LINTU wakumanya umuntu umuku wa kubalilapo, cinshi ilingi ubalilapo ukumwipusha?— Umwipusha ishina lyakwe. Bonse twalikwata amashina. Lesa ainike umuntu wa kubalilapo pe sonde ishina. Amwinike ati Adamu. Umukashi wa kwa Adamu amwinike ati Efa.

Lelo, te bantu fye beka abakwata amashina. Tontonkanya pa fintu fimbi ifyakwata amashina. Lintu umuntu akupeela icilubi nelyo icitekwa, ulacinika ishina, bushe te ifyo?— Calicindama sana ukukwata ishina.

Nga wamona intanda ishingi nga nshi ubushiku, bushe ulatontonkanya ukuti shalikwata amashina?— Lesa ainike ishina ulutanda lumo lumo mu muulu. Baibolo itweba ati: “E upende mpendwa ya ntanda, shonse shiine alashiinika amashina.”—Amalumbo 147:4.

Kuti watila uwacindamisha mu muulu na pa calo nani?— Ee, ni Lesa. Bushe uletontonkanya ukuti alikwata ishina?— Yesu alandile ukuti Alikwata. Inshita imo Yesu apepele kuli Lesa ati: ‘Nalenga abakonshi bandi ukwishibe shina lyenu.’ (Yohane 17:26) Bushe walishibe shina lya kwa Lesa?— Lesa umwine alatweba ishina lyakwe. Atila: “Ine ndi Yehova, e shina lyandi.” Kanshi ishina lya kwa Lesa ni YEHOVA.—Esaya 42:8.

Bushe uyumfwa shani lintu bambi baibukisha ishina lyobe?— Ulatemwa, bushe te ifyo?— Yehova na o afwaya abantu ukwishiba ishina lyakwe. E co tufwile ukulumbula ishina Yehova lintu tulelanda pali Lesa. Kasambilisha Mukalamba alelumbula ishina  lya kwa Lesa, Yehova, lintu alelanda ku bantu. Inshita imo Yesu atile: “Uletemwa [Yehova, NW] Lesa obe ku mutima obe onse.”—Marko 12:30.

Yesu alishibe ukuti “Yehova” lishina lyacindama sana. E co asambilishe abakonshi bakwe ukubomfya ishina lya kwa Lesa. Abasambilishe no kulanda pe shina lya kwa Lesa mu mapepo yabo. Yesu alishibe ukuti Lesa afwaya abantu bonse ukwishiba ishina Lyakwe, Yehova.

Kale sana Lesa alangile ubucindami bwe shina lyakwe ku muntu Mose, uwali pa bana ba kwa Israele. Abana ba kwa Israele, abaleitwa ati abena Israele, baleikala mu calo ca Egupti. Abantu ba muli cilya calo baleitwa ati abena Egupti. Batekele abena Israele ubusha kabili balebacusha sana. Ilyo Mose akulile, aeseshe ukwafwa umo mu bantu bakwe. Ici cakalifye Farao, imfumu ya Egupti. Alefwaya ukwipaya Mose! E co Mose alibutwike ukufuma mu Egupti.

 Mose aile ku calo cimbi. Cali calo ca Midiani. Kulya Mose alyupile no kukwata ulupwa. Kabili ali mucemi, uwalesunga impaanga. Bushiku bumo Mose ali ne mpaanga mupepi no lupili lintu amwene icintu ca kupapusha. Icimpusa ca myunga calebilima, lelo tacalepya! Mose alipaleme pa kuti alolekeshe.

Bushe walishiba icacitike?— Mose aumfwile ishiwi lileita pa kati ka cimpusa ca myunga icalebilima. Ishiwi lyaitile ati, “Mose, Mose!” Nani walelanda ayo mashiwi?— Ni Lesa walelanda! Lesa alikwatile Mose imilimo iingi. Lesa atile: ‘Enda, ndekutuma kuli Farao, imfumu ya Egupti, ukafumya na bantu bandi abana ba kwa Israele mu Egupti.’ Lesa alaile Mose ukuti akamwafwa ukucite ci.

