Abekashi ba mu Ncengo Aba Muno Nshiku

KU ULEMBA LOLENI! MU LESOTHO

ABEKASHI ba mu ncengo ilelo? Twalisangileko bamo mu Lesotho, incende yakwatisha impili iyabela ku kapinda ka ku kulyo aka Afrika. Aba bantu bekala mu mushi uwitwa Ha Kome, uwabela mupepi na bakilomita 60 ukufuma mu Maseru, umusumba wa bwangalishi uwa mu Lesotho, mwi samba lya lupili lwa lulumbi ulwa Maluti. Mu lusuba, amaluba ayakashikila yalabalula kuli ulu lupili. Aya maluba yayemba ayetwa ukuti bacilasa bakashika, yalenga iyi ncende ukupusanininako nga nshi ku ncende yashala umwaba ifimenwe fiteku.

 Indupwa ishingi kuli iyi ncende bacili bekala filya fine fyaleikala ifikolwe fyabo imyanda ya myaka iingi iyapitapo. Na kuba, bakuula amayanda yabo mu ncengo sha mu mpili. Ifyo babomfya pa kucilika ku bwingililo, fimuti e lyo ne fintu fimbi pamo nga amatete. Kabili kuli ici ica kucilika pa ntanshi balashingwilako iloba ilyasakaanamo amafi ya ng’ombe. Ici cilabapusushako ku kutalala apo ku Lesotho kulatalala nga nshi mu nshita ya mpepo. Mu kati mwaliba incende imo iyafukulwa pa nshi iitwa ukuti ifo, icipilibulo kuti “iconto,” iyi ncende na yo e po bakosesho mulilo uwa kubakafyako mu nshita ya mpepo.

Umutenge, icibumba ca ku numa, kabili ilingi line ne fibumba fya mu mbali fipangwa ne libwe line ilya mu lucengo. Kuli ili libwe na ko balashingwilako iloba ilyasakaanamo amafi ya ng’ombe cila mwaka. Ici cilenge cibumba ukumoneke cayemba kabili icatelela bwino. Impapa sha ng’ombe na sho shilabomfiwa ku kuyemfya mu kati kabili nga apa kusendama.

Umweni uwafuma ku fyalo fya basungu kuti asanga iyi mikalile iyapusanako kabili iya kupembesula. Ifya kufwala fyaseeka kuli iyi ncende malangeti ayabalabata nga nshi ne fisote fya cani. Ilingi line bakacema ababa ni bakalume fye balaya mu kuceme ng’ombe ukwabula insapato. Abaume ba muli uyu mushi babomba mu mabala ya nyanje kabili inshita shimbi balaipakisha fye no kulanshanya na baume bambi.

Inshita shimo, ifya kupangapanga fya muno nshiku pamo nge ndeke na bamotoka abatwala abantu mu kutandala kuli iyi ncende, filapapusha abantu ukutendekela ku bakalamba ukufika ku baice muli uyu mushi. Kabili abantu kuli iyi ncende bepikila pa nse mu mpoto ishafiita isha cela. Lelo pa mulandu wa kucepelwa inkuni, citindi wa ng’ombe uwauma, amatete, kabili no tusansu e fibomfiwa pamo nge nkuni. Kumfwa ku fipe fya cikaya ifisangwa mu ncengo ishi, kwaba amabende ya kutwilamo amataba kabili no mwinko wa kukumbilako umusunga wa mataba.

Lesotho yaishibikilwa bwino ku mulandu wa fikope fintu “bamwamwena kwi” balengele mu ncengo na pa mabwe mpanga yonse. “Bamwamwena kwi” baali e ba kubalilapo ukwikala mu ncengo sha mu Ha Kome. Ifikope fyabo filangilila incito ishapusanapusana shintu aba bantu balebomba, ukutendekela ku kwipaya isabi, pa kubomfya amato na masumbu ukufika ku masha ayo abalecinda balefwala imitwe ya nama ku menso. Ifi fikope na kabili filangisha ifinama pamo nga bakolwe, inkalamo, imfubu, ne nsefu. Na kuba ubwingi bwa ifi fikope ifyali mu Ha Kome fyalifuutika. Ifyashalako fye fishibilo ifilango kuti kwaliko ifikope fya musango yu kuli iyi ncende.

Ibumba lya Nte sha kwa Yehova lilabomba umulimo wa kushimikila mu ncende iyabela mupepi na ku Ha Kome. E ico libili libili, balatandalila abekashi ba mu ncengo abaishibikwa ukuba abantu abasekelela sana abatandashi babo. Ilingi line, ishi Nte shilapokelelwa bwino nga nshi ica kuti lyonse lintu batandala balabapekanishisha umusunga wabo uwitwa motoho. Abengi mu Ha Kome balafwaisha ukupokelele fitabo filanda pali Baibolo. Kabili balalango kutasha pa fitabo bapokelela pa kusangwilako umusaalu, amani, nelyo ifintu fimbi ngo bupe bwa kwafwilisho mulimo wa kusambilisha uwa Nte sha kwa Yehova.

Abekashi ba mu ncengo aba muno nshiku balicindikisha Baibolo kabili balepushe fipusho ifingi pa lwa bumi, imfwa, ukulundako fye ne fishilano basuminamo. Umulandu wa kupimpa kwa Nte muli ilya ncende, amasambililo ya Baibolo ayengi yalitendekwa. Muli ifyo, imbuto sha cine shalisanga umushili usuma mu mitima ya aba bantu bafuuka.—Mateo 13:8.

[Mapu pe bula 26]

(Nga mulefwaya ukumona mapu, moneni muli magazini)

HA KOME