Pali Cisano, pa 5 July, 2013, aba mu lupwa lwa Bethel balitemenwe nga nshi ilyo baumfwile ifyo Munyinefwe Anthony Morris uwa mwi Bumba Litungulula abilishe ukuti: “Pali Cine, pa 4 July, 2013 kwali ukusuminishanya kwa kushitisha ifikuulwa 6 umwaba ne cikuulwa ca 117 Adams Street ne ca 90 Sands Street mu Brooklyn. Ilyo tukafika pa kati ka mweshi wa August uno wine mwaka tufwile ukufumamo mu fikuulwa 5.”

Munyinefwe Morris alondolwele ukuti amaDipartimenti ya Kucapa Ifya Kufwala ne ya Kuciisa, ayabela pa ntunti yalenga 6 na 7 mu Cikuulwa ca Butatu yakatwalilila ukubomba mpaka na pa kati ka mwaka wa 2014. Balandile no  kuti, “Bakaleka ukubomfya icikuulwa ca 90 Sands Street mu 2017.”

Ico baleshitishisha ifi fikuulwa, nico balefwaya ukukuushisha amaofeshi yakalamba aya Nte sha kwa Yehova ku ncende iikalamba sana iyaba amahecta 102 ku Warwick, ukuyafumya ku Musumba wa New York. Lelo, pali iyi nshita tabaali na kutendeka ukwimba no kuwamya apa kukuulila ukufikila babapeela ifipepala fya kubasuminishishapo ukukuula.

E ico, ulupwa lwa Bethel ku America lwalefwaya sana ukumfwikisha ifyo ba Mark Sanderson aba mwi Bumba Litungulula babilishe pali Cine, pa 18 July, ilyo batile: “Tuli ne nsansa ukubilisha ukuti mailo icungulo pali Citatu, pa 17 July, icipani ca Warwick Planning Board calisuminisha amapulani ya ukukabela ifikuulwa fya maofeshi yakalamba aya Nte sha kwa Yehova. Uku e kusuminisha kwa kulekeleshako ukwalefwaikwa pa kuti tupoke amapepala ya kutendekelapo ubukuule. Na cimbi icaweme ca kuti, imyaka ine ukutula apo twashitiile impanga ya ku Warwick yakumene mailo line ilyo batupeele ifipepala fya kutusuminisha. Ne cacindamisha ca kuti ifyalecitika muli ishi nshiku shafumako fyalelanga ukuti Yehova aletupaala nga nshi.” Munyinefwe Sanderson alitashishe bonse pa fyo balebombesha no kupepela uyu mulimo wacindama. Na mu kulekelesha batile, “Uo tuletasha sana no kulumbanya ni Yehova uulengele ukuti ici cintu cacindama cicitike, e kutila, tukuushe amaofeshi yakalamba ku Warwick mu New York mwine.”

Pali Cisano, pa 26 July, 2013 ba Morris bakumene na bakabomba 1,000, aba pa Bethel na babomfi ba makuule ababa mu Regional Building Committee (RBC) mu  muputule wa kuliilamo ku Tuxedo, mu New York uko balepekanishisha ifya bukuule bwa ku Warwick. Pa numa ya kulanda ilyashi lya kubakoselesha mu fya kwa Lesa, ba Morris balandile ukuti balikwete ifyo balefwaya ukubilisha. Batile, “Pali ifyo mpokelele, ifyo ndefwaya ukumwebako. Pa muulu wa ili ipepala palembelwe ati: ‘Ukusuminisha Ubukuule.’” Tabalati bapwishe no kubelenga, ibumba lyalitootele icine cine. Apo bonse balefwaisha ukumfwa ifyalembelwe, Munyinefwe Morris abelengele amashiwi yamo yamo ayalelangilila ukuti balibasuminishe ukutendeka ubukuule. Pali iyi nshita balebilisha ninshi papitile fye amaawala yatatu ukutula apo bapokelele aya mashiwi ukufuma ku balashi ba mwi tauni lya Warwick.

Ukutula apo batendekela ukukuulilapo ifikuulwa na fimbi ku Wallkill mu August 2009, bamunyinefwe na bankashi 2,800 balibombako umulimo wa kuitemenwa pali aya maofeshi. Pa fikuulwa balekuulilapo paba no mwa kwikala, umwa kusungila imyotoka na maofeshi. Icikuulwa cimo umwikala bakabomba baleciwamya, kabili kuli no kukuululula no kukuula cipya cipya umwa kupulintila, umwa kucapila, umwa kulonganina, no mwa kufikila abeni e lyo no mwa kubombela imilimo yalekanalekana. Ubukuule bwa ku Wallkill buli no kutwalilila mpaka na ku kupwa kwa 2015.

Pali ino nshita ubukuule bwa pa kabela amaofeshi yakalamba bwalitendeka ku Warwick. Imyeshi fye inono ukutula apo ubukuule bwatendekela, baliseba no kwimba, balibika ne mipaipi pa nshi. Ku kupwa kwa 2013 e lyo ubukuule bwa fikuulwa fitatu ifya kutampilapo pamo nga, umwa kulungishisha imyotoka, umwa kwimika imyotoka sha beni no mwa kuwamisha ifintu fimbi bwatampile. Ifi fikuulwa filafwaikwa sana pa kuti ifibombelo fisungwe  bwino na bantu abalebombela pali iyi ncende basakamanwe bwino pa nshita ya bukuule e lyo na pa numa. Ifi fikuulwa nga fyapwa, ubukuule bwa fikuulwa fya kwikalamo e lyo na maofeshi yalekanalekana bukatendeka mu 2014.

Ba Kenneth Chernish aba muli Komiti ya Bukuule balandile pa fikuulwa ifyaba ku Tuxedo, pa ncende iyaba amahecta 20 kabili iyabela ku kapinda ka kuso apaba amakilomita mupepi na 10 ukufuma ku Warwick, abati: “Kuli ici cikuulwa e ko abakalaafwilisha imilimo yalekanalekana ku Warwick bakalaikala no kubapekanishisha ifya kulya kabili bakalasungilako ne fipe.” Pa kuti umulimo wa bukuule ubombwe bwangu ku Tuxedo, bamunyinefwe bamo bamo aba mu RBC ababombela ku kabanga ka America balibeta ku kuyaafwilishako imilimo imo imo.

Ababomfi abengi ababa mu RBC ku America balafwaisha ukuyabombako umulimo wa kukuula amaofeshi yakalamba. Bamunyinefwe na bankashi abengi abaishiba ifya makuule, baleipeelesha ukubombako muli uyu mulimo. Ba Leslie Blondeau ababombela ku dipartimenti ya fya mipaipi pamo na bena mwabo, ba Peter, batile: “Ukubombela pamo kulalenga twatemwana sana kabili ifyo tucitila pamo tatwakafilabe bwangu.”

Ba Mallory Rushmore batile, “Pali ino nshita ndebombela pamo ne bumba ilibombela ku fya malaiti. Cila bushiku tuba fye abasansamuka ilyo tulebombela pamo na babomfi ba kuitemenwa.”

Ba Quincy Dotson nabo batile, “Ala lipaalo nga nshi. Nalemona kwati nali no kubomfya sana ifyo naishiba, lelo ifyo ndesambililako e fingi.”

Munyinefwe Chernish atile, “Ndeumfwa bwino ukubombako uyu mulimo. Bamunyinefwe na bankashi baleyangufyanya ukubomba incito kabili balebomba bwino sana ne nsansa.”