Lesa alengele abafyelwe muli Abrahamu ukuba uluko kabili abapeele na mafunde. Abapeele ishina lya kuti “Israele” kabili e balepepa Lesa ukulingana ne fyo afwaya kabili e balekonka ifyo icebo cakwe cilanda. (Amalumbo 147:19, 20) E ico, abantu ba mu nko shonse bali no kupaalilwa mu bena Israele.—Belengeni Ukutendeka 22:18.

Lesa asalile abena Israele ukuba inte shakwe. Nga twabelenga ifyo abena Israele baleikala, e lyo tumona ubusuma bwaba mu kumfwila amafunde ya kwa Lesa. (Amalango 4:6) Kanshi, abantu bambi nabo bali no kwishiba Lesa wa cine ukupitila mu bena Israele.—Belengeni Esaya 43:10, 12.

Umuye nshiku, Yehova alekele ukutungulula abena Israele kabili apyanikepo icilonganino ca Bena Kristu. (Mateo 21:43; 23:37, 38) Kanshi, Abena Kristu ba cine pali nomba, e nte sha kwa Yehova.—Belengeni Imilimo 15:14, 17.

Yesu asalile abasambi bakwe pa kuti baleshimikila no kulenga abantu ba mu nko shonse ukuba abasambi. (Mateo 10:7, 11; 24:14; 28:19, 20) Muli shino nshiku sha kulekelesha, uyu mulimo e lyo ukosele. Muno nshiku, Yehova alilonganika abantu abengi nga nshi ukufuma mu nko shonse ukuti balemupepa. (Ukusokolola 7:9, 10) Abena Kristu ba cine bapanga icilonganino umo bakoseleshanya no kwafwana. Mu calo fye conse basambilila ifyebo fya mu Baibolo fimo fine mu filonganino baba.—Belengeni AbaHebere 10:24, 25.

Icilonganino ca muno nshiku ica Nte sha kwa Yehova catendeke mu ma 1870. Abasambi ba Baibolo abali fye impendwa iinono batendeke ukubelenga Baibolo kabili baishileishiba icine ico abantu bashaishibe pa nshita iitali. Baishilesanga ukuti umulandu Yesu apangiile icilonganino ca Bena Kristu, ni pa kuti baleshimikila. E ico batendeke ukushimikila pa Bufumu mu calo conse. Mu 1931 baipeele ishina lya kuti Inte sha kwa Yehova.—Belengeni Imilimo 1:8; 2:1, 4; 5:42.

Mu nshita ya batumwa, ibumba litungulula e lyaletungulula ifilonganino fya Bena Kristu ifyali mu fyalo ifyapusanapusana kabili lyalishibe ukuti Yesu e wali Umutwe wa cilonganino. (Imilimo 16:4, 5) Na muno nshiku, Ibumba Litungulula e litungulula ifilonganino ifya Nte sha kwa Yehova mu calo conse, kabili muli ili bumba mwaba baeluda abaishiba sana Icebo ca kwa Lesa. E balolekesha pa maofeshi ya Nte sha kwa Yehova ayabomba umulimo wa kupilibula, uwa kupulinta, no wa kusalanganya ifitabo fya kusambililamo Baibolo mu fitundu ukucila pali 600. Kanshi Ibumba Litungulula e lisambilisha no kutungulula ifilonganino ificilile pali 100,000 ukubomfya Baibolo. Mu cilonganino cimo na cimo, abaume bafikapo e babomba umulimo wa bueluda, nelyo uwa bukangalila. Aba baume e bacema umukuni wa kwa Lesa.—Belengeni 1 Petro 5:2, 3.

Inte sha kwa Yehova balabombela pamo mu kubila imbila nsuma no kulenga abantu ukuba abasambi. Tulashimikila ku ng’anda ne ng’anda nga filya fyalecita abatumwa. (Imilimo 20:20) Na kabili, tulasambilila Baibolo na bonse abalefwaya ukwishiba icine. Lelo fwe Nte sha kwa Yehova tatwaba nge filonganino fimbi. Twaba kwati ba ng’anda imo kabili twakwata Shifwe umo uwatutemwa. Tuli ba bwananyina kabili twalitemwana. (2 Abena Tesalonika 1:3) Apo abantu ba kwa Yehova babombela pamo mu kucindika Lesa no kwafwilishako bambi, balipanga ulupwa lwa nsansa pe sonde.—Belengeni Amalumbo 33:12; Imilimo 20:35.