SOLOMONE ali umulumendo ilyo atendeka ukuteka. Alitemenwe Yehova, kabili alecita fyonse ifyo Davidi, wishi amwebele. Yehova alitemenwe sana Solomone. E ico bushiku bumo amwebele mu ciloto ati: ‘Solomone, cinshi wingatemwa ukuti nkupeele?’

Solomone ayaswike ati: ‘Mwe Yehova Lesa wandi, ndi mwaice sana kabili nshaishiba ifya kuteka. Mpeeleni amano pa kuti ndeteka abantu benu bwino.’

Yehova alitemenwe pa fyo Solomone alombele. E co atile: ‘Apo walomba amano, taulombele ifyuma nelyo ukwikala inshiku ishingi, nkakupeela amano ayengi ica kuti ukacila abantu bonse. Kabili nkakupeela ne fyuma ifyo taulombele, na bantu bakakucindika.’

Papitile fye inshita iinono, abanakashi babili abakwete ubwafya baile kuli Solomone. Batendeke ukutalikana. Umo umwanakashi atile: ‘Uyu umwanakashi na ine twikala mu ng’anda imo. Nafyele umwana umwaume, na pa numa fye ya nshiku shibili, uyu umwanakashi na o afyele umwaume. Nomba bushiku bumo, umwana wakwe alifwile. Lelo ilyo nali mu tulo, abikile umwana wakwe uwafwa apo naleele e lyo asenda umwana wandi. Nomba ilyo nashibwike, naloleshe umwana uwafwile no kusanga ukuti te mwana wandi.’

Lelo umwanakashi umbi atile: ‘Awe! Umwana umutuntulu wandi, uufwile e mwana wakwe!’ Uwabalilepo ukulanda atile: ‘Awe! Umwana uufwile obe, umutuntulu e mwana wandi!’ Bushe Solomone acitile shani?

Solomone aebele uwa kuleeta ulupanga, kabili ilyo aletele, atile: ‘Akanya umwana umutuntulu pa kati pa kuti aba banakashi babili bakane.’

Umwine wa mwana umutuntulu apundile ati: ‘Awe! Napaapaata mwi-ipaya umwana. Peeleni uyu umwanakashi!’ Lelo ulya umwanakashi atile: ‘Mwipeelapo nangu umo pali ifwe, mwakanyeni fye pa kati.’

Na mu kulelekelesha Solomone atile: ‘Mwi-ipaya umwana! Peeleni uyu umbi umwanakashi, e nyina.’ Solomone alishibe nyina wa mwana pantu nyina uwa cine alitemenwe sana umwana ica kuti alefwaya no kumupeela ku mwanakashi umbi ukucila ukuti bamwipaye. Ilyo abantu baumfwile ifyo Solomone apwishishe ubwafya, balitemenwe sana pantu imfumu yabo yali iya mano.

Ilyo Solomone aleteka, Lesa alipaalile abantu. Alengele umushili wakwata umufundo sana ica kuti ing’ano, barle, imyangashi ne mikunyu e lyo ne fya kulya fimbi ifingi fyalimenene. Abantu balefwala ifya kufwala ifisuma kabili baleikala mu mayanda ayasuma. Balikwete ifintu ifisuma ifingi.