Satana ne fibanda fyakwe bankalwe icine cine. Kale, Satana alipeye ifitekwa na babomfi ba kwa Yobo uwali ne cishinka. Lyena aipeye abana ba kwa Yobo 10 ukubomfya “umwela ukalamba” uwaonawile ing’anda iyo balimo. Pa numa, Satana “ailelwalika Yobo ifipute ifyabipisha ukutampila ku nyantilo ya lukasa lwakwe no kufika pa kati ka mutwe.”—Yobo 1:7-19; 2:7.

Ilyo Yesu aali pano calo, ifibanda fyalilengele abantu bamo ukuba bacibulu e lyo bambi ukupofula. (Mateo 9:32, 33; 12:22) Na kabili, fyalecusha umwaume umo kabili fyalemulenga ukulaitetaula na mabwe. (Marko 5:5) Ifibanda fyalelenga no mulumendo ukulapunda, fyalemuponya pa nshi no “kumufulansha nga nshi.”—Luka 9:42.

Na pali ino ine inshita, Satana ne fibanda fyakwe balitwalilila  ukwipaya abantu. Na kuba, ukutula apo babatamfisha ku muulu, balicila napo ukucita ifyabipa. Ificitika mu calo filanga fye ukuti balitwalilila ukucusha abantu. Balalenga bamo ukulwala. Bambi balabacusha ubushiku, balabafufya utulo nelyo ukubalenga baleloota ifilooto ifibi. Abantu bambi balabacenda ubushiku, bambi balabepaya e lyo bambi nabo balabapenya nelyo ukubalenga baikulika.

Ba Lintina abekala ku Suriname, balandile ukuti icibanda nelyo ici mupashi calebacusha sana pa myaka 18 kabili calipeye balupwa wabo 16. Ba Lintina baliimwena ukuti “ifibanda fyalitemwa sana ukucusha abantu mpaka fye bafwa.”

Na lyo line, Yehova alikwata amaka ya kucingilila ababomfi bakwe kuli Satana.—Amapinda 18:10.