Imipashi e ko yaba. Mu cifulo ca mipashi mwaliba imipashi yabipa e lyo ne iisuma. Bushe iyi imipashi bantu abaikelepo pa calo no kufwa?

Awe, te bantunse. Umuntu nga afwa, taya ku cifulo ca mipashi nga fintu abantu abengi batontonkanya. Twaishiba shani? Twalishiba pantu e fyo Baibolo ilanda. Baibolo citabo umwaba icine icafuma kuli Lesa wa cine eka, kabili ishina lyakwe ni Yehova. Yehova e wabumbile abantu, kanshi alishiba bwino ificitika nga bafwa.—Amalumbo 83:18; 2 Timote 3:16.

Baibolo itila Lesa abumbile umuntu wa kubalilapo Adamu “ku lukungu lwa mu mushili.” (Ukutendeka 2:7) Lesa amubikile mu Paradaise, ibala ilyali mu Edeni. Nga ca kuti Adamu alyumfwilile Lesa nga tafwile kabili nga epo aba na pali ino nshita. Nomba ilyo Adamu atobele ifunde lya kwa Lesa ku mufulo fye, Lesa amwebele ukuti: “Ukabwelela ku mushili, pantu e ko wafumine. Pantu uli lukungu, kabili ku lukungu e ko ukabwelela.”—Ukutendeka 3:19.

Bushe aya amashiwi yalola mwi? Bushe ni kwisa Adamu aali ilyo bashilamubumba ukufuma ku mushili? Tapali uko aali. Taaliko fye. E ico ilyo Yehova aebele Adamu ukuti ‘akabwelela ku mushili,’ aloseshe mu kuti aali no kufwa. Taile ku cifulo ca mipashi. Ilyo Adamu afwile, alilekele ukubako na kabili. Ukufwa kukanaba no mweo.

 Inga abantu bambi abafwa, bushe nabo balaleka ukubako? Baibolo itila:

• “Fyonse fibili [inama na bantu] fileya kumo kwine. Fyonse fibili fyafumine ku lukungu, na fyonse fibili fibwelela ku lukungu.”—Lukala Milandu 3:20.

• “Abafwa tabaishiba akantu nangu kamo.”—Lukala Milandu 9:5.

• “Ukutemwa kwabo no kupata kwabo no bufuba bwabo bafwila kumo na fyo.”—Lukala Milandu 9:6.

• “Ku Nshiishi, uko uleya takwaba umulimo wa kubomba nangu kwelenganya nangu kwishiba nangu mano.”—Lukala Milandu 9:10.

• “[Umuntu] abwelela ku mushili; Ubushiku bulya bwine amatontonkanyo yakwe yaloba.”—Amalumbo 146:4.

 Bushe nacimukosela ukusumina ifyo aya amalembo yalanda? Nga nacimukosela, tontonkanyeni pali ici: Ilingi line, umwaume e ufwaya indalama sha kubomfya mu lupwa. Nomba nga afwa, ulupwa lwakwe kuti lwatendeka ukucula. Limo abena mwakwe na bana bakwe te kuti balekwata indalama sha kushitamo ifya kulya kabili nalimo abalwani bakwe kuti balebacusha. Nomba yipusheni amuti: ‘Nga ca kuti uyu umwaume aba ku cifulo ca mipashi, cinshi ico ashitwalilila ukusakamana ulupwa lwakwe? Cinshi ashibacingilila ku balwani?’ Ni co ifyo Amalembo yalanda fya cine. Ulya muntu alifwa kabili te kuti acite nangu cimo.—Amalumbo 115:17.

Bushe ici calola mu kuti abafwa tabakatale ababa no mweo na kabili? Iyo. Tukalanda limbi pa kubuuka kwa bafwa. Lelo calola mu kuti abantu abafwa tabeshiba ifyo mulecita. Te kuti bamumone, bomfwe ifyo mulelanda, nelyo ukumweba ifili fyonse, kabili te kuti bamwaafwe nelyo ukucita ifyabipa kuli imwe. Kanshi tamufwile ukulabatiina.—Lukala Milandu 9:4; Esaya 26:14.