ISAMBILILO 59
Abalumendo Bane Abaumfwilile Yehova
Ilyo Nebukadnesari asendele bacilolo ba mu Yuda ku Babiloni, aebele Ashipenasi uwalebombela kwi sano ukuti alebasakamana. Amwebele ukusalapo abalumendo abacenjela kabili abashalelwalilila. Aba abalumendo bali no kubasambilisha pa myaka itatu. Ifyo bali no kubasambilisha fyali no kulenga balebomba imilimo iyacindama sana mu Babiloni. Aba abalumendo bali no kusambilila ukubelenga, ukulemba, no kulanda ululimi ulo abena Babiloni balelanda. Babebele no kulalya ifya kulya ifyo imfumu na bacilolo balelya. Pali aba abalumendo pali na Daniele, Hanania, Mishaele na Asaria. Lelo Ashipenasi alibenike amashina yambi aya bena Babiloni: Daniele amwinike ati Belteshasari, Hanania amwinike ati Shadraki, Mishaele amwinike ati Meshaki na Asaria amwinike ati Abednego. Bushe ifyo babasambilishe mu Babiloni fyali no kulenga baleka ukubombela Yehova?
Aba abalumendo bane baleumfwila sana Yehova. Balishibe ukuti tabalingile ukulalya ifya kulya ifyo imfumu yalelya pantu Amafunde ya kwa Yehova yalandile ukuti ifya kulya fimo fyali ifyakowela. E ico baebele Ashipenasi ati: ‘Twapapaata mwilatupeelako ifya kulya fya mfumu.’ Ashipenasi abebele ati: ‘Nga mwaonda pa mulandu wa kuti tamulelya ifi ifya kulya, imfumu ikanjipaya!’
Daniele aebele uwalebasunga ati: ‘Twapapaata muletupeela fye umusalu na menshi pa nshiku 10. Lyena mukatulinganye ku balumendo abakulalya ifya kulya fya mfumu.’ Uwalebasunga alisumine.
Pa numa ya kulya umusalu pa nshiku 10, Daniele na banankwe batatu balemoneka bwino sana ukucila abalumendo bambi. Yehova alitemenwe ifi bakeene ukulya ifya kulya ifyakowela. Na kabili Yehova alipeele Daniele amano ya kwishiba umwalolele ifimonwa ne filoto.
Ilyo bapwishishe ukubasambilisha, Ashipenasi atwele abalumendo kuli Nebukadnesari. Ilyo imfumu yalandile na balumendo, yamwene ukuti Daniele, Hanania, Mishaele na Asaria balicenjele sana ukucila abalumendo bambi. E ico asalile aba abalumendo bane ukulabombela mwi sano. Ilingi line imfumu yaleeba aba abalumendo ukuti baipandeko amano pa fintu ifyacindama. Yehova alengele ukuti babe aba mano ukucila bonse aba mano na bamajiki abalebombela imfumu.
Nangu ca kuti Daniele, Hanania, Mishaele na Asaria baleikala mu calo cimbi, tabalabile ukuti bali bantu ba kwa Yehova. Bushe na iwe ukatwalilila ukumfwila Yehova, na lintu ushakabe na bafyashi?
“Wileka umuntu nangu umo asuule ubulumendo bobe. Lelo, ube ica kumwenako ku batetekela mu milandile, mu myendele, mu kutemwa, mu citetekelo, na mu kusanguluka.” —1 Timote 4:12
Nalimo Kuti Mwatemwako ne fi
Ifyo Wingasambilila ku Malyashi ya mu Baibolo
Tabakontamiine Icimpashanya
Shadraki, Meshaki na Abednego bakaana ukupepa icimpashanya ca golde ica mfumu ya Babiloni.
Ifyo Wingasambilila ku Malyashi ya mu Baibolo
Daniele ali mu Cilindi ca Nkalamo
Mulepepa kuli Yehova cila bushiku, nga filya Daniele alecita!
