1. Cinshi tufwile ukucita pa kuti tutemune Lesa?

NGA tulefwaya ukuba ifibusa fisuma ifya kwa Lesa, tatufwile ukupepako ukupepa kwa bufi. Tufwile ukupepa ukupepa kwa cine. Muno nshiku abantu iminshipendwa mwi sonde lyonse balecite ifi fine.

2. Ni kwi Inte sha kwa Yehova bengasangwa, kabili mulimo nshi babomba?

² Nge fyo Baibolo yasobele, bakapepa ba cine bapanga “ibumba likalamba” ilyafuma “ku luko lonse ne mikowa ne misango ya bantu na bantu na ba ndimi.” (Ukusokolola 7:9) Mu fyalo 235, Inte sha kwa Yehova iminshipendwa balebombesha ukwafwa bambi ukusambilila inshila shisuma isha kwa Yehova ne fyo afwaya.

3. Nani Inte sha kwa Yehova bapepa, kabili kupepa kwa musango nshi bashipepa?

³ Inte shalishiba ukuti Yehova fye eka e walinga ukupepa. Balakaana ukushinshimuna utulubi nelyo ifipasho fya mipepele. (1 Yohane 5:21) Tabatiina abafwa pa kucesha pa malilo nelyo ukucitako intambi shimbi ishikoselesha ifisumino fya kupepa kwa bufi ne “fisambilisho fya fiwa.” (1 Timote 4:1) Lelo, balasansamusha abafwilwa pa kubalondolwela ubulayo bwa kwa Lesa ubwa kuti abafwa bakabuushiwa ku kwikala muli paradise pe sonde.—Yohane 5:28, 29; Imilimo 24:15.

4. Bushe abantu ba kwa Lesa bamona shani amalele?

⁴ BaNte tabacitako amalele no buloshi, pantu balishiba ukuti ifi fintu fyafuma kuli Kaseebanya. Tabacetekela mu malele ku kubacingilila—bena bacetekela Yehova.—Amapinda 18:10.

5. Ni mu nshila nshi Inte sha kwa Yehova bashabela “aba pano isonde”?

⁵ Yesu atile abasambi bakwe “tabali ba pano isonde.” (Yohane 17:16) Yesu umwine akeene ukuipoosa mu fikansa fya calo ilyo ali pano calo. (Yohane 6:15) BaNte na bo tabaipoosa mu fikansa fya calo, ukupupe calo, no kufwaisha ukulumbuka ifyaba muli cino calo. Lelo, balalipila imisonko no kuumfwila amafunde ya mu calo bekala.—Yohane 15:19; Abena Roma 13:1, 7.

6. Fishinte nshi ababomfi ba kwa Lesa bomfwila ukukuma ku cupo no kulekana?

⁶ Pa mulandu wa kuti balomfwila ifyo ubuteko busosa, baNte balashininkisha ukutila ifyupo fyabo fyalembeshiwa mwi funde. (Tito 3:1) Balomfwila ifyo Lesa asosa, e ico taboopa impali. (1 Timote 3:2) Kabili, apo ababomfi ba kwa Lesa balakonka ifishinte fya Baibolo mu mikalile yabo, te lingi ifyupo fyabo fipwa.

7. BaNte balanga shani ukuti balitemwana?

⁷ BaNte balitemwana. Uku kutemwana, pamo no kutemwa Lesa, kulabekatanya mu bwananyina bwa cine cine, nangu ca kuti bafuma mu mikowa iingi ne nko. Ilyo kwacitika akayofi nelyo mu nshita sha mafya, baNte balangufyanya ukwafwana. BaNte balanga ukutemwa mu mikalile yabo.—Yohane 13:35.

8. Fintu nshi ifyabipa ifyo abantu ba kwa Lesa bashicita?

⁸ Abantu ba kwa Yehova balabombesha ukuba abafumacumi kabili abatambalala mu mikalile yabo. Tabeba, ukubepa, ukucita bucisenene, ukukolwa, no kucita amakwebo ya bufumfuntungu. Abalume tabapuma abakashi babo. Ilyo bashilaba Inte, bamo balecita ifi fintu, lelo balileka pa kwafwiwa na Yehova. Kuli Lesa ‘balisambilwe.’—1 Abena Korinti 6:9-11.

