Ilyo Yesu atumine abatumwa bakwe babili babili, alibebele bwino bwino ifya kushimikila. Tabebele fye ifya kushimikila, lelo alibasokele na pa balwani. Atile: “Moneni! ndemutuma nge mpaanga mu mimbulu . . . Mulecenjela ku bantu; pantu bakamutwala ku filye, kabili bakamufopaula mu masunagoge yabo. Na kuba, bakamutwala pa ntanshi ya balashi ne shamfumu pa mulandu wandi.”—Mateo 10:16-18.

Ca cine, abantu bali no kulacusha sana abasambi ba kwa Yesu, lelo Yesu alibakoseleshe ilyo abalaile ukuti: “Ilyo bamutwala, mwikasakamikwa pa nshila mukalandilamo ne co mukalanda; pantu mukapeelwa ifya kusosa muli ilya ine nshita; pantu te imwe mukalalanda, lelo mupashi wa kwa Shinwe e ukalalandila muli imwe. Kabili, munyina akapeela munyina ku kwipaiwa, na wishi akapeela umwana, na bana bakemina abafyashi no kubepaisha. Kabili abantu bonse bakamupata pa mulandu we shina lyandi; lelo uwashipikisha ukufika na ku mpela, e ukapusuka.”—Mateo 10:19-22.

Apo ukushimikila kwalicindama sana, Yesu akonkomeshe abasambi bakwe ukuti bafwile ukuba abacenjela pa kutila batwalilile ukubomba uyu mulimo. Atile: “Ilyo bamucusha mu musumba umo, fulumukileni kuli umbi; pantu ndemweba icine cine, nati, tamwakapwishe ukushinguluka imisumba ya Israele ninshi Umwana wa muntu aisa.”—Mateo 10:23.

Yesu alicitile bwino pantu alifundile abatumwa bakwe 12 ifya kubomba umulimo, kabili alibasokele pa mafya bengakwata e lyo kabili alibakoseleshe. Lelo aya mashiwi yali no kwafwa na batendeke ukubomba umulimo wa kushimikila lintu Yesu afwile e lyo na lintu abuushiwe. Icilanga ifi, mashiwi Yesu aebele abasambi bakwe aya kuti: ‘abantu bonse bakabapata.’ Kanshi abali no kubapata te balya fye Yesu abatumineko ukuyashimikila. E lyo kabili Baibolo tayalandapo ukuti abatumwa balibatwele ku balashi na ku shamfumu pa nshita iinono iyo baile mu kushimikila mu Galili, nangu ukuti aba mu lupwa lwabo balibepeye.

Kanshi ilyo Yesu aebele abatumwa aya mashiwi, alelanda na pa fyali no kucitika ku ntanshi. Tontonkanyeni pali filya alandile ukuti abasambi bakwe tabakapwishe ukushimikila imisumba yonse “ninshi Umwana wa muntu aisa.” Yesu alelanda ukuti abasambi bakwe tabakapwishe ukushimikila pa Bufumu bwa kwa Lesa ilyo Imfumu, Yesu Kristu uo Lesa asala akesa mu kupingula abantu.

Abatumwa tabalingile ukupapa abantu nga  babacusha ilyo balebomba umulimo wa kushimikila pantu Yesu atile: “Umusambi tacila kasambilisha wakwe, no musha na o tacila shikulu wakwe.” Ico Yesu alelandapo ca kuti, apo abantu balemucusha pa mulandu wa kushimikila pa Bufumu bwa kwa Lesa, ninshi nabo bali no kubacusha. Na lyo line, Yesu abakoseleshe ukuti: “Mwilatiina abengamwipaya lelo abashingamupoka isubilo lya kuba no mweo; lelo muletiina Lesa uwingamulofesha mu Gehena.”—Mateo 10:24, 28.

Ifi fine e fyo Yesu acitile. Alishipikishe mpaka ne mfwa, talekele ukuba ne cishinka kuli Yehova uwa maka yonse. Ni Lesa wa Maka Yonse fye e wingapoka umuntu isubilo lya kuba no mweo kabili e wingamubuusha pa kuti aikala umuyayaya. Aya amashiwi yafwile yalisansamwishe sana abatumwa!

Lyena Yesu alangilile ifyo Lesa atemwa abantu ne fyo abasakamana ilyo atile: “Bushe tabashita inseba shibili mu kandalama akanono sana? Na lyo line takuli nangu lumo ulwingapona pa nshi ukwabula Shinwe ukwishiba. . . . E ico mwilatiina; mwalicindama ukucila inseba ishingi.”—Mateo 10:29, 31.

Imbila nsuma iyo abasambi ba kwa Yesu balebila yali no kupatanya indupwa pantu bamo bali no kuipokelela e lyo bambi bali no kukaana. Yesu abebele ukuti: “Mwitila naisa ku kuleta umutende pe sonde.” Ca cine, pa kuti uwa mu lupwa apokelele icine ca mu Baibolo, afwile ukuba uwashipa. Yesu atile: “Uwatemwa wishi nelyo nyina ukucila ine, talingile ukuba umusambi wandi; kabili uwatemwa umwana mwaume nelyo umwana mwanakashi ukucila ine, talingile ukuba umusambi wandi.”—Mateo 10:34, 37.

Lelo bamo balipokelele bwino abasambi bakwe. Yesu atile: “Onse uwapeela umo pali aba abanono kapu fye ya menshi ayatalala pantu musambi, ndemweba icine cine nati, takapanye icilambu cakwe.”—Mateo 10:42.

Apo Yesu alibebele ifya kubomba, kabili alibasokele pa mafya e lyo no kubakoselesha, abatumwa bali-ipekenye ukuya “balepita mu mishi, balebila imbila nsuma no kundapa abantu konse.”—Luka 9:6.