MONA uyu umwaice uulelanda na bakalamba aba. Aba bali ni bakasambilisha mwi tempele lya kwa Lesa mu Yerusalemu. Uyu umwaice ni Yesu. Apa ninshi nakulako. Ali ne myaka 12.

Bakasambilisha balipapile sana ukuti Yesu alishibe ifingi pali Lesa na pa fya mu Baibolo. Lelo cinshi calengele Yesu ukuba eka mwi tempele? Inga Yosefe na Maria bali kwi? Natumone.

Cila mwaka, Yosefe aleya no lupwa lwakwe ku kusefya ica Kucilila ku Yerusalemu. Ica Kucilila calicindeme sana. Ukufuma ku Nasarete ukuya ku Yerusalemu paali apatali. Ilya nshita takwali uwakwete motoka e lyo takwali na mashitima. Abengi bale-enda fye na makasa, kabili bale-enda inshiku shitatu ukuya ku Yerusalemu.

Apa Yosefe ninshi alikwata ulupwa ulukalamba ulo alesunga. Yesu alikwete abaice bakwe, abaume na banakashi. Pali iyi nshita Yosefe na Maria ninshi balebwelelamo ku Nasarete ukufuma ku Yerusalemu uko baile ku ca kucilila. Bamwene kwati Yesu ali pa bantu abale-endela pamo nabo pa kubwelelamo. Lelo ilyo bafikile apo baletuushisha ubushiku, bamwene fye Yesu talemoneka. Batendeke ukumufwaya muli ba lupwa ne fibusa, lelo tabamusangile! E ico balibwelelemo ku Yerusalemu ku kumufwaya.

Ilyo bafikile, basangile Yesu ali na bakasambilisha. Aleumfwa ku fyo balesambilisha kabili alebepusha ifipusho. Abantu bonse balipapile pa mano Yesu akwete. Lelo Maria atile: ‘We mwana, cinshi watucushisha ifi? Bawiso na ine natucula ukukufwaya.’

Yesu abaswike ati: ‘Cinshi mwacilamfwaila? Bushe tamwaishiba ukuti mfwile ukuba mu ng’anda ya kwa Tata?’

Yesu alitemenwe ukuba uko alesambilila pali Lesa. Na ifwe tufwile ukutemwa ukuba uko tusambilila pali Lesa. Ku Nasarete, Yesu aleya mu kulongana cila mulungu. Yesu alebika sana amano ku fyo balesambilisha, e calengele ukuti eshibe ifingi ifya mu Baibolo. Kanshi tulingile ukucita ifyo Yesu alecita.