Davidi alicimfishe Galyati pantu alicetekele Yehova. (1 Sam. 17:45) Yehova alafwaya ukulanga amaka akwata aya kwafwa ababomfi bakwe bonse. (2 Imila. 16:9) Finshi twingacita pa kuti tulelanga ukuti tulashintilila pali Yehova mu cifulo ca kuicetekela pa mulandu ne fyo twaishiba nelyo ifyo twacenjelamo? Lekeni tumone ifintu fitatu ifyo twingacita:

• Ukulapepa lyonse. Tamulingile ukulapepa fye ukuti Yehova amubelele uluse nga mwalufyanya, lelo mulelomba no kuti alemukosha ilyo mule-eshiwa. (Mat. 6:12, 13) Na kabili tamulingile fye ukupepa ukuti Yehova amupaale pa fyo mupingwilepo kale, lelo mulingile ukulomba amano no kuti amutungulule ilyo mushilasalapo ifya kucita.—Yako. 1:5

• Ukulabelenga Baibolo cila bushiku no kuisambilisha. Mulebelenga Baibolo cila bushiku. (Amalu. 1:2) Kabili muletontonkanya sana pa bantu balembwa mu Baibolo no kulabomfya ifyo mulesambililako. (Yako. 1:23-25) Cimbi ico mufwile ukucita, kupekanishisha libela ilyo mushilaya mu kubila imbila nsuma ukucila ukuicetekela pa mulandu wa kuti kale mwatendeka ukubila imbila nsuma. Na kabili mulepekanya ilyo mushilaya mu kulongana kwa pa cilonganino pa kuti mulenonkelamo.

• Ukubombela pamo ne cilonganino ca kwa Yehova. Mulingile ukulaishiba ifipya ifyo icilonganino ciletweba no kukanawayawaya ukufikonka. (Impe. 9:17) Muleumfwila baeluda nga bamufunda na lintu bamweba ifya kucita.—Heb. 13:17

TAMBENI VIDIO ITILA TATULINGILE UKUTIINA UKUTUCUSHA, LYENA ASUKENI AYA MEPUSHO:

• Finshi bamunyinefwe na bankashi baletiina?

• Finshi fyabafwile ukuleka ukuba no mwenso?