1-3. (a) Bushe tulingile ukulamona shani icine ca mu Baibolo? Langilileni. (Moneni icikope pa muulu.) (b) Mepusho nshi twalayasuka muli cino cipande?

CALISEEKA ku bantu ukubwekeshamo icipe uko bacishitile. Mu fyalo fimo basanga ukuti lyonse kulaba abantu ababwekeshamo ifipe ku matuuka uko bafishitile. Pa fipe babwekeshamo, ifyo bashita pa Intaneti filafulapo ukucila ifyo bashita mu matuuka. Nalimo icilenga balebwekeshamo ni co basanga ukuti icipe tacili nge fyo baleenekela, tacilebomba bwino, nelyo tabacitemenwe. E ico balaya mu kusendelamo icipe cimbi nelyo baleba ababashitishe ukuti bababweseshe indalama.

² Nangu ca kutila kuti twaeba abatushitishe icipe ukuti batubweseshe indalama pa cipe twashitile, te kuti tufwaye ukubwesha nelyo ‘ukushitisha’ icine ca mu Baibolo ico ‘twashita’ kabili ico ‘twaishiba bwino bwino.’ (Belengeni Amapinda 23:23; 1 Tim. 2:4) Nga fintu twasambilile mu cipande cafumineko, pa kuti tunonke icine twalipoosele inshita iikalamba pa kucisambilila. Na kabili pa kuti tushite icine, nalimo twalilekele imilimo twalebomba nelyo twalishipikishe ilyo balupwa ne fibusa batutalwike. Nalimo twalilekele ukutontonkanya no kucita ifyabipa nelyo twalilekele ukukonka intambi no kucita ifibelesho ifyo Baibolo yalanda  ukuti tafyawama. Lelo ifyo twapaalwa fyalicila pa fintu twasha pa kuti tushite icine.

³ Ifyo tumfwa pa cine ca mu Baibolo fyalipalana sana ne fyo umwaume uo Yesu alandilepo mu cilangililo aumfwile. Pa kweba abantu ifyo icine pa Bufumu bwa kwa Lesa cacindama ku bacisanga, Yesu alandile icilangililo ca wa makwebo uwalefwaya bamargariti abasuma kabili uwasangile margariti umo. Na kuba margariti umo uo asangile ali uwauma umutengo ica kuti “aileshitisha bwangu” fyonse ifyo akwete pa kuti ashitemo uyo margariti. (Mat. 13:45, 46) Na ifwe bene tumona icine pa Bufumu bwa kwa Lesa e lyo ne cine cimbi ico tusambilila mu Cebo ca kwa Lesa ukuti calicindama nga nshi ica kuti bwangu bwangu tulaipusula fimo pa kuti tucinonke. Nga tulemona ukuti icine calicindama, ‘tatwakacishitishe.’ Ica bulanda ca kuti abantu ba kwa Lesa bamo balileka ukumona icine ico basambilile ukuti calicindama kabili balicishitisha. Twikesha ukucita ifi! Pa kuti tulelanga ukuti tumona icine ico twasambilila ukuti calicindama sana kabili tatwakacishitishe, tufwile ukulakonka ifyo Baibolo itweba ukuti ‘tuleenda mu cine.’ (Belengeni 3 Yohane 2-4.) Pa kuti tuleenda mu cine, tulingile ukulakonka ifyo cilanda muli fyonse ifyo tucita. Nomba natwasuke aya amepusho yatatu: Finshi fingalenga bamo ‘bashitisha’ icine kabili kuti ‘bacishitisha’ shani? Kuti twacita shani pa kuti tatushitishe icine? Finshi tufwile ukucita pa kuti tutwalilile ‘ukwenda mu cine’?

4. Cinshi calengele bamo bashitishe icine mu nshita ya kwa Yesu?

⁴ Mu nshita ya kwa Yesu, bamo abasambilile icine kuli ena tabatwalilile ukwenda mu cine. Ku ca kumwenako, pa numa Yesu aliisha ibumba mu cisungusho, ibumba lyalimukonkele ku lubali lumbi ulwa Bemba wa Galili. Yesu aebele abali muli ili bumba ifyabapapwishe. Atile: “Nga tamuliile umubili wa Mwana wa muntu no kunwa umulopa wakwe, ninshi muli imwe tamuli ubumi.” Mu cifulo ca kuti bamwipushe umo aloseshe, balipunwishiwe pa fyo alandile kabili batile: “Aya mashiwi yena yayafya; nani uwingayomfwa?” Ifi bacitile fyalengele ‘abasambi bakwe abengi babwelele ku fyo balecita kale, kabili balilekele ukwenda nankwe.’—Yoh. 6:53-66.

