Ifwe bonse twalikwata insambu sha kusalapo uo twakulabombela, nampo nga ni Yehova nelyo ni Satana ne fibanda fyakwe. Te kuti tubombele bonse babili. Kuti cawama sana nga twasalapo ukulabombela Yehova.

Nga fintu tumwene mu fipandwa fifumineko, ifibanda fyalitemwa sana ukucusha abantu no kubabepa. Yehova ena te fyo aba. Alitemwa abantu kwati ni filya wishi atemwa abana bakwe. E upeela “ica bupe conse icisuma no bupe bonse ubwapwililika.” (Yakobo 1:17) Tapali ifisuma ifyo akaana ukupeela abantu bakwe, nangu ca kutila ukucita ifi kuti kwalenga aipusula.—Abena Efese 2:4-7.

Tontonkanyeni pa fintu ifyo Yesu Umwana wa kwa Lesa acitile ilyo ali pano calo. Alilengele bacibulu ukulanda, kabili alishibwile amenso ya mpofu. Alyundepe aba fibashi na balemana. Alifumishe ifibanda mu bantu kabili alyundepe amalwele ya musango onse. Na kabili, Yesu alibomfeshe amaka Lesa amupeele pa kubuusha abafwa.—Mateo  9:32-35; 15:30, 31; Luka 7:11-15.

Lesa tabepa, lelo lyonse alalanda icishinka. Tabala abepapo uuli onse.—Impendwa 23:19.

Nga filya tandabube ekata lunshi, ifibanda na fyo filekata abantu abengi mu fiteyo. Fyalilenga abengi ukulatiina abafwa ne fibanda, ukulasakamana ukutila kuti babatiipa nelyo ukubalowa. Kabili fyalilenga basumina mu ntambi sha kwa Satana na mu fisambilisho fyakwe ifya bufi. Tapali nangu cimo pali ifi ifiteyo umo ababomfi ba kwa Lesa bekatwa.

Yehova alikwata sana amaka ukucila Satana. E ico akalamucingilila ku fibanda nga mulemubombela. (Yakobo 4:7) Tapali nangu umo uwingamulowa. Ku ca kumwenako, ku Nigeria, ing’anga shitatu isha maka sana shalefwaya ukulowa Nte umo pa kuti shimwipaye ilyo akeene ukufuma mu musumba. Ilyo ubwanga bwafililwe ukubomba, ing’anga imo yalyumfwile umwenso kabili yaile kuli Nte no kulomba ubwelelo.

Nga ca kuti ifibanda fyaisa mu kumucusha, mufwile ukupepa kuli Yehova no kumulumbula mwi shina, kabili na o akamucingilila. (Amapinda 18:10) Nomba pa kuti Yehova alemucingilila, mufwile ukuleka ukubomfya icili conse ico babomfya pa kupupa imipashi nelyo ukupepa ifibanda. Ifi fine e fyo ababomfi ba kwa Lesa abaleikala  mu musumba wa kale uwa Efese bacitile. Balilonganike ifitabo fyonse ifyo balebomfya pa kumfwana ne fibanda no kufyoca. (Imilimo 19:19, 20) Ababomfi ba kwa Lesa muno nshiku nabo bafwile ukucita cimo cine. Kanshi mufwile ukupoosa fyonse ifyo mumfwaninamo ne fibanda pamo nga ubwanga, impinga nelyo ifyo bafwala pa kuicingilila, ifishimba, ifilubi, ifitabo umwaba ifya mipashi e lyo ne fintu fye fyonse ifyo mwingomfwaninamo ne fibanda.

Nga mulefwaya ukulenga Lesa ukuba ne nsansa, tamufwile fye ukufuma mu kupepa kwa bufi no kuleka ukucita ifyabipa. Mufwile ukukosa mu kupepa kwa cine. Baibolo yalitweba ifyo tufwile ukulacita:

Satana ne fibanda fyakwe balikwata abantu babo abacita no kusambilisha ifyabipa. Yehova na o wine alikwata abantu bakwe. Abantu bakwe ni Nte sha kwa Yehova. (Esaya 43:10) Mwi sonde lyonse balicila pali 8 milioni. Bonse balesha na maka yabo yonse ukulacita ifisuma no kulasambilisha abantu icine. Mu fyalo ifingi kuti mwabasanga pa Ng’anda ya Bufumu, kabili nga mwayapo, bakamupokelela ne nsansa.

Umulimo bakwata wa kwafwa abantu bambi ukulabombela Lesa. Bakalamusambilisha Baibolo pa ng’anda pa mwenu pa kuti mukeshibe ifyo mufwile ukulapepa Yehova. Tamufwile ukubalipila. Icilenga Inte sha kwa Yehova balesambilisha abantu icine ni co balibatemwa kabili balitemwa na Yehova Lesa.