Estere ali mukashana umuYuda uwaleikala mu musumba wa Shushani uwa bena Persia. Pali iyi nshita, ninshi palipita imyaka iingi ukutula apo Nebukadnesari asendele ba lupwa lwa kwa Estere ukubafumya ku Yerusalemu ukubatwala ku Babiloni. Uwakushishe Estere, mufyala wakwe Mordekai uwali mubomfi wa Mfumu Ahasuerusi iya bena Persia.

Imfumu Ahasuerusi yalefwaya ukuupa umwanakashi umbi. E ico ababomfi bakwe bamuleteele abanakashi abasuma sana aba mu Persia, pali aba banakashi pali na Estere kabili e o imfumu yasalile ukuba namfumu. Mordekai aebele Estere ukuti ekeba umuntu nangu umo ukuti muYuda.

Hamani umwaume uwali ne cilumba e waleyangalila bacilolo bonse aba mfumu. Alefwaya ukuti abantu bonse balemukontamina. Lelo Mordekai talemukontamina, kabili Hamani alifulilwe sana ica kuti alefwaya ukumwipaya. Ilyo Hamani aishibe ukuti Mordekai aali muYuda, alipekenye ukuti akepaye abaYuda bonse abali mu ncende shonse isho bena Persia baleteka. E ico aebele imfumu ati: ‘AbaYuda babi; mufwile ukubepaya.’ Ahasuerusi amwebele ati: ‘Cita fyonse ifyo ulefwaya,’ kabili alimupeele na maka ya kupanga ifunde. E ico Hamani apangile ifunde lya kuti abena Persia bakepaye abaYuda bonse pa bushiku bwalenga 13 ubwa mweshi wa Adari. Yehova alemona ifyalecitika.

Estere taishibe ukuti balipangile ili funde. E ico Mordekai atumine uwa kuti atwalile Estere apo balembele ifunde bapangile no kuyamweba ati: ‘Kabiye ulande ne mfumu.’ Estere alandile ati: ‘Onse uwaya ku mfumu ukwabula ukumwita kuti bamwipaya. Pa nshiku 30 imfumu tayanjitapo! Na lyo line, nalaya. Nga ca kuti yantambika inkonto, ninshi tabanjipaye. Nga tayantambike, ninshi balanjipaya.’

Awe Estere aile umwaleikala imfumu. Ilyo imfumu ya mumwene, yalimutambike  inkonto. E ico Estere aile ku mfumu kabili yamwipwishe ati: ‘Cinshi ulefwaya Estere?’ Awe Estere ayaswike ati: ‘Ndefwaya ukumwita pamo na Hamani ku mutebeto.’ Ilyo bali pa mutebeto, Estere alibetile ku mutebeto na umbi. Ilyo bali pa mutebeto walenga bubili, imfumu yalipwishe Estere na kabili aiti: ‘Cinshi ulefwaya nkucitile?’ Awe Estere alandile ati: ‘Kuli umuntu umo uulefwaya ukunjipaya no kwipaya abantu bandi. Napapaata tupususheni.’ Imfumu yamwipwishe ati: ‘Nani uyo wine uulefwaya ukukwipaya?’ Estere ayaswike ati: ‘Ni uyu umuntu wabipa Hamani.’ Ahasuerusi alifulilwe nga nshi ica kuti alandile ukuti Hamani bamwipaye ilyo line fye.

Tapali nangu umo uwali no kufuuta ifunde ilyo Hamani apangile, nangu fye ni mfumu. E ico imfumu yasalile Mordekai ukuti aleyangalila bacilolo ba mfumu kabili yalimupeele na maka ya kupanga ifunde ilipya. Lyena Mordekai apangile ifunde ilyasuminishe abaYuda ukuicingilila nga babasansa. Ilyo ubushiku bwa 13 ubwa mweshi wa Adari bwafikile, abaYuda balicimfishe abalwani babo. Awe abaYuda e fyo batendeke ukusefya uku kucimfya cila mwaka.