1. Cinshi cikacitika nga ‘twapalama kuli Lesa’?

YEHOVA alitemwa abantu abamubombela. Nga mulepepa Yehova, akamupaala nomba na ku ntanshi. Baibolo itila: “Palameni kuli Lesa, na o alapalama kuli imwe.”—Yakobo 4:8.

2. Bushe kuti twapalama shani kuli Lesa, kabili ici cikalenga amapepo yesu ukuba aya musango nshi?

² Pa kupalama kuli Lesa, mufwile ukusambilila no kubaka Icebo cakwe. Nga mwapepa umwabela ukufwaya kwakwe, Yehova akomfwa amapepo yenu no kwasuka. Umutumwa wa Bwina Kristu Yohane alembele ati: “Uku e kupama tuli na ko kuli [Lesa], ukwa kuti nga twalomba akantu akalingene no kufwaya kwakwe atuumfwa; kabili nga twaishiba ukuti atuumfwa ico conse tulomba, twaishibo kuti tuli ne fintu ifyo twalomba kuli wene.”—1 Yohane 5:14, 15.

3-7. Kuti twacita shani pa kuba na mano ya bukapepa, kabili kuti yatwaafwa shani?

³ Kabili, ilyo mwapalama kuli Lesa, akamupeela amano ya kwishiba ifya kucita ne fimucitikila cila bushiku. Baibolo itila: “Nga umo uwa muli imwe abulwa amano, alombe kuli Lesa.”—Yakobo 1:5.

⁴ Bushe amano yafuma kuli Lesa kuti yamwaafwa shani? Kuti yamwaafwa ukwishiba ifintu ififulwisha Yehova. Kuti mwaishiba no mulandu ifi fintu fyabipila ne fyo mwingacita ku kukanaficita. Ukwishiba kwa musango yu kuti kwamucingilila ku mafya ayengi ayaponena abantu. Ukulangilila, ukumfwila ifunde lya kwa Lesa ilya kuba aba musangwela kulaafwa ukucingilila abantu ba kwa Lesa ku kupula amafumo, ku malwele yambukila mu bulalelale, ne fyupo fyabula insansa nelyo ifishaikatana.

⁵ Bushe finshi fimbi amano yafuma kuli Lesa yengamucitila? Kuti yamulenga ukumwenamo nga nshi mu bumi. Kuti yamwaafwa ukupingula bwino pa fintu, pamo nge fya kubomfya bwino indalama. Mukalakonkelela ifintu ifisuma no kukana ifintu ifishakwata ubucindami bubelelela.

⁶ Amano yafuma kuli Lesa kabili kuti yamwaafwa mu kwampana kwenu na bambi. Ulupwa lwenu kuti lwabelako ulwa nsansa. Kuti mwapanga ifibusa fya muyayaya kabili ifya cine cine, kabili abantu kuti bamucindika, nangu fye ni balya abashibombela Lesa.

⁷ Kabili ukuba na mano ya bukapepa kukamwaafwa ukumona bwino ubumi. Kukamwaafwa ukushipikisha amafya no kulengwa insoni ifyaba mu bumi. Kabili, mukaba abacetekela pa lwa ku ntanshi. Kabili uku kucetekela kukamwaafwa ukuba no muntontonkanya usuma no bumi busuma.—Amapinda 14:30; Esaya 48:17.

8. Nga mulebombela Lesa, finshi mushakatiine?

⁸ Nga mulebombela Lesa wa cine, tamwakaletiina filya abantu abashimubombela batiina. Apo mwalishiba ukuti  abafwa tababa abomi mu nshishi, tamwakaletiina abafwa. Apo mwalicetekela ubulayo bwa kwa Lesa ubwa kubuusha abafwa, tamwakatiine ukufwa. Kabili apo mwalishiba ukuti Lesa e wa maka yonse, tamwakatiine ubuloshi.—Yohane 8:32.

