingapesha. Pashanya no mutumwa Paulo, uwasosele ninshi kwashala fye panono ukuti afwe, ati: “Nindwa ubulwi ubusuma, nimbutuka ulubilo ukufika na ku mpela, ninsunga icitetekelo.” (2 Timote 4:7) Icipandwa cikonkelepo cili no kukwafwa ukucita ifyo fine!

[Icikope pa mabula 274, 275]

Nga ulefwaya ukuba no bumi busuma, ufwile ukulatukusha umubili. Nga ulefwaya icitetekelo cobe ukukosa, ufwile ukulasambilila Icebo ca kwa Lesa