Ilyo Yehova abikileko ulupwa, apeele abafyashi umulimo wa kukusha abana. (Abena Kolose 3:20) Mwe bafyashi, ni mwe mwakwata umulimo wa kusambilisha umwana pa kuti aletemwa Yehova na pa kuti akakule bwino. (2 Timote 1:5; 3:15) Mufwile ukwishiba ifyaba mu mutima wa mwana wenu. Na lyo line, abana balasambilila na ku fyo mucita. Pa kusambilisha bwino umwana Icebo ca kwa Yehova, kano imwe bene mwabalilapo ukubika Icebo ca kwa Lesa mu mutima wenu.—Amalumbo 40:8.

IFYO BAIBOLO ILANDA: “Umuntu onse abe uwayanguka ukumfwa, uukokola ukulanda.” (Yakobo 1:19) Abafyashi abengi balafwaya abana babo belatiina ukulanda nabo. Abana balingile ukwishiba ukuti nga balefwaya ukulanda na imwe, mwalakutika. Beni aba mutende ku bana pa kuti belatiina ukumweba ifili ku mukoshi. (Yakobo 3:18) Nga baishiba ukuti mulabakalipila nelyo ukubapeela imilandu ilyo bashilalanda ifyo balefwaya, tabakulamweba ifili ku mutima. Mulebikako amano ku fyo balelanda, kabili mulebeba ukuti mwalibatemwa.—Mateo 3:17; 1 Abena Korinti 8:1.

IFYO MWINGACITA:

• Mulekutika nga ca kuti umwana wenu alefwaya ukulanda nenu

• Mulelanshanya na bana benu lyonse, mwilalolela fye kwaba amafya

IFYO BAIBOLO ILANDA: “Uwaba no kushilimuka mu fintu akasanga ubusuma.” (Amapinda 16:20) Limo mulingile ukubikako sana amano pa kuti mumfwe ifyo abana balefwaya ukumweba ne fyo baleumfwa. Abana balalenga na kantu akanono kamoneka kwati cintu icikulu e lyo limo amashiwi balanda tayalanga ifyo balefwaya ukumweba. Baibolo itila: “Uwasuka ilyo talati omfwikishe umulandu, buwelewele kuli ena kabili ni nsoni.” (Amapinda 18:13) Kanshi mwilakalipa bwangu.—Amapinda 19:11.

IFYO MWINGACITA:

• Mwilabacilima kabili mwilafulwa nangu balanda fimo ifyo mushitemenwe

• Muleibukisha ifyo mwaleumfwa ilyo mwali abaice e lyo ne fyalemoneka ifyacindama kuli imwe

IFYO BAIBOLO ILANDA: “We mwana wandi, umfwila ukusalapula kwa kwa wiso, kabili wisuula amafunde ya kwa noko.” (Amapinda 1:8) Yehova apeela abafyashi bonse babili umulimo wa kufunda abana. Mulingile ukulabafunda pa kuti balemucindika no kumumfwila. (Abena Efese 6:1-3) Abana baleshiba nga ca kuti abafyashi babo tabali “abaikatana mu mano yamo yene.” (1 Abena Korinti 1:10) Nga mwapusana pa fyo muletontonkanya, mwileka abana bomfweko ifyo mulelanda, pantu kuti baleka ukumucindika.

IFYO MWINGACITA:

• Lanshanyeni no kusuminishanya ifyo mwakulafunda abana

• Nga mwapusana na bena mwenu mu fyo muletontonkanya pa kufunda abana, esheni ukumfwikisha ifyo umwina mwenu aletontonkanya

IFYO BAIBOLO ILANDA: “Sambilisha umwaice umo afwile ukubela.” (Amapinda 22:6) Pa kusambilisha bwino abana mufwile ukupangana ifya kubasambilisha ne fya kubasalapula. (Amalumbo 127:4; Amapinda 29:17) Ukufunda abana te kubakalipila fye no kubooma, lelo mulingile no kubafwa ukwishiba ico mubapeelela amafunde. (Amapinda 28:7) E lyo mulingile no kubasambilisha ukutemwa Icebo ca kwa Yehova e lyo no kwishiba amafunde yabamo. (Amalumbo 1:2) E cikalenga bakakwate kampingu umusuma.—AbaHebere 5:14.

IFYO MWINGACITA:

• Mufwile ukufunda sana abana pa kuti baishiba bwino Yehova no kumucetekela

• Bafweni ukwishiba no kutaluka ku fyabipa, nga filya ifisangwa pa Intaneti e lyo ne fifuma mu kumfwana na banabo ba pa Intaneti. Basambilisheni ifya kutaluka ku bacenda abana