ELENGANYENI ukuti mwasaba iapele ilyapya sana. Ilyo tamulalibika mu museke umo mulebika yonse mwaumfwa lyanunkila. Namubomba inshita iikalamba lelo tamuleumfwa ukunaka, mulefwaya fye ukutwalilila ukubomba. Banyinenwe nabo nabeminina mupepi no muti, balebomba fye ne nsansa pamo na ba munyinenwe ne fibusa abalemwafwa ukulobolola. Banyinenwe balemoneka fye abakashana nga fintu balemoneka imyaka ya ku numa ilyo mwali abaice. Mwafilwa no kusumina ukuti no kukota balikotelepo mu calo cikote. Mwalimweneko uko ubulwele bwaile bulebapwisha panono panono, nalimo bafwilile fye mu minwe yenu kabili ku manda mwalililile sana. Lelo nomba nababuuka kabili bali pamo na bantu bambi, balemoneka abatuntulu nga nshi!

Twalishininkisha ukuti, inshiku sha musango uyu shikabako. Ico tatutwishikila, nico Lesa lyonse alafikilisha amalayo. Muli cino cipande, twalalanda pa fyo amalayo ya kwa Lesa yamo yakafilishiwa ilyo inkondo ya Armagedone ishilaisa. Tukapituluka na mu malayo ya Bufumu ayakafikilishiwa pa numa ya iyi nkondo. Ala tukatemwa nga nshi ukumona uko Ubufumu bwa kwa Lesa bukalateka icalo conse, no kulenga ifintu fyonse ukuba ifipya!