Ukupika salyuti kuli flagi. Inte sha kwa Yehova shasumina ukuti ukukontamina flagi nelyo ukupika salyuti kuli flagi, ilyo ulwimbo lwa cishipa luleimbwa, cimo no kusumina ukuti icalo nelyo intungulushi sha ciko e bengaleta ipusukilo, te Lesa iyo. (Esaya 43:11; 1 Abena Korinti 10:14; 1 Yohane 5:21) Intungulushi imo iyo abantu balecindika ifi, ni Mfumu Nebukadnesari iyaleteka icalo ca Babiloni. Iyi mfumu ya maka pa kuti ilange abantu ukuti yali ni mfumu yacindama sana no kuti yalibikile amano ku fya mapepo, yapangile icimpashanya icikalamba nga nshi no kweba abantu bonse abo yaleteka ukuti bacikontamine ilyo ulwimbo ulwali kwati lwa cishipa lwalelila. Lelo abalumendo batatu abaHebere, Shadraki, Meshaki, na Abednego, balikeene ukukontamina icimpashanya, nangu ca kuti balishibe ukuti uyu wali mulandu wa kufwilapo.—Daniele, icipandwa 3.

Carlton Hayes, uwasambilila ifyalecitika kale alembele pa lwa nshita tuleikalamo ukuti, “flagi e cishibilo ca kuti abatemwisha icalo cabo balicicetekela kabili balicicindikisha. Abaume balafuula utusote ilyo balepisha flagi uko bali; kabili abalemba imishikakulo balalumbanya flagi mu mishikakulo yabo, na baice balemba inyimbo sha kulumbanya flagi.” Kabili alembele ukuti abatemwisha icalo cabo balikwata ne “nshiku sha mushilo,” nga filya aba ku United States bakwata ubushiku bwa  pa 4 July. Kabili balikwata na bantu abo bacindikisha nga “batakatifu” e lyo balikwata ne fikuulwa bacindikisha ifyo bamona nga “matempele.” Ilyo kwali ukusefya mu Brazil, umukalamba wa bashilika alisumine ukuti: “Flagi yalicindikwa nga nshi kabili abantu baliitemwisha . . . nga filya fine batemwisha icalo cabo.” Ne citabo ca The Encyclopedia Americana catile “flagi ya mushilo nga filya fine ifyaba umusalaba.”

Icitabo cimo cine calandile nomba line fye ukuti, mu nyimbo sha cishipa “e mo abantu balangila ifyo batemwa icalo cabo, kabili muli ishi nyimbo ilingi line balalomba no kuti Lesa aletungulula abantu nelyo bakateka babo no kulabacingilila.” Kanshi e mulandu wine ababomfi ba kwa Yehova bamwena ukuti ukupika salyuti kuli flagi nelyo ukwimba inyimbo sha cishipa cimo no kupepa. Na kuba, pali filya abana ba Nte sha kwa Yehova pa masukulu ya ku U.S.A. bakaana ukupika salyuti kuli flagi, nelyo filya bakaana ukulapa ukuti bakulacindika flagi, icitabo ca The American Character calandile ukuti: “Icilye Cikalamba casukile casumina ukuti ifi abana be sukulu bapika salyuti kuli flagi no kwimba ulwimbo lwa cishipa, cimo cine fye no kupepa.”

Nangu ca kuti abantu ba kwa Yehova tabacitako ifyo Baibolo yabinda, balacindika insambu sha bantu abacita ifi fintu. Na kabili balacindika amaflagi ya calo kabili bamona intungulushi ishasalwa ukuti e “buteko” ububomba ngo “mubomfi wa kwa Lesa.” (Abena Roma 13:1-4) E ico, Inte sha kwa Yehova balomfwila amashiwi ya kuti mulepepelako “ishamfumu na bashimucindikwa bonse.” Lelo ico tufwaya ca kuti “tuleikala mu mutende kabili mu cibote pa kuti tufishepo bukapepa bwesu no kulabika amano ku fintu.”—1 Timote 2:2.

