Pa 28 June, 2013, pa webu saiti iya jw.org pali icishibisho ca kuti indimi umwaba Watchtower LAIBRARE YA PA INTANETI nashifika 100. Iyi LAIBRARE YA PA INTANETI kuti mwaibomfya ku kufwaya ifyebo nga filya fine mubomfya Watchtower Library, iya pa CD-ROM. Watchtower LAIBRARE YA PA INTANETI kuti mwaibomfya pa kompyuta nangu pali foni iyakwata Intaneti. Impapulo ishingi ishaba pali iyi laibrare ni shilya ishafumine ukutendekela mu 2000. Iyi laibrare yalikwata na Baibolo ya Amalembo ya Calo Cipya ne fitabo fya Insight on the Scriptures mu ndimi ishingi umo ifi fitabo fyapilibulwa. Nga mulefwaya ishiwi, nelyo amashiwi muli iyi laibrare, mufwile ukutaipamo ifyo mulefwaya e lyo mwatinika apo balemba ukuti Fwayeni, nga  filya tucita pa kufwaya amashiwi pa Watchtower Library. Muli iyi laibrare, kuti mwabelenga na malembo ne fyebo fimbi ifyo mulefwaya kabili kuti mwamona ifi fyebo mu ndimi shibili pa nshita imo ine nga mwatinika apo balemba ukuti Ukulinganya. Umfweni ifyo bamo batasha pali iyi laibrare iisuma nga nshi.

Umwanakashi umo uwa ku Argentina atile, “Ilyo namwene iyi laibrare pa Webu saiti, nalitemenwe nga nshi. Kwena nshaishiba ifingi pa maprogramu ya pali kompyuta ne fya kupanga amawebu saiti, lelo kuti natila iyi webu saiti mwaliipanga bwino sana. Ifyaba pali iyi Webu saiti filanga fye ukuti mwalitemwa abena mupalamano na bamunyinenwe, e lyo na Yehova. Ifyo mwapanga iyi Webu saiti filanga ukuti mwalibika amano ku bantu. Ala iyi Webu saiti ca bupe icisuma nga nshi ico Shifwe,Yehova atupeela. Natootela sana!”—A., Argentina.

Umwaume umo uwikala ku United States na o atile, “Napapa sana. Lelo akasuba nacisula Watchtower LAIBRARE YA PA INTANETI kabili nacisanga ukuti pa ndimi ishingi ishilipo pali ne ciHaitian Creole. Nshacilaenekela ukusanga ulu lulimi. Ukwabula no kutwishika na mwe bene namumona ukuti nshikwete na mashiwi. Yehova amupaale muli fyonse ifyo mulecita kabili umupashi wa mushilo ulemutungulula.”—D.C., United States.