ISAMBILILO 58
Twalilileni Ukuba aba Cishinka Kuli Yehova
Abena Kristu balesha na maka ukukanaleka icili conse nelyo umuntu uuli onse alenga baleka ukupepa Yehova. Ukwabula no kutwishika ifi fine e fyo na imwe mumfwa. Yehova alatemwa nga muli aba cishinka kuli ena. (Belengeni 1 Imilandu 28:9.) Finshi fingalenga mwafilwa ukuba aba cishinka kuli Yehova, kabili kuti mwacita shani pa kuti ifyo fintu tafilengele mwaleka ukuba aba cishinka kuli ena?
1. Finshi abantu bengacita ifingalenga catukosela ukutwalilila ukuba aba cishinka kuli Yehova?
Abantu bamo kuti bafwaya twaleka ukubombela Yehova. Ni bani bengacita ifya musango uyu? Abantu bamo abafuma mu cine balalanda ifya bufi pa cilonganino ca kwa Lesa pa kuti balenge tuleke ukuba ne citetekelo. Aba bantu babeta ukuti abasangu. Na kabili bashimapepo bamo balalanda ifya bufi pali ifwe, icilenga bamo baleka ukubombela Yehova. Tatulingile ukulataalikana na batukaanya, ukulabelenga ifitabo fyabo nelyo ifyo babika pa mawebusaiti yabo, nangu ukutamba amavidio ayo bapanga, pantu ifi kuti fyalenga twaleka ukubombela Yehova. Yesu alandile pa bafwaya abantu baleka ukubombela Yehova ne cishinka ukuti: “Balekeni babe. Ni ntungulushi impofu, pantu impofu nga iletungulula impofu inankwe, shonse shibili shikawila mu cilindi.”—Mateo 15:14.
2. Finshi ifyo tusalapo ukucita ifingalenga catukosela ukuba aba cishinka kuli Yehova?
Ukutemwa Yehova kukalenga twilacita ifintu ifingalenga twalatungilila ukupepa kwa bufi. Kanshi mu fintu fyonse ifyo tucita pamo nga incito tubomba, utubungwe twabamo nelyo ifintu fimbi, tamulingile ukuba ifingalenga twalatungilila ukupepa kwa bufi. Yehova atweba ukuti: “Fumenimo [muli Babiloni Mukalamba], mwe bantu bandi.”—Ukusokolola 18:2, 4.
SAMBILILENI NA FIMBI
Sambilileni ifyo mwingacita pa kuti tamulekele umuntu uuli onse alenga mwaleka ukuba aba cishinka kuli Yehova. Kabili moneni ifyo mwingalanga ukuti muli ba cishinka kuli Yehova nga mwafuma muli Babiloni Mukalamba.
3. Mulecenjela kuli bakasambilisha ba bufi
Finshi tufwile ukucita nga twaumfwa abantu balelanda ifya bufi pa cilonganino ca kwa Yehova? Belengeni Amapinda 14:15, lyena lanshanyeni ici cipusho:
-
Mulandu nshi tushilingile ukulasuminina fye fyonse ifyo twaumfwa?
Belengeni 2 Yohane 9-11, lyena lanshanyeni aya mepusho:
-
Bushe tufwile ukulamona shani abasangu?
-
Nangu ca kuti tatuba pamo na basangu, finshi fimo ifingalenga twalakutika ku fyo balanda?
-
Bushe mulemona ukutila Yehova kuti aumfwa shani nga tulekutika ku fyabipa ifyo balanda pali ena e lyo na pa cilonganino cakwe?
4. Muletwalilila ukuba aba cishinka kuli Lesa nga ca kuti uwa bwananyina abembuka
Nga ca kuti twaishiba ukuti uwa bwananyina nacita ulubembu ulukalamba, finshi tufwile ukucita? Moneni ishinte lye funde ilyaba mu mafunde Lesa apeele abena Israele. Belengeni Ubwina Lebi 5:1.
Nga fintu ili ilembo lilanda, nga twaishiba ukuti uwa bwananyina nacita ulubembu ulukalamba tufwile ukweba baeluda fyonse ifyo twishibepo. Na lyo line, ilyo tushilaeba baeluda tulingile ukukoselesha uwa bwananyina uucitile ulubembu ukuyaeba baeluda ulubembu acitile. Nga ca kuti afilwa ukuyalanda, bwangu bwangu tufwile ukuyaeba baeluda ifyo acitile pa kuti tube aba cishinka kuli Yehova. Bushe ukucita ifi kulanga shani ukuti twalitemwa . . .
-
Yehova Lesa?
-
uwacitile ulubembu?
-
aba mu cilonganino?
Uwa bwananyina nga nakwata ubwafya mufwile ukumwafwa!
5. Fumeni muli Babiloni Mukalamba
Belengeni Luka 4:8 na Ukusokolola 18:4, 5, lyena asukeni aya mepusho:
-
Bushe nshafuutisha ishina kwi calici nalepepa?
-
Bushe naliba mu kabungwe akabombela pamo ne calici?
-
Bushe incito momba ilatungilila ukupepa kwa bufi mu nshila iili yonse?
-
Bushe kuli na fimbi ifyo ningile ukucita pa kuti mfuminine mu kupepa kwa bufi?
-
Nga na-asuka ukuti ee ku cipusho cimo pali ifi, cinshi ningile ukucita?
Muli fyonse ifyo mwasalapo ukucita muleshininkisha ukuti mwacita ifingalenga mwashala na kampingu iisuma, kabili ifingalanga ukuti muli ba cishinka kuli Yehova.
Kuti mwacita shani nga ca kuti aba mapepo bamweba ukusangwilako indalama sha kwafwilisha abalanda?
ABANTU BAMO BATILA: “Mfwile ukwishiba ifyo abasangu balanda pa Nte sha kwa Yehova pa kuti ndecingilila icine.”
-
Bushe ukucita ifi kwaliba fye bwino? Mulandu nshi mwa-asukila ifyo?
IFYO MUSAMBILILE
Pa kuti tutwalilile ukuba aba cishinka kuli Yehova, tatulingile ukula-ampana na bantu abafwaya ukutulufya.
Ukupitulukamo
-
Mulandu nshi tushilingile ukukutikila ku fyo abasangu balanda?
-
Finshi tulingile ukucita nga twaishiba ukuti uwa bwananyina nacita ulubembu ulukalamba?
-
Finshi tulingile ukucita pa kuti tufuminine mu kupepa kwa bufi?
ISHIBILENIPO NA FIMBI
Sambilileni ifyo mwingacita nga ca kuti bamo balelanda ifya bufi pa Nte sha kwa Yehova.
“Bushe Namwishiba Ifishinka?” (Ulupungu lwa kwa Kalinda, August 2018)
Kuti mwaishiba shani akabungwe nelyo incito ifingalenga mwalatungilila Babiloni Mukalamba?
Finshi fimo ifyo abatukaanya bacita pa kuti banashe icitetekelo cesu?
Belengeni ilyashi litila “Ukufuma fye ku Bwaice Bwandi, Nalefwaisha Ukwishiba Lesa,” pa kuti mumone icalengele shimapepo umo uwa kwi calici lya ba Shinto afuminineko ku kupepa kwa bufi.
“Baibolo Ilaalula Abantu” (Ulupungu lwa kwa Kalinda, July 1, 2011)
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
