ULUBALI 3
Ukufulilwa Abatukalifye—Nga ca Kuti Natukwata Ifya “Kuilishanya”
“Nkashi uo tulongana nankwe alimbepeshe ukuti nalimwibiile indalama. Ilyo bambi mu cilonganino baumfwile ili lyashi, balisumiine ifyo uyu nkashi alebeba. Mu kuya kwa nshita, uyu nkashi anjebele ukuti te ine naibile shilya ndalama. Nangu ca kuti alilombele ubwelelo, umutima wena walekaana ukuti te kuti imweleele.”—Ba Linda.
BUSHE na imwe balimukalifyapo ku wa mu cilonganino nga filya cali kuli ba Linda? Ku ca bulanda, bamo nga babakalifya, balafilwa ukubombela Yehova bwino. Bushe na imwe ifya musango uyu fyalimucitikilapo?
Bushe Pali ‘Uwingatupaatulako ku Kutemwa kwa kwa Lesa’?
Ukulanda fye icishinka, nga ca kuti munyinefwe atukalifya, cilaafya ukumweleela, lelo Abena Kristu bafwile ukutemwana. (Yohane 13:34, 35) Nga ca kuti munyinefwe e watukalifya, kulaba ukumfwa ububi sana.—Amalumbo 55:12.
Baibolo ilanda ukuti kulaba inshita shimo ilyo Abena Kristu baba ‘ne fya kuilishanya’ kuli bamunyinabo. (Abena Kolose 3:13) Na lyo line, bamunyinefwe nga batukalifya, nalimo kuti catwafya sana ukubeleela. Bushe kwaliba ifingatwafwa pa kuti tuleelela abanensu? Natulande pa fintu fitatu ifyo Baibolo yalandapo:
Shifwe wa ku muulu alamona fyonse. Yehova alamona fyonse ificitika, kumo ne fyo bambi batufyenga e lyo na mafya tukwata nga batufyenga. (AbaHebere 4:13) Na lyo line, Yehova alomfwa ububi nga tulecula. (Esaya 63:9) Yehova taleka ‘ubucushi nelyo ubulanda’ nangu icintu conse, ukubikako fye na babomfi bakwe, “ukutupaatulako ku kutemwa kwa kwa Lesa.” (Abena Roma 8:35, 38, 39) Ifi fine e fyo na ifwe tufwile ukuba. Tatufwile ukuleka icintu nangu cimo nelyo uuli onse atupaatule kuli Yehova.
Ukweleela tacipilibula ukuti tuletekelesha ifyabipa. Ukweleela abatulufyenye tacipilibula ukuti ninshi tulecefya icilubo bacitile, nangu ukuti tulefwaya cimoneke kwati ifyo bacitile fili fye bwino, nelyo tuletekelesha ifyo bacitile. Muleibukisha ukuti Yehova tafwaya abantu ukulabembuka, lelo aleleela umuntu nga nalapila. (Amalumbo 103:12, 13; Habakuki 1:13) Kanshi nga tuleelela abanensu ninshi tulepashanya Yehova pantu “takalifiwa umuyayaya.”—Amalumbo 103:9; Mateo 6:14.
Ifintu filatuwamina nga ca kuti tatulesunga icintu ku mukoshi. Fituwamina shani? Natulangilile. Elenganyeni ukuti mwaimya ilibwe ilifinine fye amakilogramu ayanono. Nga ca kuti mwaimya fye ilyo ilibwe pa nshita iinono te kuti munake. Lelo kuti caba shani nga ca kuti namuliimya pa nshita iitali? Ukwabula no kutwishika, ukuboko kuti kwanaka kabili kuti lyaumfwika ukufina. Ifi fine e fyo caba nga ca kuti umuntu alesunga icintu ku mukoshi. Nga tulesunga icintu ku mukoshi pa nshita iitali na pa tuntu fye utunono, ninshi nifwe tukaculilamo. E co Yehova atwebela ukuti tatufwile ukulasunga icintu ku mukoshi. Ukukanasunga icintu ku mukoshi kulalenga twaba no bumi ubusuma.—Amapinda 11:17.
Ifintu filatuwamina nga ca kuti tatulesunga icintu ku mukoshi
“Naumfwile Kwati Yehova e Walelanda na Ine”
Cinshi calengele ukuti ba Linda besunga icintu ku mukoshi pa fyo nkashi abababepeshe? Balitontonkenye pa Malembo ayalanda pa fyo cawamaina ukweleela. (Amalumbo 130:3, 4) Ba Linda balitemenwe ilyo baishibe ukuti nga tuleelela abanensu, ninshi Yehova na o akulatweleela. (Abena Efese 4:32–5:2) Balandile pa fyo baumfwile ilyo babelengele aya Amalembo batile: “Naumfwile kwati Yehova e walelanda na ine.”
Ilyo papitile inshita, ba Linda balilekele ukusunga icintu ku mukoshi. Balibeleele nkashi uluse uwababepeshe kabili uyu nkashi nomba ni cibusa wabo sana. Ba Linda balitwalilila ukubombela Yehova. Mulingile ukwishiba ukuti Yehova afwaya ukuti muleelela no kukanasunga icintu ku mukoshi.
