ELENGANYENI ukuti munyinefwe alelanda ilyashi pa kulongana kwa muputule, kabili ilyo mwamulolesha mwamwentula. Uyu ni munyinefwe wacaice uo mwaba nankwe mu cilonganino, kabili uyu e muku wa kubalilapo alelanda ilyashi pa kulongana kwa muputule. Ilyo mulekutika ku lyashi, mwapapa pa fyo Lesa akansha abantu bakwe. Mwaibukisha ifyo uyu munyinefwe alelanda amalyashi kale kabili camupapusha ukumfwa ifyo alanda bwino sana ilyashi! Alilunduluka sana pa numa ya kupwisha Isukulu lya Bupainiya. Kabili uyu munyinefwe no mwina mwakwe e lyo bafumine fye ku Isukulu lya Bakabilisha ba Mbila Nsuma ya Bufumu. Ilyo mulemutootela pa fyo alandile bwino ilyashi, mwalolesha mwi bumba kabili mwasumina ukuti cine cine Lesa alasambilisha abantu bakwe!

Baibolo yalisobele ukuti kukaba inshita ilyo abantu ba kwa Lesa “bakasambilishiwa kuli Yehova.” (Esa. 54:13) Ino ine e nshita yasobelwe. Tulasambilila ifingi mu mpapulo, pa kulongana kwa pa cilonganino, ukwa muputule, ukwa citungu e lyo na mu masukulu ayatwafwa pa kuti tulebomba bwino imilimo imo mu kuteyanya kwa kwa Yehova. Muli cino cipande twalasambilila ifyo aya masambililo yalenga twashininkisha ukuti cine cine Ubufumu bwa kwa Lesa bwalitendeka ukuteka.