9-11. Ni bani bakekala muli Paradise, kabili ni bani bashakekalemo?

⁹ Nga mwapalama kuli Lesa, tamwakatiine ifyo cikaba ku ntanshi. Nge fyo tumwene, Baibolo yasobele amafya ayengi ayo tulemona pe sonde lelo. Yehova atweba ukuti ifi fintu fya nshita inono fye; Ubufumu bwa kwa Lesa bwalaswa bucite isonde paradise.—Luka 21:10, 11, 31; 23:43.

¹⁰ Abantu abapalamina kuli Yehova epela no kumubombela e bakekala mu Paradise. Baibolo itila: “Pashala panono, e lyo umubifi takabepo; awe ukalolesha apo ali, no kusanga tabapo. Lelo abalanda bakapyaninina icalo, no kuilemeno bwingi bwa mutende.”—Amalumbo 37:10, 11.

¹¹ Abakaana ukumfwila amafunde ya kwa Lesa ayalungama bakafwa umuyayaya. (2 Abena Tesalonika 1:8, 9) Tabakabeko na kabili. Bakafwila pamo na Satana ne fibanda fyakwe umuyayaya umuyayaya. (Ukusokolola 20:10, 14) Lelo abasambilila pali Yehova no kumubombela bakailemena ubwingi bwa mutende muli Paradise pe sonde.

12. Cinshi Baibolo ilanda pa fyo cikaba ku ntanshi?

¹² Yehova alikwatila abamutemwa ifintu ifisuma nga nshi! Moneni ifyo Icebo cakwe cilanda pa fyo ubwikalo bukaba mu Paradise pe sonde:

• Kukaba ifya kulya ifingi: “Mube ukupaka kwa ngano [nelyo, ifilyo] mu calo, na pa muulu wa mpili.”—Amalumbo 72:16.

• Amayanda yasuma: “Bakakuula amayanda no kwikalamo.”—Esaya 65:21.

• Umulimo usuma: “Imilimo ya minwe yabo abasalwa bandi bakasekelamo pa myaka iingi; tabakacucutikile ibusha.”—Esaya 65:22, 23.

• Takwakabe ukulwala: “Umwikashi wa mu calo takasose, ati, Nindwala.”—Esaya 33:24.

• Takwakabe ukulemana: “E lyo yakashibulwa amenso ya mpofu, na matwi ya bankomamatwi yakakomonwa; e lyo uwalemana amolu akacilauka nge nsebula, no lulimi lwa kwa cibulu lukaula.”—Esaya 35:5, 6.

• Takwakabe ukukalipwa, ubulanda, ne mfwa: “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:4.

• Takwakabe inkondo: “[Lesa] aputulo bulwi ukufika ku mpela ya calo.”—Amalumbo 46:9.

• Umweo wa muyayaya: “Abalungama bakapyaninine calo, no kwikalamo inshiku pe.”—Amalumbo 37:29.

13. Nani epela uwingalenga lino isonde ukuba paradise, kabili mulandu nshi?

¹³ Abantunse teti balete ifi fintu, lelo Yehova alikwata amaka ya kucita fyonse ifyo atila akacita. Tapali icingamulesha ukucita ifyo alefwaya ukucita. Baibolo itila: “Icebo conse icafuma kuli Lesa tacakabulwe amaka.”—Luka 1:37.

14. Bushe kuti mwaba shani pa nshila iitwala ku mweo wa muyayaya?

¹⁴ Yehova alebomfya Inte shakwe ukupeela abantu konse ishuko lya ‘kwingila pa mpongolo ya kamfyemfye’ no kwenda mu nshila iitwala ku mweo wa muyayaya. Shi na imwe namube pa bantu ba nsansa abaleitaba kuli ubu bwite. Shi mulepepa ukupepa kwa cine no kuipakisha amapaalo ya kwa Yehova umuyayaya!—Mateo 7:13, 14.