Ukusala intungulushi. Abena Kristu ba cine balacindika insambu sha bantu bambi isha kusala intungulushi. Tabalesha abantu ukusala intungulushi, kabili balomfwila bakateka abasalwa. Na lyo line, tabaitumpa nangu panono mu fikansa fya mitekele ya calo. (Mateo 22:21; 1 Petro 3:16) Cinshi Umwina Kristu engacita nga ca kutila mu calo ekala, umuntu fye onse alingile ukusala intungulushi nelyo nga ca kuti batila uushasaleko alecimona? Apo Shadraki, Meshaki, na Abednego balifikile fye na mwi lungu lya Dura, Umwina Kristu na o nga  cayafya sana kuti apingulapo ukuya na mulya mwine umo balesalila nga ca kuti kampingu yakwe yamusuminisha. Lelo nga aya, alingile ukucenjela pa kuti taibimbile mu fikansa fya calo. Afwile ukutontonkanya pali aya mashiwi ya kwa Lesa ayatutungulula:

1. Abasambi ba kwa Yesu ‘te ba muli ici calo.’—Yohane 15:19.

2. Abena Kristu bemininako Kristu no Bufumu bwakwe.—Yohane 18:36; 2 Abena Korinti 5:20.

3. Ababa mu cilonganino ca Bena Kristu basumina muli fimo fine, kabili ukutemwa nga kulya uko Kristu akwata e kwalenga ukuti bekatane.—1 Abena Korinti 1:10; Abena Kolose 3:14.

4. Abasala intungulushi ya buteko, na bo balakumako ku fyo icita.—Moneni ici cishinka mu mashiwi ya kwa Lesa ayatutungulula ayaba pali 1 Samwele 8:5, 10-18 na pali 1 Timote 5:22.

5. Ilyo abena Israele balefwaya ukulatekwa no muntu, Yehova amwene ukuti e o bakaana.—1 Samwele 8:7.

6. Abena Kristu bafwile ukulanda ukwabula umwenso pa Bufumu bwa kwa Lesa ku bantu bonse ababa mu fikansa fya calo.—Mateo 24:14; 28:19, 20; AbaHebere 10:35.

Ukubombela ubuteko. Mu fyalo fimo, ubuteko bufwaya ukuti abantu nga bakaana ukwingila ubushilika, babombako imilimo imbi pa nshita imo. Nga batweba ukubombako iyi imilimo, tufwile ukupepelapo kabili kuti twalanshanyako no Mwina Kristu munensu uwakosa mu kupepa, e lyo fwe bene twasala ica kucita ukulingana ne fyo kampingu yatweba.—Amapinda 2:1-5; Abena Filipi 4:5.

Baibolo itweba “ukulaumfwila ubuteko na balashi, ukuba abaiteyanya ukubomba umulimo onse uusuma, . . . ukukanapampamina fye pa cintu cimo.” (Tito 3:1, 2) Aya mashiwi kuti yalenga napamo twaipusha ifipusho fya kuti: ‘Bushe nga nasumina ukubomba iyi ncito, ninshi naitumpa mu fikansa fya calo nelyo bushe iyi ncito kuti yalenga nalacitako ificitwa mu mipepele ya bufi?’ (Mika 4:3, 5; 2 Abena Korinti 6:16, 17) ‘Bushe nga natendeka ukubomba uyu mulimo kuti calankosela ukubomba imilimo ya Bwina Kristu, nelyo bushe kuti ndefilwa no kuibomba?’ (Mateo 28:19, 20; Abena Efese 6:4; AbaHebere 10:24, 25)  ‘E lyo kabili, bushe nga natampa ukubomba iyo ncito, nkalakwata inshita ya kubombako imilimo ya kwa Lesa na imbi, pamo nga bupainiya bwa nshita yonse?’—AbaHebere 6:11, 12.

Nga ca kuti Umwina Kristu asalapo ukubomba uyo mulimo wa buteko ukucila ukukakwa, Abena Kristu banankwe tabafwile ukumulengulula. (Abena Roma 14:10) Lelo nga amona ukuti talingile ukubomba uyo mulimo, na lyo line tabafwile ukumulengulula.—1 Abena Korinti 10:29; 2 Abena Korinti 1:24.