Ku Bena Kristu Banensu:

Apo tuli bakapepa ba kwa Yehova, twalitemwa Icebo cakwe Baibolo. Twalishininkisha ukuti mu Baibolo mwaba ilyashi lya kale ilya cine, ifyebo ifingatwafwa mu mikalile, e lyo ne filanga ukuti Yehova alitemwa abantunse. (Amalumbo 119:105; Luka 1:3; 1 Yohane 4:19) Tulafwaisha ukusambilisha abantu icine icaba mu Cebo ca kwa Lesa. E ico natupekanya ici citabo icileti “Ifyo Wingasambilila ku Malyashi ya mu Baibolo.” Lekeni tumwebeko fimo pali ici citabo.

Abo balembela cino citabo maka maka, bana. Lelo kuti twacibomfya na kukwafwa abakalamba abafwaya ukusambilila na fimbi pa fya mu Baibolo. Na kabili apo Baibolo citabo ca bantu bonse, tatuletwishika ukuti nga tulebelenga amasambililo yali muli cino citabo tukanonkelamo pantu yakatwafwa ukuba ne nsansa icine cine.

Amalyashi ya mu Baibolo ayali muli cino citabo yatendekele pa nshita ilyo Lesa abumbile abantunse. Aya amalyashi bayalemba mu nshila iyayanguka ukumfwa, kabili balyesha ukuyalemba ukulingana ne fyo yalekonkana ukucitika.

Cino citabo cisuma sana, ifikope ifilimo na mashiwi babomfya bayalemba mu nshila ya kuti amalyashi ya mu Baibolo yaleumfwika bwino sana ica kuti no ulebelenga aleishiba ifyo abantu balelandapo baleumfwa.

Cino citabo calatwafwa ukwishiba ifyo Baibolo yabela citabo icilanda pa bantu, abaleumfwila Yehova e lyo na bashalemumfwila. Calalenga tusambilileko ku fyo abantu abalembwamo bacitile.  (Abena Roma 15:4; 1 Abena Korinti 10:6) Muli cino citabo muli ifipande 14. Pa ntendekelo ya cila cipande pali ifyebo ifilelanda pa masambililo yamo ayali muli ico cipande.

Nga muli bafyashi, kuti mwabelengela pamo no mwana wenu isambililo no kulanshanya nankwe ifikope. Lyena kuti mwabelengela pamo Amalembo umufumine isambililo. Afweni umwana wenu ukwikatanya ifyo alebelenga mu Baibolo ne sambililo ilili mu citabo. Nalimo ifi fine e fyo mwingalacita ilyo mulesambilisha umukalamba ifya mu Baibolo.

Natucetekela ukuti cino citabo cikafwa abaice na bakalamba ukusambilila ifyaba mu Cebo ca kwa Lesa no kulacita ifyo bakalasambilila. Ici cikalenga bakalepepa Lesa no kuba mu lupwa lwakwe ulo atemwa.