NALISHIBA icintu cimo ica kupapusha. Bushe kuti watemwa ukucumfwa?— Lolesho kuboko kobe. Bweshe minwe. Nomba toola icintu. Ukuboko kobe kuti kwacite fintu ifingi, kabili kuti kwaficita bwino bwino. Bushe walishiba uwapangile amaboko yesu?—

Ni ulya Wine uwapangile akanwa kesu, imyona, na menso. Ni Lesa, Wishi wa kwa Kasambilisha Mukalamba. Bushe tatusekelela ukuti Lesa alitupeela amenso?— Kuti twamona ifintu ifingi ku menso. Kuti twamona amaluba. Kuti twamona icani ne myulu. Kuti twamona no tuni tulelya ngo tuli mu cikope. Cine cine, ca kupapusha ukuti kuti twamona ifintu nge fi, bushe te ifyo?—

Lelo nani wapangile ifi fintu? Bushe abantu e bafipangile? Iyo. Abantu kuti bapanga ing’anda. Lelo teti bapange icani icikula. Abantu te kuti bapange akooni, iluba, nelyo cimbi ica mweo. Bushe walishibe co?—

Lesa e wapangile ifi fintu fyonse. Lesa apangile imyulu ne sonde. Apangile na bantu. Apangile umwaume wa kubalilapo no mwanakashi wa kubalilapo. Yesu, Kasambilisha Mukalamba asambilishe ci.—Mateo 19:4-6.

Yesu aishibe shani ukuti Lesa e wapangile umwaume no  mwanakashi? Bushe Yesu alimwene Lesa alecite co?— Ee. Yesu ali na Lesa lintu Lesa alepanga umwaume no mwanakashi. Yesu ali e muntu wa kubalilapo Lesa apangile. Iyo nshita, Yesu ali ni malaika, kabili aleikala ku muulu na Wishi.

Baibolo itweba ati Lesa atile: ‘Natupange umuntu.’ (Ukutendeka 1:26) Bushe nawishiba untu Lesa alelandako?— Alelanda no Mwana wakwe. Alelanda no yo uwaishileisa pe sonde no kwisaba Yesu.

Bushe ico te ca kusansamusha? Tontonkanya pali ci! Lintu tuleumfwa kuli Yesu, ninshi tulesambilishiwa ku wali na Lesa lintu Lesa apangile isonde ne fintu fimbi fyonse. Yesu alisambilile ifingi pa kubomba na Wishi mu muulu. E mulandu wine Yesu abela Kasambilisha Mukalamba!

Bushe uletontonkanya ukuti Lesa ali no bulanda pa kuba eka lintu  talapanga Umwana wakwe?— Iyo. Nga ca kuti tali no bulanda, mulandu nshi apangile ifintu fimbi ifya mweo?— Acitile ci pantu ni Lesa wa kutemwa. Alefwaya bambi ukuba no mweo no kuipakisha ubumi. Tufwile ukutasha Lesa pa kutupeela ubumi.

Fyonse ifyo Lesa acita filanga ukutemwa kwakwe. Lesa apangile akasuba. Akasuba katupeela ulubuuto ne cikabilila. Fyonse kuti fyaba ifyatalala kabili tapengaba ubumi pe sonde nga takwali akasuba. Bushe tausekelela ukuti Lesa alipangile akasuba?—

Lesa alaleta ne mfula. Inshita shimo te kuti utemwe imfula pa mulandu wa kuti teti uye pa nse mu kwangala nga ileloka. Lelo imfula ilenga amaluba ukukula. E co lintu twamona amaluba yasuma, nani tukatasha pali aya maluba?— Ni Lesa. Kabili nani tufwile ukutasha lintu twalya ifisabo fisuma ne misaalu?— Tufwile ukutasha Lesa pantu kasuba kakwe ne mfula e filenga ukuti ifi fintu filekula.

