Ifibumbwa fya mipashi fyonse ifyo Yehova apangile fyali ne cumfwila. Lyena malaika umo alipondweke. Uyu malaika, ni Satana Kaseebanya. Satana alefwaya abantu balemupepa mu nshita ya kulapepa Yehova. Ifi e fyacitike:

Mwi bala lya Edeni, mwali imiti iingi iyaletwala ifisabo ifisuma. Yehova aebele Adamu no mwina mwakwe Efa ukuti balelya kuli iyi imiti yonse. Na lyo line, kwali umuti umo uo Yehova abakeenye ukulyako. Abebele ukuti nga balya kuli uyu umuti, bakafwa.—Ukutendeka 2:9, 16, 17.

Bushiku bumo ilyo Efa ali eka, insoka yalilandile nankwe. Kwena te nsoka yalelanda nankwe, lelo Satana Kaseebanya ewalelandila mu nsoka. Satana aebele Efa ukuti nga alya icisabo ca ku muti uo babakenye ukulyako, akaba na mano kwati ni Lesa. Amwebele no kuti takafwe. Fyonse ifi fyali fya bufi. Ku ca bulanda, Efa alisumiine ifyo Satana amwebele kabili aliliile icisabo. Pa numa, alipeeleko Adamu na o aliliile.—Ukutendeka 3:1-6.

Kuli ili ilyashi lya cine tusambililako ukuti Satana ni cipondoka kabili wa bufi. Abepeele Efa ukuti nga akaana ukumfwila Lesa takafwe. Lelo Efa alifwile, kabili na Adamu wine alifwile. Satana ena taafwile pali ilya nshita, lelo akafwa pantu alibembwike.  Pali ino nshita, alitwalilila ukulufya abantu. Taleka ukubepa ubufi kabili alalenga abantu baletoba amafunde ya kwa Lesa.—Yohane 8:44.

Mu kuya kwa nshita, bamalaika na bambi balipondweke. Aba bamalaika bamwene abanakashi abayemba pa calo kabili balefwaya ukulaala nabo. E ico balishile pa calo no kufwala imibili ya baume. Lyena, balyupile abanakashi. Ukucita ifi kwali kutoba amafunde ya kwa Lesa.—Ukutendeka 6:1, 2; Yuda 6.

Ici calengele abantu balecula sana. Abanakashi abo aba bamalaika baupile bafyele abana amapaka. Aya amapaka yalitemenwe sana ukucita ubunkalwe. E ico mu kuya kwa nshita, pa calo pali sana ubunkalwe ica kuti Yehova apingwilepo ukonaula abantu ababipa ukubomfya ilyeshi ilikalamba. Abantu abapuswike fye ku Lyeshi ni Noa no lupwa lwakwe.—Ukutendeka 6:4, 11; 7:23.

Bamalaika babipa bena tabafwile kabili balibwelelemo ku cifulo ca mipashi. Na lyo line, Lesa tabalekelepo fye. Tabasuminishe ukubwelela mu lupwa lwakwe ulwa bamalaika ba cishinka. Na kabili, Yehova tabasuminishe ukulafwala imibili ya bantu, kabili mu kuya kwa nshita, bakafwa ilyo Lesa akaleta ubupingushi.—2 Petro 2:4; Yuda 6.

Mu kutendeka kwa myaka ya ba 1900, kwali inkondo ku muulu. Ibuuku lya mu Baibolo ilya Ukusokolola litila: “Awe kwabuukile inkondo mu muulu: Mikaele [Yesu Kristu] na bamalaika bakwe [aba cishinka] balwile ne cing’wena [Satana], icing’wena na bamalaika ba ciko [ababipa] na fyo fyalwile na bo lelo tafyacimfishe iyo, kabili tafyakwete apa kwikala ku muulu. E fyo icing’wena cikalamba capooselwe pa nshi, icisoka ca pa kutendeka, iciitwa Kaseebanya kabili Satana, icilufya aba pano isonde bonse; capooselwe pe sonde, na bamalaika ba ciko bapooselwe pamo na co.”

Finshi fyakonkelepo? Baibolo itila: “E ico, sansamukeni, mwe myulu na mwe baikalamo!” Bamalaika ba cishinka balisekelele pantu Satana na bamalaika babipa balibatamfishe ku muulu. Inga ku bantu pe sonde, cali no kuba shani? Baibolo itila: “Nomba cabipila imwe mwe sonde na bemba, pantu Satana Kaseebanya naikila pali imwe, ali ne cipyu icikalamba, pa kwishiba ukuti ali fye ne nshita inono.”—Ukusokolola 12:7-9, 12.

Satana ne fibanda fyakwe balalufya abantu kabili balalenga abantu pa calo ukulacula. Aba bamalaika babipa babeta ukuti ifibanda. Aba bamalaika balwani ba kwa Lesa, kabili bonse fye babifi.