IMYAKA yaileilepita fye. Palipitile imyaka 10, 20, 30 yasuka yafika na 39, abena Israele bacili fye mu matololo! Lelo muli iyi imyaka yonse, Yehova alebasakamana. Alebaliisha mana. Akasuba alebatungulula ne kumbi, e lyo ubushiku alebatungulula no mulilo uwalebasanikila. Mu myaka yonse iyi, ifya kufwala fyabo tafyaleonaika na makasa yabo tayalekalipa.

Mu mweshi wa kubalilapo mu mwaka walenga 40 ukutula apo bafumine mu Egupti, abena Israele baileikala mu Kadeshi. Umu mwine e mo bali ilyo inengu 12 shailelengula icalo ca Kanaani. Apa ninshi palipita ne myaka 40. Miriamu nkashi ya kwa Mose afwilile mu Kadeshi mwine. Na kabili apa palimine ubwafya.

Abantu tabakwete amenshi. E ico batendeke ukuilishanya kuli Mose abati: ‘Kanshi nga twalifwile fye. Cinshi watufumishe mu Egupti no kutuleta muli cino cifulo icibi umushimena icili conse? Tamwaba ifya kulya nangu ifisabo pamo imikunyu, imyangashi, nelyo amapomagranate. Na menshi ya kunwa nayo tamwaba.’

Ilyo Mose na Aarone baile mu cikuulwa ca kupepelamo ku kupepa, Yehova aebele Mose ati: ‘Longanya abantu. Nga balongana ulande ne cilibwe cilya icili palya, ninshi balemonako. Mwalafuma amenshi ayengi aya kuti abantu bonse ne nama shabo banwe.’

Awe Mose alongenye abantu no kubeba ati: ‘Umfweni mwe bantu imwe mwe bashacetekela Lesa! Bushe mulefwaya ine na Aarone tumufumishe amenshi muli ici cilibwe?’ Lyena Mose abuulile inkonto yakwe no kuuma pa cilibwe imiku ibili, na mu cilibwe mwafumine amenshi ayengi sana. Na bantu bonse balikwete amenshi ya kunwa.

Lelo Yehova alikalipe pa co Mose na Aarone bacitile. Bushe nawishiba icalengele akalipe? Ni co Mose na Aarone batile, e bali no kufumya amenshi mu cilibwe. Lelo uwafumishe amenshi mu cilibwe, ni Yehova. E ico pa mulandu wa kuti Mose na Aarone tabalandile icishinka, Yehova abebele ati: ‘Tamwakengishe abantu bandi mu Kanaani.’

Papitile fye inshita inono abena Israele bafuma mu Kadeshi. Baendele fye panono bafika na pa Lupili lwa Hore. Apa pene pa mulu wa lupili, epo Aarone afwilile ninshi ali ne myaka 123. Abena Israele bali no bulanda sana kabili pa nshiku 30, baleloosha fye Aarone. Umwana wakwe Eleasari e waishileba shimapepo mukalamba uwa bena Israele.