YESU alemoneka uwakalipa sana, bushe te ifyo? Bushe nawishiba ico akalipile? Ni co abaume abali pe tempele lya kwa Lesa mu Yerusalemu ni ncenjeshi. Baleliila abantu indalama abele mu kupepa Lesa.

Bushe nautumona utu utwana twa ng’ombe, impaanga ne nkunda? Aba bantu baleshitisha ishi inama palya pene pe tempele. Bushe nawishiba ico balecitila ifi? Ni co abena Israele balefwaya sana inama ne fyuni ifya kupeela ilambo kuli Lesa.

Ifunde lya kwa Lesa lyatile umwina Israele nga acita icabipa, alingile ukupeela ilambo kuli Lesa. E lyo inshita shimo, abena Israele balingile ukupeela Lesa ilambo nangu tabalufyenye. Lelo bushe umwina Israele ali no kusanga kwi ifyuni ne nama ifya kupeela kuli Lesa?

Abena Israele bamo balitekele ifyuni ne nama. E ico ifi fiine e fyo balepeela kuli Lesa. Lelo abena Israele abengi tabakwete inama nelyo ifyuni. E lyo bambi baleikala ukutali sana na ku Yerusalemu, e ico tabalesenda inama shabo kwi tempele. Kanshi aba bantu baleshita inama balefwaya palya pene pe tempele. Lelo aba baume baleshitisha inama pa mutengo uukalamba sana. Baleliila abantu. E lyo tabalingile ukulashitisha inama mwi tempele lya kwa Lesa.

Ici calengele Yesu ukufulwa sana. E co apenwinine amatebulo yabo yonse no kuposaika indalama. Kabili apangile ica kufopwelako ica ntambo, no kutamfya inama shonse ishali mwi tempele. Lyena aebele abaume abaleshitisha inkunda ati: ‘Fumyeni ifi muno! Mwilacita ing’anda ya kwa Tata nge ng’anda ya makwebo.’

Abasambi ba kwa Yesu bamo bali nankwe pe tempele ku Yerusalemu. Balipapile pa kumona ifyo Yesu acitile. Lyena baibukishe ifyalembwa mu Baibolo pa Mwana wa kwa Lesa ati: ‘Akatemwisha ing’anda ya kwa Lesa.’

Ilyo Yesu ali mu Yerusalemu ku ca Kucilila, alicitile ifipesha mano ifingi. Lyena Yesu afumine mu Yudea no kubwelela ku Galili. Lelo ilyo aleya, apitile mu citungu ca Samaria. Natumone icacitike ilyo ali kulya.