Ilyo Yesu aali mu Yudea, umuFarise alimwitile ku ca kulya kabili alisumiine. Nalimo cali ca kulya ca kasuba, te ca cungulo iyo. (Luka 11:37, 38; linganyeniko na Luka 14:12.) Ilyo bashilatendeka ukulya, abaFarise babalilepo ukusamba ku minwe ukufika na mu nkonkoni ukulingana no lutambi lwabo. Lelo Yesu te fyo acitile. (Mateo 15:1, 2) Umuntu nga asamba ku minwe ukufika na mu nkonkoni, ninshi tatobele Amafunde ya kwa Lesa, na lyo line Lesa taebele abantu ukulasamba ukufika mu nkonkoni.

UmuFarise alipapile pa kumona Yesu takonkele lulya lutambi. Apo Yesu alishibe ifyo umuFarise aletontonkanya, amwebele ati: “Imwe mwe baFarise, musamfya ku nse ya kapu ne mbale, lelo mu mitima yenu mufwaya ukupokolola abantu ifintu no kucita ifyabipa. Mwe bawelewele mwe! Bushe uwapangile ku nse tapangile na mu kati?”—Luka 11:39, 40.

Icabipileko bumbimunda bwabo, te kusamba ku minwe ilyo bashilalya. AbaFarise na bantu bambi abalekonka ulu lutambi balesamba iminwe ukufika na mu nkonkoni, lelo balefilwa ukusangulula imitima yabo ku bubifi. E ico Yesu abasokele ati: ‘Peeleni ifya bupe ifyaba mu mutima, kabili moneni! ifi fyonse fimbi fikasanguluka kuli imwe.’ (Luka 11:41) Aya mashiwi ya cine! Ubupe bufwile ukufuma pa nshi ya mutima, tatufwile ukupeelela fye ukuti abantu bamone ukuti tuli balungami pa kuti batutashe.

Yesu talelanda ukuti aba baume tabalepeela. Abebele ati: “Mupeela ica pe kumi ica minte na anise no musalu umbi onse, lelo mwasuula umulinganya no kutemwa Lesa. Ifi fintu mufwile ukuficita, lelo te kusuula filya fimbi.” (Luka 11:42) Amafunde ya kwa Lesa yatile baalingile ukupeela ica pe kumi pa mbuto shabo. (Amalango 14:22) Pa fyo baalingile ukupeela paali minte na anise ifyo balebika mu fya kulya pa kuti fiwame. AbaFarise balepeela ifi fintu nge ca pe kumi, lelo bushe balibikile amano ku kukonka Amafunde ayacindamishe pamo nga ukuba no mulinganya no kuba aba cishinka kuli Lesa?—Mika 6:8.

Yesu akonkenyepo ukubeba ati: “We bulanda kuli imwe mwe baFarise, pantu mwatemwa ifipuna fya ku ntanshi mu masunagoge no kuti abantu balemuposha pa maliketi! We bulanda kuli imwe, pantu mwaba nga shilya inshiishi ishishimoneka, ica kuti abantu balendanapo ukwabula ukwishiba!” (Luka 11:43, 44) Umuntu nga aipununa ku nshiishi shilya, aleba uwakowela. Yesu alandile pali ishi inshiishi pa kulanga ukuti ububifi bwa baFarise tabwalemoneka ku nse.—Mateo 23:27.

Umwaume umo uwaishibe sana Amafunde ya kwa Lesa amwaswike ati: “Mwe Kasambilisha pa kusosa ifi fintu mulesaalwila kumo na ifwe.” Nabo bene baalingile ukwishiba ukuti tabaleafwa abantu. E ico Yesu abebele ati: “We bulanda na kuli imwe mwe baishibisha Amafunde, pantu mutwika abantu ifisendo ifyayafya ukusenda, lelo imwe mwe bene tamukumyako ku fisendo nelyo munwe wenu umo! We bulanda kuli imwe, pantu mukuula inshiishi sha bakasesema, lelo ifikolwe fyenu e fyabepeye!”—Luka 11:45-47.

Ifisendo ifyo Yesu alelandapo ni ntambi sha baFarise ne fyo balelondolola Amafunde ya kwa Lesa. Amafunde ya baFarise yalyafishe ukukonka, na lyo line balepatikisha abantu ukuyakonka. Ifikolwe fyabo fyalipeye bakasesema ba kwa Lesa, ukutendekela fye pali Abele. Nangu ca kuti abaFarise balefwaya abantu balemona kwati balecindika bakasesema pantu balebakuulila inshiishi, imibele yabo yalibipile kwati fye ya fikolwe fyabo. Balefwaya no kwipaya Kasesema wapulamo uwa kwa Lesa. Yesu atile Lesa ali no kubakandilapo pa fyo balecita. Na cine alibakandile mu 70 C.E., ilyo papitile imyaka nalimo 38.

 Yesu asosele no kuti: “We bulanda kuli imwe mwe baishibisha Amafunde, pantu mwalipoka amakii aya kwishiba; mwe bene tamwaingilemo, na balefwaya ukwingilamo mwalibaleseshe!” (Luka 11:52) Aba abaume abalingile ukwafwa abantu ukumfwa Icebo ca kwa Lesa, e balelenga balefilwa ukumfwikisha amashiwi ya kwa Lesa.

Cinshi bakalemba na baFarise bacitile ilyo baumfwile ifyo Yesu alandile? Ilyo Yesu alefumapo, batendeke ukumusuusha no kumwipusha ifipusho bukali bukali. Ico baleipushisha, te kufwaya ukwishiba fimo, lelo balemwesha fye pa kuti alandepo fimo ifyo bengamupeelelapo umulandu no kumwikata.