Naliba ne Nsansa Te Mulandu no Kulemana Icabipisha

Abashimika ili lyashi ni ba José Godofredo Várguez

Lintu nafyelwe nali fye umutuntulu kabili nalekula fye bwino. Ilyo nali ne myaka 17 natendeke ukubomba incito iyakocelela inshimbi. Bushiku bumo pa numa ya myaka ibili, naleocelela fimo pa muulu ilyo imfula yatendeke ukuloka. Nomba apo nali mupepi ne ntambo sha malaiti ishakwatishe sana amaka, mukupumikisha fye amalaiti yalintintile ica kuti yalipooneshe icabipisha ukufuma pa muulu apalepele amamita 14. Ilyo naponene nalifwile icipuupu ica kuti naishilepuputuka pa numa ya myeshi itatu. Ico nalecita fye kusesha umutwe. Ala calimbipile sana pantu nalilemene amolu e lyo na maboko!

PA KUBALILAPO fye nalifuliilwe Lesa kabili nalemwipusha ico andekele kuti mbe no mweo. Naletontonkanya fye na pa kuipaya. Natendeke ukuya mu macalici ayalekanalekana pa kuti nsange icisansamushi, lelo takwali icalici nangu limo ilyansansamwishe nelyo ukwasuka amepusho nakwete pali Lesa. Na kuba muli aya macalici tabalekoselesha abantu ukulakonka ifyo Baibolo isambilisha e lyo ne fipope ifyabamo. Ilyo bamayo bafwile mu 1981, natendeke ukunwa sana, e lyo no kulateya icangalo ca kushitika indalama. Naletontonkanya ukuti pa mulandu wa fyo nalemene Lesa ali no kulangumfwilako uluse no kunjelela pa fyo nalekolwa. Na kabili naipoosele mu mibele yabipa pa kulaikala no mwanakashi uushali umukashi wandi.

Ifyo Nayalwike mu Kutontonkanya

Ilyo nali ne myaka 37 e lintu nakumene ne Nte sha kwa Yehova pa muku wa kubalilapo. Pa mulandu wa fyo bamayo baleumfwa ku bantu, kanshi bena lyonse baletila fye icilonganino ca ba Nte e cabipisha. Lelo te mulandu ne fyo, nalipokelele ba Nte mu ng’anda mu mwandi, pantu naletontonkanya ukuti nalishibe sana Baibolo kabili nalefwaya fye ukuti mbashinine ukuti baliluba. Lelo nalipapile ilyo naishilemona ukuti kanshi finono sana ifyo naishiba! Nomba icampapwishe sana ica kutila ba Nte balebomfya sana Baibolo pa kwasuka amepusho yandi yonse. Tapapoosele ne nshita nalishininwe ukuti ninsanga icine.

Ku ca bulanda, umwanakashi naleikala nao tatemenwe ifisambilisho ifipya ifyo nalesambilila, e co twalilekene. Panono panono naleya ndeleka ukucita ifyabipa, nalyalwile imibele yandi e lyo ne fyo naletontonkanya pa kutila ndekonka ifyo Baibolo isambilisha. Na kabili Lesa alingafwa icine cine pantu nshisakamikwa sana nangu ukubipilwa sana pa fyo bulya busanso bwansha, ica kutila pa myaka 20  iyapita nalisanga insansa ishingi nga nshi mu mulimo wa bupainiya uwa kushimikila abantu imbila nsuma. Pa mulandu wa fyo nalemana, abengi balafwaya ukwishiba ifyo ncita pa kukumanisha ukubomba uyu mulimo e lyo pa nshita imo ine ukuba ne nsansa. Kwena nshikala neka. Njikala no mwaice wandi umwaume Ubaldo, uwafyalwa no bulwele batila Down syndrome (ubulenga umuntu ukukanakwata sana amano). Ubaldo na o alisumina icine icaba mu Baibolo kabili na o alabombela Yehova.

Tulabombela bwino capamo e lyo kabili tulasungana no kusungana. Ilyo twaya mushimikila, Ubaldo alanjensha pa ncinga yandi iya balemana kabili alakonkonsha na pa fiibi, kabili ilyo ndelanda no muntu alankupukwilako Baibolo no kulangisha uyo muntu icitabo ndefwaya ukumupeela. Ubaldo alangafwa na mu fintu fimbi. Na ine ndashitisha ifya kusubasuba umo tusanga indalama isho tulekabila. Na kabili aba mu cilonganino cesu ica Nte sha kwa Yehova balatwafwa ukutwipikila e lyo ne milimo imbi iya pa ng’anda, kabili balatushindika kuli ba dokota. Pali ifi fyonse, Ubaldo na ine tulatasha nga nshi ifyo bamunyinefwe batucitila!

Nalikwata ishuko lya kuba eluda mu cilonganino kabili bamunyinane mu cilonganino balangafwako ukusanga ifyebo ifilanda pali Baibolo. Pa kushila ifyebo ifyacindama mu fitabo fyesu ilyo ndeisambilisha, ndabika pensulo mu kanwa e lyo nashila.

Abantu nga banjipusha nga ca kutila naliba uwa nsansa, lyonse njasuka fye no mutima wandi onse ukutila ee! Cinshi nshingabela ne nsansa? Nalishiba ico nabela pano calo kabili ndalolela ubulayo Lesa alaya ababomfi bakwe aba cishinka ubwa kwisaba no bumi bwapwililika mu Paradaise ikabako pano pene pa calo.—Esaya. 35:5, 6; Luka 23:43.

[Icikope pe bula 23]

Apa ninshi ba José bali ne myaka 18, papitile fye umwaka umo e lyo baishileba mu busanso

[Icikope pe bula 24]

Ine na munyinane Ubaldo tulashimikila bwino capamo mu calo ca Mexico

[Icikope pe bula 24]

Nte munandi alenkupukwilako Baibolo ilyo ndelanda ilyashi mu Ng’anda ya Bufumu

[Icikope pe bula 24]

Abo tulongana nabo balatwafwa ukwipika e lyo ne milimo imbi iya pa ng’anda