BUSHE naumona ifilecitika apa? Aba abaume bonse baali bashilika ba nkondo mu Israele. Aba abakonteme, balenwa amenshi, e lyo uwiminine mupepi nabo ni Gideone, Umupingushi. Alemona ifyo balenwa amenshi.

Lolekesha umone ifyo balenwa amenshi. Bambi nabafisha ne finso pa menshi ilyo balenwa. Lelo umo pali bena alesenda amenshi mu minwe e lyo anwa, pa kuti alemona ne filecitika. Ici e calefwaikwa pantu Yehova aebele Gideone ukusala fye abaume abalenwa amenshi ninshi uku balemona ifilecitika. Lesa amwebele ati, abashala bafwile ukubwelelamo ku mayanda. Natumone ico alandiile ifi.

Abena Israele baali no bwafya ubukulu na kabili. Ne calengele ni co tabaumfwilile Yehova. Abena Midiani balibacimfishe kabili balebacusha. E ico abena Israele balilile kuli Yehova ukuti abafwe, na o alyumfwile.

Yehova aebele Gideone ukwita abashilika ba nkondo. Na Gideone alongenye abashilika 32,000. Lelo abalelwisha abena Israele bena bali 135,000. Na lyo line, Yehova aebele Gideone ati: ‘Abaume ba kulwa ubu bulwi bafula.’ Cinshi Yehova alandile ifyo?

Ni co pa numa ya kucimfya ubulwi, abena Israele nga bamwene kwati bacimfishe fye abene beka, te Yehova abafwile. E ico Yehova aebele Gideone ati: ‘Eba abaume bonse abali no mwenso ukubwelela ku mayanda.’ Ilyo Gideone alandile ifyo, abaume 22,000 balibwelele ku mayanda. Ashele fye na baume 10,000 aba kuya mu kulwa na bashilika 135,000.

Yehova aebele Gideone ati: ‘Umfwa kuno! Abaume bacili nabafula.’ Lyena aebele Gideone ukweba abaume ukunwa amenshi. Bonse abalefisha ifinso pa menshi pa kunwa, balingile ukubwelela ku ng’anda. Yehova alaile ukuti: ‘Nkalenga abaume 300 abalemona ifilecitika ilyo balenwa amenshi bakacimfye abalwani.’

Ilyo inshita ya kuya mu kulwa yafikile, Gideone ayakenye abaume ba bulwi 300 mu mabumba yatatu. Ubushiku sana, bonse balilongene no kushinguluka inkambi ya bashilika abo baile mu kulwisha. Bonse capamo balishishe amapenga bakwete no kutoba imitondo e lyo bapunda ati: ‘Ulupanga lwa kwa Yehova no lwa kwa Gideone!’ Ilyo abalwani babo babuukile, tabaishibe icalecitika, kabili balitiinine. Bonse batendeke ukubutuka, na bena Israele balicimfishe muli ilya inkondo.