“Ukutemwa indalama e ntulo ya bubi bwa misango yonse.” —1 Timote 6:10.

IFYO ABANTU BAMO BALANDA Indalama e ntulo ya fintu fyonse ifyabipa.

IFYO BAIBOLO ILANDA Baibolo tailanda ukuti indalama e ntulo ya bubi lelo itila, “ukutemwa indalama e ntulo ya bubi bwa misango yonse.”

Imfumu Solomone iyalandwapo mu Baibolo yalikwete sana icuma, kabili yalandile pa fintu fitatu ifyabipa ificitikila abantemwa indalama. Amasakamika: “Ifingi ifyakwata uwa cuma tafimuleka ukulaala utulo.” (Lukala Milandu 5:12) Ukutwalilila fye ukulashifwaya: “Uwatemwa silfere tatila yafula, no watemwa ifyuma tatila fyafula.” (Lukala Milandu 5:10) Ukutunkwa: “Uwangufyanya ukunonka icuma takabe uwa kaele.”—Amapinda 28:20.

‘Indalama shilacingilila.’ —Lukala Milandu 7:12.

IFYO ABANTU BAMO BALANDA Umuntu nga akwata indalama e lyo engaba ne nsansa kabili kuti acingililwa.

IFYO BAIBOLO ILANDA Filya abantu balanda ukutila pa kuti umuntu acingilelwe e lyo no kuba ne nsansa kano akwata indalama fya bufi.

Ifi abantu balanda e filya Baibolo ita ukuti, “ukubeleleka kwa fyuma.” (Marko 4:19) Kwena, ca cine ukuti ‘indalama e shifwaikwa muli fyonse.’ (Lukala Milandu 10:19) Ku ca kumwenako, tulakabila indalama pa kuti tushite ifintu pamo nga ifya kulya no muti.—2 Abena Tesalonika 3:12.

Mulakabila indalama pa kuti musunge bwino ulupwa lwenu. Na kuba, Baibolo itila: “Umuntu nga tasakamana abantu bakwe, maka maka aba mu ng’anda yakwe, ninshi nakaana icitetekelo.”—1 Timote 5:8.

‘Mulebala mwaikala pa nshi no kupenda ishingapooswapo.’—Luka 14:28.

IFYO BAIBOLO ILANDA Mulebomfya indalama mu nshila Lesa asuminisha. (Luka 16:9)

Calicindama ukubomfya bwino indalama e lyo no kuba aba bucishinka mu fyo tushibomfya. (AbaHebere 13:18) Pa kutila mwilakwata inkongole, “mwilatemwa indalama.”—AbaHebere 13:5.

Nangu ca kuti Baibolo tayalesha ukukongola, ilatusoka ukuti: “Uukongola musha ku o akongolako.” (Amapinda 22:7) Mwilashita ifintu ifyo mushipangile ukushita pantu “onse uususwa ukucita ifintu alola ku kubulwa.” (Amapinda 21:5) Mu nshita ya kulashita fye ifintu icishiteshite, ‘mulepaatulapo shimo . . . . no kusunga ukulingana no mo mukwatila.’ Ukucita ifi kwakulamwafwa ukusunga indalama no kushibomfya fye ku fintu ifyacindama.—1 Abena Korinti 16:2.

Baibolo itila “mulepeela.” (Luka 6:38) Abafwaya ukusekesha Lesa balapeela pantu balishiba ukuti “Lesa atemwa uupeela ne nsansa.” (2  Abena Korinti 9:7) Kanshi, ‘mwilalaba ukucita icisuma no kupeelana ifintu, pantu amalambo ya musango yu e yasekesha Lesa.’—AbaHebere 13:16.