9. Cinshi icitabo cimo cilanda pa macalici ya mu Afrika ayetwa aya bumupashi?

⁹ Kwena, imipepele iingi itunga ukuti yalikwata icine. Nalimo kuti balanda  pa milimo isuma bacita ku kulanga ukuti ifyo batunga fya cine. Ku ca kumwenako, ukukuma ku macalici yetwa aya bumupashi mu Afrika, icitabo cimo citila: “Umulimo walebombwa na ba malele nelyo ing’anga nomba ubombwa sana na [mabumba yapya aya Bena Kristu]. . . . Batunga ukuti balasobela ifya ku ntanshi no kucita ifipesha amano. Bakasesema babo balamona ifimonwa no kwilula ifiloto. Babomfya amenshi yatakatifu, amafuta yashila, imito, kandulo, ne cushi ce fungo ku kuposha no kucingilila amalwele.”

10, 11. Mulandu nshi ifyo abantu beta ati ifipesha amano muno nshiku fishilangila ukuti imipepele yafuma kuli Lesa?

¹⁰ Ababa muli iyi mipepele batunga ukuti ifipesha mano filanga ukuti imipepele yabo yalipaalwa na Lesa. Lelo ifyo abene beta ati ifipesha amano tafilanga ukuti imipepele ilasenaminwa na Yehova. Satana alapeela amaka kuli bakapepa ba bufi bamo aya kucita “ifya maka.” (2 Abena Tesalonika 2:9, NW) Kabili, Baibolo yasobele ukuti amaka ya kucita ifipesha amano ukufuma kuli Lesa, pamo ngo kusesema, ukulandila mu ndimi, no kwishiba kwaibela, ‘yakafubalishiwa.’—1 Abena Korinti 13:8.

¹¹ Yesu asokele ati: “Te onse uutila kuli ine, Shikulu, Shikulu, akengila mu bufumu bwa mu muulu iyo; kano uucite cifwaya Tata wa mu muulu. Abengi muli bulya bushiku bakatila kuli ine, Mwe Shikulu, mwe Shikulu, bushe tatwasesemene mwi shina lyenu? bushe tatwafumishe ifiwa mwi shina lyenu? bushe tatwacitile ifya maka ifingi mwi shina lyenu? Kabili e lyo nkasosa kuli bene, nkatila, Nshamwishiba nakalya; fumeni apa, mwe bacita amampuulu.”—Mateo 7:21-23.

12. Ni bani bakengila mu Bufumu bwa mu muulu?

¹² Kanshi ni bani bakengila mu Bufumu bwa mu muulu? Ni balya abacita ukufwaya kwa kwa Yehova.

13. Mulimo nshi Lesa aeba abantu bakwe ukubomba lelo, kabili ni bani baleubomba?

¹³ Cinshi Lesa afwaya abantu bakwe ukucita lelo? Yesu atile: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse.” (Mateo 24:14) Uyu e mulimo Inte sha kwa Yehova balebomba no kupimpa.

14. Ubufumu bwa kwa Lesa cinshi, kabili ni bani bakateka muli ubu Bufumu?

¹⁴ Mu “fyalo fyonse,” Inte sha kwa Yehova balabila Ubufumu bwa kwa Lesa ukuti buteko bwa mu muulu ubukateka isonde lyonse mu bulungami. Basambilisha ukuti Yehova alisonta Kristu Yesu ukuba Imfumu ya ubo Bufumu, pamo na bakateka bambi ababa 144,000 abasalwa pa bantunse.—Daniele 7:14, 18; Ukusokolola 14:1, 4.

15. Cinshi Ubufumu bukonaula?

¹⁵ BaNte babomfya Baibolo ku kulanga abantu ukuti Ubufumu bwa kwa Lesa bukonaula ubwikashi bonse ubwa kwa Satana. Ukupepa kwa bufi pamo ne fisambilisho fya kuko ifisaalula Lesa kabili ificindika Kaseebanya fikonaulwa! (Ukusokolola 18:8) Kabili fimbi ifikonaulwa mabuteko yonse aya bantunse, ayakaanya Lesa!—Daniele 2:44.

16. Ni bani bakaba abatekwa ba kwa Kristu Yesu, kabili bakekala kwi?

¹⁶ Kabili, Inte sha kwa Yehova balasambilisha ukuti Kristu Yesu, akaleta amapaalo yawamisha kuli bonse abacita ukufwaya kwa kwa Lesa. Bakaba abatekwa bakwe pe sonde. Baibolo ilaya ati: “Ipokololo mubusu uwakuuta, no mulanda, no ushikwete wa kumwafwa; ilililo bulanda umulanda no mubusu, ne myeo ya babusu ilapususha.”—Amalumbo 72:12, 13.

17. Ni bani fye beka abaleshimikila pa Bufumu bwa kwa Lesa?

¹⁷ Takwaba abantu bambi abacita ukufwaya kwa kwa Lesa ukupitila mu kushimikila imbila nsuma ya Bufumu. Inte sha kwa Yehova epela e baleishibisha Ubufumu bwa kwa Lesa mwi sonde lyonse.