Ifyabipa ifilecitika nomba pe sonde filelangilila ukuti Paradise ili mupepi. Baibolo itila kwali no kuba inshita shayafya ilyo fye Paradise ishilaisa. Ishi e nshita tuleikalamo nomba! Ifikonkelepo e fintu fimo ifyo Baibolo yatile fyali no kucitika:

Inkondo shikalamba. “Uluko lukemino luko, no bufumu bukemino bufumu.” (Mateo 24:7) Uku kusesema kwalifikilishiwa. Ukutula mu 1914, inkondo sha calo shibili ne nkondo ishinono ishingi shalilwikwa. Shalipaya abantu abengi nga nshi.

Amalwele ya mwi sonde lyonse. Kwali no kuba “uku no ku . . . ifikuko.” (Luka 21:11) Bushe aya mashiwi yalifikilishiwa? Ee. Abantu abengi nga nshi balifwa kuli kansa, amalwele ya ku mutima, amalwele ya TB, ubulwele bwa mpepo, AIDS, na malwele yambi.

Insala. Kwaliba abantu mwi sonde lyonse abashikwata ifya kulya ifingi. Cila mwaka abengi nga nshi balafwa ku nsala. Ici na co cilelangilila ukuti Paradise ili mupepi no kwisa. Baibolo itila: “Kukaba ne fipowe.”—Marko 13:8.

 Ifinkukuma. ‘Kukaba . . . ifinkukuma mumo mumo.’ (Mateo 24:7) Aya amashiwi na yo yalifikilishiwa mu nshita shesu. Ukutula mu 1914, ifinkukuma fyalipaya abantu ukucila pali 1,000,000.

Ababifi. Abantu ‘bakatemwe ndalama’ kabili ‘bakaitemwa.’ ‘Bakatemwo kwangala ukucisho kutemwa Lesa.’ Abana bakaba “aba bucintomfwa ku bafyashi.” (2 Timote 3:1-5) Bushe tamulesuminisha ukuti ilelo kwaliba abantu abengi ababe fi? Tabacindika Lesa, kabili balacusha abafwaya ukusambilila pa lwa kwa Lesa.

Bumpulamafunde. ‘Ubupulumushi na bo bwali no kufulisha.’ (Mateo 24:12) Na imwe bene mulesuminisha ukuti bumpulamafunde nabufulisha ukucila ifyo bwali imyaka yapita. Ukuli konse abantu bali mu bwafya bwa kwibilwa, ukukopekwa, nelyo ukusanswa.

Ifi fyonse filelangilila ukuti Ubufumu bwa kwa Lesa buli mupepi. Baibolo itila: “Ilyo mukamona ifi fintu fileisa, ishibeni ukuti ubufumu bwa kwa Lesa buli mupepi.” (Luka 21:31) Ubufumu bwa kwa Lesa cinshi? Buteko bwa kwa Lesa ubwa ku muulu ubukaleta Paradise pano isonde. Ubufumu bwa kwa Lesa e bukapyana pa mabuteko ya bantunse.—Daniele 2:44.