Lelo Mose asosele kuli Lesa ati: ‘Ine nga nafika ku bana ba kwa Israele mu Egupti, no kutila Lesa antuma; nga banjipusha ati, “Ni ani ishina lyakwe?” bushe nkatila shani?’ Lesa aebele Mose ukweba abana ba kwa Israele ati: ‘Yehova antuma njise kuli imwe. Yehova e shina lyandi umuyayaya.’ (Ukufuma 3:1-15) Ici cilanga  ukuti Lesa ali no kusunga ishina lyakwe Yehova. Tali no kwalula ili shina. Lesa alefwaya ukwishibikilwa kwi shina lyakwe, Yehova, umuyayaya.

Lintu Mose abwelele ku Egupti, abena Egupti baletontonkanya ukuti Yehova aali ni lesa fye munono uwa bena Israele. Tabaletontonkanya ukuti ni Lesa we sonde lyonse. E co Yehova aebele imfumu ya Egupti ukuti: ‘Ndi no kulenga ishina lyandi lishibikwe mu calo conse.’ (Ukufuma 9:16) Cine cine Yehova alilengele ishina lyakwe ukwishibikwa. Bushe walishiba ifyo acitile co?—

Alengele Mose ukutungulula abena Israele ukufuma mu Egupti. Ilyo bafikile pali Bemba Wakashika, Yehova apangile inshila muli bemba. Abena Israele baabwike pa mushili wauma. Lelo ilyo Farao na bashilika bakwe bonse baingile muli iyi nshila, yalya menshi yaiminine mu mbali yakupile abena Egupti, kabili bonse balifwile.

Mu kwangufyanya abantu mwi sonde lyonse batendeke ukumfwa ifyo Yehova acitile pali Bemba Wakashika. Twaishiba shani ukuti balyumfwile pali ici cacitike?— Ilyo papitile imyaka nalimo 40, abena Israele bafikile ku Kaanani, icalo Yehova  alaile ukubapeela. Kulya abaume babili abena Israele baebelwe ku mukashana Rahabu ukuti: “Natuumfwa ifyo Yehova aumishe Bemba Wakashika ku cinso cenu, ilyo mwafumine ku Egupti.”—Yoshua 2:10.

Lelo abantu abengi baba fye nga balya bena Egupti. Tabasumina ukuti Yehova e Lesa we sonde lyonse. E co Yehova afwaya abantu bakwe ukweba bambi pali wene. Ici e co Yesu acitile. Ku mpela ya bumi bwakwe pe sonde, apepele kuli Yehova ati: “Nabalengele ukwishibe shina lyenu.”—Yohane 17:26.

 Bushe ulefwaya ukuba nga Yesu? Lyene uleebako bambi ukuti ishina lya kwa Lesa ni Yehova. Ukasanga ukuti abantu abengi tabaishibe co. E co napamo kuti wabalanga ilembo mu Baibolo ilya Amalumbo 83:18. Nomba natubuule Baibolo no kufwaila pamo ili lembo. Litila: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.”

Cinshi twasambilila ku kubelenge fi?— Twasambilila ukuti Yehova e shina lyacindamisha ukucila amashina yonse. Lishina lya kwa Lesa Wa maka yonse, Wishi kwa Yesu kabili Uwapangile ifintu fyonse. Kabili ibukisha, Yesu atile tufwile ukutemwa Yehova Lesa no mutima wesu onse. Bushe walitemwa Yehova?—

Kuti twalanga shani ukuti twalitemwa Yehova?— Inshila imo kumwishiba nga Cibusa. Inshila imbi kwebako bambi ishina lyakwe. Kuti twabalanga muli Baibolo ukuti ishina lyakwe ni Yehova. Kuti twalanda na pa fintu ifyawama ifyo Yehova apanga ne fintu ifisuma ifyo acita. Ici cilenga Yehova ukutemwa sana pantu afwaya abantu ukumwishiba. Kuti twacitako ifyo na ifwe, bushe te ifyo?—

Te bonse abakafwaya ukumfwa lintu tulelanda pali Yehova. Abantu abengi tabaumfwile na lintu Yesu, Kasambilisha Mukalamba, alelanda pali Wene. Lelo ico tacaleseshe Yesu ukulanda pali Yehova.

E co natube nga Yesu. Natutwalilile ukulanda pali Yehova. Nga tulecite fyo, tukasekesha Yehova Lesa pantu tulelanga ukuti twalitemwa ishina lyakwe.