BUSHE walishibe mpatila?— Impatila kupata umuntu pa mulandu wa kuti alamoneka uwapusanako nelyo alanda ululimi lumbi. E co ukuba ne mpatila, kupata umuntu ilyo taulamwishiba.

Bushe uletontonkanya ukuti cisuma ukupata umuntu ilyo taulaishiba umusango aba nelyo pa mulandu fye wa kuti alipusanako na iwe?— Iyo, impatila tayawama, kabili te cisuma ukuba ne mpatila. Tatufwile ukupata umuntu pa mulandu fye wa kuti alipusanako na ifwe.

Bushe walishibako umuntu uwa mushobo umbi nelyo uulanda ululimi lumbi?— Napamo walishiba na bantu abamoneka abapusanako pa mulandu wa kuti balicenwa nelyo balilwala. Bushe ulacite fisuma kuli aba bantu bapusana na iwe, kabili bushe walibatemwa?—

Nga tuleumfwa kuli Kasambilisha Mukalamba, Yesu Kristu, tukalacite fisuma kuli bonse. Tufwile ukucite fisuma ku uli onse te mulandu na ku calo afuma nelyo umushobo nelyo ifimoneka inkanda yakwe. Tufwile ukuba bwino kuli wene. Nangu ifi te fyo abantu bonse basumina, ili lisambililo Yesu asambilishe. Natulilandepo.

UmuYuda uwakwete impatila aishile kuli Yesu no kwipusha ati, ‘Cinshi mfwile ukucita pa kuba no mweo wa muyayaya?’ Yesu alishibe ukuti uyu mwaume napamo alefwaya alande ati ufwile ukucite fisuma ku bantu ba mushobo obe nelyo aba mu calo wikala. E co ukucila ukwasuka icipusho umwine, Yesu aipwishe uyu mwaume  ati: ‘Amafunde ya kwa Lesa yalanda ati tufwile ukucita cinshi?’

Uyu mwaume ayaswike ukuti: Yatila ‘ufwile ukutemwa Yehova Lesa obe no mutima obe onse, kabili ufwile ukutemwa umubiyo nga we mwine.’ Yesu atile: ‘Walungiko kwasuka. Cite fyo, no kuba no mweo wa muyayaya.’

Lelo, ulya mwaume talefwaya ukutemwa abantu bapusene na wene nelyo ukubacitile fisuma. E co aeseshe ukusanga umwa kubepekesha. Aipwishe Yesu ati: “Ngo munandi ni ani?” Napamo alefwaya Yesu ukulanda ati: “Bantu abamoneka ifyo umoneka.” Pa kwasuka icipusho, Yesu ashimike umulumbe pa muYuda no mwina Samaria. Umulumbe ashimike wali nge fi.

Umuntu umo aletentemuka ukuya ku Yeriko ukufuma mu musumba wa Yerusalemu. Uyu muntu ali muYuda. Ilyo aleya, ifipondo fyalimwikete. Fyamuponeshe pa nshi no kumusendela indalama ne fya kufwala. Ifi fipondo fyalimupumine no kumusha ali mupepi no kufwa mu mbali ya nshila.

Ilyo papitile inshita inono, kwaishile shimapepo uwalepita mu nshila ilya. Amwene uyu muntu uwali nacenwa sana. Aciba ni we,  cinshi wali no kucita?— Uyu shimapepo apitile mu mbali. Taiminine no kwiminina. Tacitile icili conse ku kwafwa uyu muntu.

Lyene kwaishile umuntu na umbi kapepa sana alepita mu nshila ilya. Ali mwina Lebi uwalebombela pe tempele mu Yerusalemu. Bushe aliminine pa kuti aafwe uyu muntu?— Iyo. Apitile mu mbali nga shimapepo.

Lyena, kwaishile umwina Samaria. Bushe ulemumona aleisa mu musebo?— Amwene uyu muYuda nalaala pa nshi ninshi nacenwa sana. Lelo, abena Samaria abengi na baYuda balipatene. (Yohane 4:9) E co bushe uyu mwina Samaria ali no kupita ukwabula ukwafwa uyu muntu? Bushe ali no kulanda ati: ‘Mulandu nshi ningile  ukwafwila uyu muYuda? Te kuti angafwe nga nincenwa.’

Kwena, uyu mwina Samaria amwene uyu mwaume nalaala mu mbali ya nshila, no kumumfwila uluse. Amwene ukuti tacingaba bwino ukumusha palya pene no kuleka afwe. E co aikile pa nama yakwe, no kuya kuli ulya mwaume, kabili atendeke ukumuwamya ifilonda. Aitilepo amafuta no mwangashi pa filonda. Ifi fyali no kulenga ifilonda ukupola. Lyene akakile ifisalu pa filonda.

Uyu mwina Samaria aimishe bwino bwino uyu muntu wacenenwe no kumubika pa nama yakwe. Lyene baendele panono panono mpaka bafika mu ng’anda umulaala abeni nelyo, mu hotela inono. Kulya uyu mwina Samaria alipile indalama ukwa kwikala uyu mwaume, kabili alimutensha bwino.

Nomba Yesu aipwishe umuntu alelanda nankwe ati: ‘Ni ani pali aba batatu uwali umunankwe wa ulya bapumine?’ Kuti waasuka ati shani? Bushe ali ni shimapepo, umwina Lebi, nelyo umwina Samaria?—

Uyu mwaume ayaswike ati: ‘Ulya uwaiminine no kutensha ulya muntu wacenenwe e wali umunankwe musuma.’ Yesu atile: ‘Naulungika, Kabiye ulecita ifyo fine na iwe.’—Luka 10:25-37.

 Bushe uyo tawali mulumbe usuma? Utulanga bwino ababa banensu. Te banensu fye balya tumfwana na bo sana. Kabili te bantu fye abamoneka inkanda nga ifwe nelyo abalanda ululimi tulanda. Yesu atusambilishe ukucite fisuma ku bantu bonse te mulandu na kuntu bafuma, ifyo bamoneka, no lulimi balanda.

Ifi e fyo Yehova Lesa aba. Taba ne mpatila. Yesu alandile ati: ‘Shinwe uuli mu muulu alenga akasuba kakwe ukutulila abantu ababipa na basuma, kabili aleka imfula ukuloka pa bantu abasuma na babipa.’ E co kanshi tufwile ukucite fisuma kuli bonse, filya fine Lesa aba.—Mateo 5:44-48.

E co nga wamona umuntu nacenwa, cinshi ukacita?— Ni shani nga ca kuti uyo muntu afuma ku calo cimbi nelyo wa nkanda iyapusana ne yobe? Na lyo line munobe, ufwile ukumwafwa. Nga wamona ukuti amaka yobe aya kwafwa yacepa, lyene kuti waipusha umukalamba ukwafwa. Nelyo kuti waita bakapokola nelyo bakafundisha ba pa sukulu. Nga wacite fyo ninshi uli muntu musuma, filya ulya mwina Samaria ali.

Kasambilisha Mukalamba afwaya ifwe ukuba abantu basuma. Afwaya tuleafwa bambi, te mulandu ni bani. E mulandu wine ashimikile umulumbe pa mwina Samaria musuma.