5, 6. (a) Mulandu nshi bamo balekela ukwenda mu cine muno nshiku? (b) Finshi fingalenga umuntu panono panono afuma mu cine?

⁵ Ku ca bulanda na muno nshiku mwine, bamo balileka ukwenda mu cine. Bamo balipunwishiwe ilyo kwali ukwaluka mu fyo twaishibe pa cine ca mu Baibolo, nelyo pa mulandu ne fyo munyinefwe umo uubomba imilimo iikalamba mu cilonganino alandile nelyo acitile. Bamo balikalipe pa mulandu wa kuti balibafundile nelyo pa mulandu wa kuti tabatemwa ifyo uwa bwananyina umo aba. Bambi nabo icalengele baleke ukwenda mu cine ni co baletungilila abasangu na bantu bambi abalandile ifya bufi pa fyo twasuminamo. Ifi bacitile fyalengele bamo batendeke “ukufuma” kuli Yehova na ku cilonganino. (Heb. 3:12-14) Ala nga caliweme abatwalilila ukuba ne citetekelo no kucetekela Yesu nga filya umutumwa Petro acitile! Ilyo Yesu aipwishe nga ca kuti abatumwa nabo balefwaya ukuya, ilyo line Petro ayaswike ati: “Mwe Shikulu, ni kuli nani twingaya? Ni mwe muli na mashiwi ya mweo wa muyayaya.”—Yoh. 6:67-69.

⁶ Bamo batendeke ukuleka ukwenda mu cine panono panono, nalimo tabaishibe no kuti nabatendeka ukufuma mu cine. Umuntu uufuma mu cine panono panono aba kwati bwato ubufuma panono panono ku lulamba  lwa mumana. Baibolo ilanda pali ifi ificitika ukuti ‘kusensenunwa.’ (Heb. 2:1) Umuntu uufuma mu cine ku mufulo fye alipusana no muntu uusensenunwa ukufuma mu cine. Na lyo line, pa kuti umuntu asensenunwe ninshi alilekelesha bucibusa bwakwe na Yehova kabili nga tacitilepo nangu cimo kuti bwapwa no kupwa. Finshi tufwile ukucita pa kuti twisensenunwa?

7. Finshi tufwile ukucita pa kuti twikashitisha icine?

⁷ Pa kuti tuleenda mu cine, tulingile ukwishiba no kulakonka fyonse ifyo Yehova alanda. Tufwile ukubika sana amano ku cine no kulakonka amashinte ya mafunde ya mu Baibolo muli fyonse ifyo tucita. Ilyo Imfumu Davidi yapepele kuli Yehova, yatile: “Nkenda mu cine cenu.” (Amalu. 86:11) Davidi alefwaisha ukulaenda mu cine. Na ifwe bene tulingile ukulafwaisha ukulaenda mu cine ca kwa Lesa. Nga tatulefwaisha ukulaenda mu cine, kuti twatendeka ukutontonkanya pa fyo twashile pa kuti tushite icine, kabili nalimo kuti twalafwaya ukutampa ukucitako ifyo twashile. Lelo tufwile ukutwalilila ukwenda mu cine conse ico twasambilila. Twalishiba ukuti te kuti tusale icine ico tulingile ukulakonka ne co tatulingile ukulakonka. Na kuba, tufwile ukulaenda mu “cine conse.” (Yoh. 16:13) Natulande pa fintu 5 ifyo nalimo twacitile pa kuti tushite icine. Ukucita ifi kwalalenga twilafwaya ukubwelela nangu fye panono ku fyo twasha pa kuti tushite icine.—Mat. 6:19.

8. Bushe ukukanabomfya bwino inshita kuti kwalenga shani Umwina Kristu asensenunwa ukufuma ku cine? Landeni pa cacitike.

⁸ Inshita. Tulingile ukulabomfya bwino inshita pa kuti tatusensenwinwe ukufuma ku cine. Nga tatucenjele, kuti twatendeka ukupoosa inshita iikalamba ku kulesha icitendwe, ku kucita ifyo twatemwa, ku kutamba TV nelyo ku kubomfya Intaneti. Nangu ca kuti ifi fintu tafyabipa, kuti twalapoosa sana inshita kuli ifi fintu ica kuti ne nshita ya kuisambilisha Baibolo ne ya kubomba imilimo ya kwa Lesa yabula. Natulande pa fyacitike kuli nkashi uo twalaita atuti Emma. Ukutula fye ku bwaice ba Emma balitemenwe bakabalwe. Nga bakwata inshita, baleyangala pali bakabalwe. Mu kupita kwa nshita batendeke ukumfwa ububi pa nshita iikalamba iyo balepoosa ku kwangala pali bakabalwe. Lyena balyalwike kabili basukile baleka ukupoosa inshita iikalamba ku kulesha icitendwe. Na kabili ilyashi lya ba Cory Wells abalekele ukwangala ifyangalo fya pali bakabalwe lyalibakoseleshe. * Pali nomba ba Emma bapoosa inshita iikalamba ku fya kwa Lesa na ku kuba pamo na ba bwananyina ne fibusa. Bomfwa ukuti balipalama sana kuli Yehova kabili tabasakamikwa pantu nomba balabomfya bwino inshita.

