Paradise tayakabe nge sonde lino twikalamo. Lesa tafwaile isonde libemo amacushi no bulanda, ukukalipwa no kucula. Lesa akalula isonde ukuba paradise ku ntanshi. Paradise ikaba shani? Natumone fintu Baibolo ilandapo:

Abantu abasuma. Fibusa fye fya kwa Lesa e fyakulaikala mu Paradise. Fikalacitila abanabo ifisuma. Fyakulakonka inshila sha kwa Lesa ishalungama mu mikalile.—Amapinda 2:21.

Ifya kulya ifingi. Tamwakabe nsala mu Paradise. Baibolo itila: “Mube ukupaka kwa ngano [nelyo, ifya kulya] mu calo.”—Amalumbo 72:16.

Amayanda ayasuma ne ncito iileta insansa. Ulupwa lonse lukaikwatila ing’anda mu Paradise wa pe sonde. Umuntu onse akalabombe ncito iikalamuletela insansa sha cine cine.—Esaya 65:21-23.

 Umutende mwi sonde lyonse. Tamwakabe ukulwa nelyo abantu ukufwa ku nkondo. Icebo ca kwa Lesa citila: “[Lesa] aputulo bulwi.”—Amalumbo 46:8, 9.

Ubumi busuma. Baibolo yalaya ukuti: “Umwikashi wa mu calo [ca Paradise] takasose, ati, Nindwala.” (Esaya 33:24) Tamwakabe no walemana nelyo impofu nelyo nkomamatwi nelyo cibulu.—Esaya 35:5, 6.

Tamwakabe ukucululuka, ubulanda, ne mfwa. Icebo ca kwa Lesa cisoso kuti: “Imfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:4.

Tamwakabe abantu babipa. Yehova alaya ukuti: “Ababifi bakaputulwa mu calo, na bafutika bakafumpulwamo.”—Amapinda 2:22.

Abantu bakatemwana no kucindikana. Takwakabe ulufyengo, ubunkalwe, ubufunushi, no lupato. Abantu bakekatana kabili bakakonka inshila sha kwa Lesa ishalungama mu mikalile yabo.—Esaya 26:9.