Uo Wingapashanya—Yobo

Ifintu fyalibipiile Yobo. Pa kubalilapo fye, ifyuma fyakwe fyaliloba. Ica cibili, abana bakwe bonse balifwa. Ica butatu, alilwele. Ifi fyonse fyacitike pa kashita fye akanono kabili ukwabula no kwenekela. Ilyo Yobo alecululuka mu mutima, aletila: “Ine nimpata icibi umweo wandi.” Kabili alelanda ati, “naliseebana kabili ndacula.” (Yobo 10:1, 15) Lelo nangu fye ni lintu Yobo alecula, talefwaya ukupondokela uwa Mubumbile. (Yobo 2:10) Nangu ca kutila ubumi bwakwe bwalyalwike, Yobo talekele amafya ukwalula ubuntu bwakwe. Kanshi kuti wasambililako fimo kuli filya Yobo ashipikishe.

Na iwe nga wakwata amafya, nalimo kuti ‘wapata umweo obe.’ Nga filya Yobo acitile, na iwe ulingile ukutwalilila ukushipikisha nangu ca kuti uli na mafya no kukosa mu kupepa Yehova Lesa. Yakobo alembele ukuti: “Moneni! Tuletila balipaalwa abashipikisha amacushi. Mwalyumfwa ukushipikisha kwa kwa Yobo kabili mwalishiba ne fyo Yehova acitile pa kulekelesha, icilanga ukuti Yehova wa nkumbu nga nshi kabili wa luse.” (Yakobo 5:11) Nga filya fine asakamene Yobo, kanshi na iwe akakusakamana!