9. Bushe ukufwaisha ifyuma kuti kwalenga shani bamo baleka ukubika amano ku fya kwa Lesa?

⁹ Ifyuma. Pa kuti tutwalilile ukwenda mu cine, tatufwile ukubika sana amano ku kukwata ifyuma. Ilyo twasambilile icine twalilekele ukubika sana amano ku fyuma, lelo twatendeke ukubika sana amano ku fya kwa Lesa. Twaliitemenwe ukusha ifyuma pa kuti tuleenda mu cine. Lelo mu kupita kwa nshita, kuti nalimo twalamona abantu baleshita ifintu balepanga muno nshiku pamo nga amafoni, amatabuleti, amakompyuta ne fintu fimbi nelyo balekwata ifyuma fimbi. Ukucita ifi kuti kwalenga twatendeka ukumona ukuti natushalila.  Nga tatutekele imitima ku fyo twakwata, kuti twaleka ukubika amano ku fya kwa Lesa pa kuti tunonke ifyuma. Ifi fine e fyo Dema acitile. Apo alitemenwe “ifya muli cino calo,” alishile umutumwa Paulo. (2 Tim. 4:10) Mulandu nshi amushilile? Baibolo tayalanda. Nalimo icalengele ni co alitemenwe ifyuma ukucila ifyo atemenwe ifya kwa Lesa nelyo nalimo talefwaya ukutwalilila ukuipusulako fimo pa kuti alebomba na Paulo. Ukwabula no kutwishika te kuti tutemwe twatendeka ukufwaya ukunonka ifyuma na kabili pantu ifyuma kuti fyalenga twaleka ukutemwa icine.

10. Pa kuti tutwalilile ukwenda mu cine, finshi tushilingile ukucita?

¹⁰ Balupwa ne fibusa. Pa kuti tutwalilile ukwenda mu cine, tatufwile ukukonkelela abantu abaletupatikisha ukusha icine. Ilyo twatendeke ukwenda mu cine, twalilekele ukumfwana ne fibusa fyesu na balupwa abashili ba Nte nga fintu twaleumfwana nabo kale. Bamo tabaletukaanya lelo bambi baletukaanya sana. (1 Pet. 4:4) Nangu ca kuti tulafwaya ukutwalilila ukumfwana na balupwa no kuba ne cikuuku kuli bena, tufwile ukucenjela pa kuti tatulekele ukwenda mu cine pa kuti fye tubasekeshe. Tulatwalilila ukwesha ukulaumfwana bwino na balupwa. Na lyo line ukulingana na mashiwi yaba pali 1 Abena Korinti 15:33, abo tufwile ukulaumfwana sana nabo bantu abatemwa Yehova.

11. Finshi tufwile ukucita pa kuti twilacita ifyabipa?

¹¹ Ukutontonkanya no kucita ifyabipa. Bonse abenda mu cine bafwile ukuba aba mushilo. (Esa. 35:8; belengeni 1 Petro 1:14-16.) Ilyo twasambilile icine, bonse fye twalilekele ukucita fimo pa kuti tulecita ifyo Baibolo ilanda. Bamo balingile ukwaluka sana. Nampo nga twalingile ukwaluka sana nelyo iyo, tulingile ukuba abacenjela pa kuti tatubwelele ku mibele ya kale iishasanguluka. Finshi tufwile ukucita pa kuti tatubwelele ku fyabipa ifyo twalecita kale? Tulingile ukutontonkanya pa mutengo uukalamba uo Yehova alipile pa kuti tube aba mushilo. Alipile umulopa wa Mwana wakwe Yesu Kristu. (1 Pet. 1:18, 19) Pa kuti tutwalilile ukuba aba mushilo nga fintu Yehova afwaya, lyonse tufwile ukulatontonkanya pa fyo icilubula ca kwa Yesu cacindama.

12, 13. (a) Mulandu nshi tulingile ukulamwena amaholide nge fyo Yehova ayamona? (b) Finshi twalalandapo nomba?