Tutile umuntu akwipusha ati, ‘Bushe Lesa e wapangile abantu ne finama?’ Kuti waasuka ati shani?— Cili fye bwino ukusosa ati: “Ee, Lesa e wapangile abantu ne finama.” Lelo ni shani nga ca kuti umuntu umo tasumina ukuti Lesa e wapangile abantu? Ni shani nga ca kuti atila abantu bafumine ku finama? Kwena, Baibolo taisambilishe fyo. Ilanda ati Lesa e wapangile ifintu fyonse ifya mweo.—Ukutendeka 1:26-31.

Lelo umuntu umo kuti akweba ati tasumina muli Lesa. Lyene cinshi ukasosa?— Ukasonte ku ng’anda. E lyo ukepushe uyo muntu ati: “Nani wapangile ilya ng’anda?” Bonse balishiba ukuti kwali uwaipangile. Ilya ng’anda tayaipangile fye!—AbaHebere 3:4.

Lyene twala uyo muntu mu lubansa no kumulanga iluba. Mwipushe ati:  “Nani wapangile ili luba?” Takwali umuntunse uwalipangile. Kabili filya fine ing’anda tayaipangile, ne li luba talyaipangile. Kwali uwalipangile. Lesa e walipangile.

Eba uyo muntu ukukutika ku koni akalelila. Lyene mwipushe ati: “Nani wapangile ifyuni no kufisambilisha ukulila?” Ni Lesa. Lesa e wapangile imyulu ne sonde na fyonse ifya mweo! E upeela umweo.

Lelo, umo kuti atila asumina fye ifyo engamona. Nalimo kuti asosa ati: ‘Nga nshingamone cintu, te kuti nsumine ukuti e ko caba.’ E co abantu bamo batila tabasumina muli Lesa pantu tabamumona.

Ca cine ukuti tatwingamona Lesa. Baibolo itila: ‘Umuntu tengamona Lesa.’ Takwaba umwaume, umwanakashi, nelyo umwana pe sonde uwingamona Lesa. E co takuli uufwile ukupanga icikope nelyo icimpashanya ca kwa Lesa. Lesa alatweba no kuti tatufwile ukupanga icimpashanya cakwe. E co, Lesa te kuti atemwe nga twakwata ifya musango yu mu ng’anda yesu.—Ukufuma 20:4, 5; 33:20; Yohane 1:18.

Lelo nga tatwingamona Lesa, twaishiba shani ukuti ca cine eko aba? Tontonkanya pali ci. Bushe umwela kuti waumona?— Iyo. Takwaba uwingamona umwela. Lelo kuti wamona ifintu ifyo umwela ucita. Kuti wamona amabuula yaletenkana lintu umwela wapuupa ku misambo ya cimuti. E cilenga wasumina ukuti kwaliba umwela.

Kuti wamona ne fintu Lesa apanga. Lintu wamona iluba nelyo icuni, umona icintu Lesa apanga. E co ulasumina ukuti Lesa ca cine e ko aba.

Umo kuti akwipusha ati, ‘Nani wapangile akasuba ne sonde?’  Baibolo itila: “Lesa [apangile] umuulu na pano isonde.” (Ukutendeka 1:1) Lesa e wapangile ifi fintu fyonse fya kupapusha! Bushe uyumfwa shani pali ici?—

Bushe te cisuma sana ukuba uwa mweo? Kuti twaumfwa ukulila kusuma ukwa tuni. Kuti twamona amaluba ne fintu fimbi ifyo Lesa apanga. Kabili kuti twalya ne fya kulya Lesa atupeela.

Pali ifi fyonse, tufwile ukutasha Lesa. Tufwile ukumutasha maka maka pa kutupeela ubumi. Nga ca kuti tuletasha Lesa icine cine, tukacitapo cimo. Cintu nshi co?— Tukomfwa kuli Lesa, kabili tukacita ifyo atweba mu Baibolo. Nga twacite fyo kuti twalanga ukuti twalitemwa Uwapangile ifintu fyonse.