ILYO papitile imyeshi ibili ukutula apo abena Israele bafumine mu Egupti, bafikile ku Lupili lwa Sinai ulo baleita no kuti Horebu. Pali ici cine cifulo e pali Mose ilyo Yehova alandile nankwe mu cimpusa calebilima. Abena Israele balikele pali ici cifulo pa nshita iitaliko.

Mose aninine ulupili e lyo abantu bashala balemulolela mu nshi ya lupili. Ilyo Mose afikile pa muulu wa lupili, Yehova amwebele ati, alefwaya abena Israele balemumfwila no kuba abantu bakwe abasalwa. Ilyo Mose atentemwike ulupili, aebele abena Israele ifyo Yehova alandile. Abantu balisumine ukuti bakulaumfwila Yehova, pantu balefwaya ukuba abantu bakwe.

Lyena Yehova acitile icipesha amano. Alengele pa muulu wa lupili pafuuka icushi no kubulukuta sana. Aebele na bantu ati: ‘Nine Yehova Lesa wenu, uwamufumishe mu Egupti.’ E lyo abapeele ifunde lya kuti: ‘Mwilapepa balesa bambi kano fye ine.’

Lesa apeele abena Israele amafunde na yambi 9. Abantu balitiinine icine cine. Baebele Mose ati: ‘Tulefwaya iwe ulelanda na ifwe, pantu tuletiina ukuti Lesa nga alanda na ifwe kuti twafwa.’

Pa numa, Yehova aebele Mose ati: ‘Nina ulupili no kwisa kuli ine. Nalakupeela amabwe yabili ayapaapaatala apo nembele amafunde ayo ndefwaya abantu bandi ukulakonka.’ E ico Mose aninine ulupili kabili aikele palya inshiku 40, akasuba no bushiku.

Lesa alipeele abantu bakwe amafunde ayengi sana. Mose alilembele aya mafunde. Lesa apeele Mose na mabwe yabili ayapaapaatala. Pali aya mabwe, e po Lesa umwine alembele amafunde 10 ayo aebele abantu bonse. Aya mafunde yetwa ati Amafunde Ikumi.

Amafunde Ikumi yalicindama sana. Lelo na mafunde yambi ayo Lesa apeele abena Israele nayo yalicindama. Ifunde limo pali aya litila: “Muletemwa Yehova Lesa wenu no mutima wenu onse, no mweo wenu onse, na maka yenu yonse.” Ne funde limbi litila: “Uletemwa umunobe nge fyo waitemwa we mwine.” Yesu Kristu, umwana wa kwa Lesa atile, aya e mafunde yabili ayakalamba ayo Yehova apeele abena Israele. Tuli no kusambilila ifintu ifingi pa Mwana wa kwa Lesa ne fyo alesambilisha.