MONA ifilecitika pa cikope. Umusumba wa Yerusalem ulepya! Abena Israele abo bashaipeye, balebasenda mu busha ukubatwala ku Babiloni. Apa ninshi palipita imyaka 10 ukutula apo Imfumu Nebukadnesari yasendeele abena Israele abali abasambilila sana no kubatwala ku Babiloni.

Nga uleibukisha, ifi fine e fyo kasesema wa kwa Yehova alandile ukuti fikacitika nga tabalekele ukucita ifyabipa. Lelo abena Israele tabaumfwile ifyo bakasesema balandile. Batwalilile fye ukupepa tulesa twa bufi, tabalepepa Yehova. Kanshi abena Israele balingile ukukandwa. Ico twalandila ifi, ni co kasesema wa kwa Lesa Esekiele alitweba ifyabipa ifyo abena Israele balecita.

Bushe walimwishiba Esekiele? Ali pa baume abo Imfumu Nebukadnesari yasendele ku Babiloni ninshi kushele imyaka ukucila pali 10 ukuti umusumba wa Yerusalemu wonaulwe. Daniele na banankwe batatu, Shadraki, Meshaki, na Abednego nabo babasendele ku Babiloni pa nshita imo ine.

Yehova alangile Esekiele ifintu ifyabipa ifyalecitika pe tempele, mu Yerusalemu. Esekiele ali mu Babiloni ilyo Yehova amulangile ifi fintu. Ico Yehova acitile cali cipesha mano. Nangu ca kuti Esekiele ali mu Babiloni, Yehova alengele amona fyonse ifyalecitika pe tempele. Kabili ifyo Esekiele amwene fyalimupapwishe sana!

Yehova aebele Esekiele ati: ‘Mona ifya bunani ifyo abantu balecita pe tempele. Ku fibumba balilengako ifikope fya nsoka ne nama shimbi. Kabili abena Israele balepepa ifi fintu.’ Esekiele alimwene fyonse ifyalecitika no kufilemba.

Yehova aipwishe Esekiele ati: ‘Bushe naumona ifyo intungulushi sha bena Israele shilecita ninshi nashifisama?’ Na fyo fine alifimwene. Mwali abaume 70 kabili bonse balepepa balesa ba bufi. Balelanda abati: ‘Yehova tatumona. Alisha icalo.’

Lyena Yehova alangile Esekiele abanakashi abali pa mwinshi we tempele uwali ku kapinda ka ku kuso. Aba abanakashi balepepa Tamusi, lesa wa bufi. Amwebele no kulolesha abaume abali pa mwinshi we tempele lya kwa Yehova abali nalimo 25. Esekiele alibamwene. Bakontamine ku kabanga kabili balepepa akasuba!

Yehova atile: ‘Aba bantu tabancindika. Balacita ifyabipa kabili baficitila mwi tempele lyandi mwine!’ E ico Yehova atile: ‘Nkabemina mu bukali. Kabili nshakabomfwile uluse ilyo nkabonaula.’

Abena Israele balipondokele Imfumu Nebukadnesari ilyo papitile fye imyaka itatu ukutula apo Yehova alangile Esekiele ifi fintu. E ico Nebukadnesari aile mu kubalwisha. Pa numa ya mwaka umo na hafu, abena Babiloni baingile mu Yerusalemu no koca umusumba mpaka waonaika. Abantu abengi balibepeye nelyo ukubasenda mu busha ku Babiloni.

Cinshi Yehova alekele icintu icabipa ifi ukucitikila abena Israele? Ni co tabalemumfwila kabili tabalekonka amafunde yakwe. Ici cilanga fye ukuti calicindama ukucita ifyo Lesa atweba.

Pa kubala, balisuminishe abantu abanono ukwikala mu Israele. Kabili Imfumu Nebukadnesari yaebele Gedalia, umuYuda ukulabatungulula. Lelo Gedalia balimwipeye ku bena Israele bamo. E calengele abantu ukutiina ukuti abena Babiloni bakayabepaya bonse pa mulandu wa cintu icabipa ico bacitile. E ico bapatikishe Yeremia ukuya nabo no kubutukila ku Egupti.

Ilyo babutwike, mu Israele tamwashele umuntu nangu umo. Kabili tamwaikele abantu pa myaka 70. Lelo Yehova alaile ukuti akabwekesha abantu bakwe mu calo ca Israele pa numa ya myaka 70. Nomba cinshi calecitika ku bantu ba kwa Lesa mu calo ca Babiloni umo babasendele? Natumone.