MOSE aile ku lupili lwa Horebu ulwabelele ukutali mu kufwaya umulemfwe wa kuti impaanga shakwe shilye. Ilyo afikile, amwene icimpusa cilebilima umulilo, lelo tacalepya!

Mose atile, ‘nshamonapo ica musango uyu. Kanje mupepi pa kuti imone ifilecitika.’ Ilyo apaleme, aumfwile ishiwi ukufuma mu cimpusa lileti: ‘Wipalamako kuno. Fuula insapato shobe pantu wiminine pa mushili wa mushilo.’ Lesa e walelanda ukupitila muli malaika, e ico Mose afimbile pa menso.

Lyena Lesa atile: ‘Nimona ukucula kwa bantu bandi abali mu Egupti. E ico ndefwaya ukubafumya mu busha, kabili ni we ndetuma ukuyabafumya mu Egupti.’ Yehova alefwaya abantu bakwe bakekale mu calo icisuma ica Kanaani.

Lelo Mose atile: ‘Nine nani uwa kucita ico? Nomba nga ca kuti nafika ku bena Israele e lyo banjipusha ati, “Nani akutumine?” Nkabasuka shani?’

Lesa amwaswike ati: ‘Ifi e fyo ukasose, “YEHOVA Lesa wa kwa Abrahamu, Isaki, na Yakobo e wantuma kuli imwe.”’ Yehova asosele no kuti: “Ili e shina lyandi umuyayaya.”

Lyena Mose atile: ‘Nomba nga nabeba ati ni mwe muntumine e lyo bakaana ukusumina, cikaba shani?’

Lesa aipwishe Mose ati: “Cinshi cili mu minwe yobe?”

Mose ayaswike ati: “Ni nkonto.”

Lesa amwebele ati: “Ipoose pa nshi.” Lelo ilyo Mose apoosele inkonto pa nshi, yasangwike insoka. Lyena Yehova alangile Mose icipesha amano na cimbi. Amwebele ati: ‘Bika ukuboko kobe mu ca kufwala cobe.’ Mose alicitile ico, kabili ilyo afumishe ukuboko, kwali ukwabuuta tuutu! Kwamoneke kwati alilwala ubulwele bwa fibashi ububi sana. Lyena Yehova apeele Mose amaka ya kucita icipesha amano ca butatu. Na mu kulekelesha amwebele ati: ‘Nga wacita ifipesha amano fyonse ifi, abena Israele bakasumina ukuti nine nkutumine.’

Pa numa, Mose aile ku ng’anda no kweba Yetro ati: ‘Ndefwaya ukubwelela kuli bamumyinane ababa mu Egupti pa kuti nkayemona ifyo bali.’ E fyo Yetro alayene na Mose. Awe Mose alimine no kubwelelamo ku Egupti.