IFYO BAIBOLO ILANDA: “Nani engaba umweni mwi tenti [lya kwa Lesa]? . . . Untu enda uwa kaele kabili uucita icalungama kabili uusosa icine mu mutima wakwe.”—Amalumbo 15:1, 2.

IFISUMA IFIFUMAMO: Abantu abengi balitemwa abantu aba cishinka. Nomba bacita shani nga bakwata ishuko lya kusenda icintu ica mutengo ico bambi bashingeshiba no kwishiba ukuti nabasenda? Ifyo umuntu acita e filanga ifyaba mu mutima wakwe.

Ba Raquel , ababomba umulimo wa kushita ifipe pa kampani babomba batile: “Abo naleya mu kushitako ifipe bamo balefwaya ukulampela amafisakanwa. Bandaile ukuti nga ebo ndeshitako bakalambweseshako umutengo ukwabula ukulemba pali lisiti pa kuti indalama bambweseshako shikaleba shandi. Lelo nalikeene pantu nalibukishe ifyo Baibolo ilanda ukuti tulingile ukuba aba cishinka. Ilyo abakalamba ba ncito baumfwile, balincetekele sana.”

Nga ca kuti ba Raquel balisumine ifyo babebele, nga balipangile indalama ishingi. Nomba nga cali shani abakalamba ba ncito abeshiba ukuti e fyo balecita? Bushe nga tababatamfishe ncito? E lyo bushe nga balisangile incito na imbi pa numa ya kwishibikwa ngo mupuupu? Na kuba icacindama sana ico ba Raquel bashalefwaya ukonaula, ni kampingu wabo ne fyo abantu babacindike. Pa Amapinda 22:1 patila, “Cawama ukusala ishina ilisuma ukucila ifyuma ifingi; ipaalo lyawama ukucila silfere na golde.”

Ba Jessie nabo, bali abafumacumi kabili balibacetekele ku bakalamba ba ncito. Finshi abakalamba ba ncito ba bacitiile? Balisumbwile ba Jessie pa ncito kabili balibapeele insambu sha kuitantika ifyo engabomba imilimo yakwe. Ne ci calengele balekwata inshita iikalamba iya kuba pamo na bena mwabo na bana no kulabombako imilimo ya kwa Lesa.

Abakalamba ba ncito bamo nga balefwaya ababomfi, baya mu kufwaya ababomfi uko baishiba ukuti kulasangwa abantu abafumacumi. Umfweni ifyacitike ku Philippines, umukalamba wa kampani umo alembeele iofeshi lya Inte sha kwa Yehova ukuti, bebeko ba Nte abalefwaya incito ukulembela kuli aka kampani. Atile, ba Nte “balabombesha, bafumacumi, kabili balibika amano ku milimo.” Nomba umucinshi uya kuli Yehova Lesa wesu, uutusambilisha ‘ukupata ububi no kutemwa ubusuma.’—Amose 5:15.