UMWAUME uufukeme apa ni Stefani. Musambi wa kwa Yesu uwakosa. Nomba mona icilecitika kuli ena! Abaume balemupoola ifimabwe. Cinshi bamupaatile ica kuti balamupoola na mabwe? Natumone.

Lesa aleafwa sana Stefani ukucita ifipesha amano. Aba abaume tabatemenwe. E ico batendeke ukumutaalika pa cine ico alesambilisha abantu. Lelo Lesa alipeele sana Stefani amano, na Stefani alilangile ukuti balya bantu balesambilisha ifya bufi. Ici calengele bafulwe sana. E ico balimwikete no kwita abantu ukuti bamubepeshe ubufi.

Shimapepo mukalamba aipwishe Stefani ati: ‘Bushe ifyo aba balelanda fya cine?’ Pa kwasuka, Stefani alandile ilyashi ilisuma ilya mu Baibolo. Pa kupwisha ilyashi, alandile pa fyo abantu babipa bapatile bakasesema ba kwa Yehova ku kale. Lyena atile: ‘Na imwe bene e fyo mwaba. Mwaipeye Yesu, umubomfi wa kwa Lesa, kabili tamumfwila na mafunde ya kwa Lesa.’

Ici calengele balya bashimapepo ukufulwa sana! Basumenye ameno ku bukali. Lelo Stefani aloleshe mu muulu, no kusosa ati: ‘Moneni! Ndemona Yesu naiminina mu muulu, ali ku kwa kulyo ukwa kwa Lesa.’ Ilyo asosele ifi abaume baisele amatwi no kuyaikata Stefani bwangu bwangu no kumufumisha ku nse ya musumba.

Bafuulile amalaya yabo no kupeela Shauli ukuti ayasunge. Bushe naumumona Shauli apa? Lyena abaume bamo batendeke ukupoola Stefani amabwe. Stefani alifukeme nga fintu ulemona pa cikope no kupepa kuli Lesa ukuti: ‘Mwe Yehova mwibakanda pa fibi ifyo bacita kuli ine.’ Alishibe ukuti bamo bababepele fye kuli bashimapepo. Na pa numa, Stefani alifwile.

Umuntu nga acita icintu icibi kuli iwe, bushe na iwe ulacita icibi kuli ena nelyo ufwaya ukuti Lesa eo akamukande? Stefani na Yesu te fyo bacitile. Balecita ifisuma na kuli balya abalecita ifyabipa kuli bena. Tufwile ukulabapashanya.