¹² Intambi ne fibelesho ifyo Baibolo yalanda ukuti tafyawama. Balupwa lwesu, abo tubomba nabo, na abo tusambilila nabo nalimo kuti balafwaya tulesefya nabo amaholide. Finshi tulingile ukucita pa kuti twilakonkelela abatupatikisha ukulakonka intambi ishishawama no kulasefya amaholide ayashilenga Yehova acindikwa? Tufwile ukwishiba bwino ifyo Yehova amona ifi fintu. Tulingile no kubelenga amalyashi ayaba mu mpapulo shesu ayalanda pa fyo amaholide yaseeka yatendeke. Nga twaishiba ico Baibolo yalandila ukuti tatufwile ukulasefya amaholide ya musango uyu, tukeshiba bwino ukuti tuleenda mu nshila ‘iisekesha Shikulu.’ (Efes. 5:10) Nga twacetekela Yehova ne Cebo cakwe umwaba icine, ‘tatwakaletutuma abantu.’—Amapi. 29:25.

¹³ Tufwaya ukutwalilila ukwenda mu cine umuyayaya. Nomba finshi tufwile ukucita pa kuti tukatwalilile fye ukwenda mu cine? Natulande pa fintu fitatu ifyo tufwile ukucita.

14. (a) Bushe ukutwalilila ukunonka icine kukalenga shani twikacishitisha? (b) Mulandu nshi amano, ukusalapula, no mucetekanya fyacindamina?

¹⁴ Ica kubalilapo ico tufwile ukucita,  kutwalilila ukusambilila icine icaba mu Cebo ca kwa Lesa no kulatontonkanyapo sana. Pa kuti mukanonke icine mulekwatako inshita ya kuisambilisha Icebo ca kwa Lesa. Nga mulecita ifi, mukatemwa sana icine kabili tamwakafwaye ukucishitisha. Fimbi ifyo tufwile ukucita ukulunda pa kunonka icine, fintu Amapinda 23:23 yalanda. Yatila tulingile ukunonka ‘amano, amafunde [ukusalapula], no mucetekanya.’ Tatulingile ukupelela fye pa kwishiba icine. Tufwile ukulacita ne fyo icine cilanda muli fyonse. Nga twanonka umucetekanya, tukeluka ukuti fyonse ifyo Yehova alanda tafipilikana. Amano yalenga tulecita ifyo twaishiba ukuti e cine. Inshita shimo icine cilatusalapula, pa kuti twishibe umo tulingile ukwaluka. Lyonse tulingile ukulacita ifyo citweba. Icine caliwama ukucila silfere.—Amapi. 8:10.

15. Bushe icine icaba ngo mushipi citucingilila shani?

¹⁵ Ica bubili ico tulingile ukucita, kupampamina pa kulacita ifyo icine cilanda cila bushiku. Mulingile ukufwala icine icaba ngo mushipi mu musana. (Efes. 6:14) Mu nshita balelemba Baibolo, umushipi walefwala umushilika walecingilila umusana wakwe ne filundwa fimbi ifya mukati. Lelo pa kuti umushipi ucingilile umushilika, alingile ukuukakisha. Nga takakishe umushipi tawalemucingilila. Bushe icine icaba ngo mushipi citucingilila shani? Nga tulekonka sana ifyo icine cilanda, tatwakaletontonkanya ifyabipa kabili tukalasala bwino ifya kucita. Nga twafwaya ukucita ifyabipa nelyo nga twaeshiwa, icine cikalenga tukapampamine pa kucita icalungama. Nga filya fine umushilika ashaleya ku bulwi ukwabula ukufwala umushipi, na ifwe tulingile ukulakonka ifyo icine cilanda muli fyonse ifyo tucita. Na kabili umushilika alekobeka ulupanga ku mushipi. Natumone ifyo twingasambililako pa kuti tupampamine pa kwenda mu cine.

16. Bushe ukulasambilishako abantu icine kulenga shani twatwalilila ukwenda mu cine?

¹⁶ Ica butatu ico tufwile ukucita, kulabombako sana umulimo wa kusambilisha abantu icine ca mu Baibolo. Nga tulecita ifi tukekatisha ulupanga lwesu ulwa ku mupashi, e kutila “icebo ca kwa Lesa.” (Efes. 6:17) Bonse fye tulingile ukulawamyako ifyo tusambilisha pa kuti ‘tulelungika pa kusambilisha icebo ca cine.’ (2 Tim. 2:15) Nga tulebomfya Baibolo pa kwafwa abantu ukunonka icine no kukaana ubufi, ninshi tulebika ifyo Lesa alanda mu matontonkanyo na mu mitima yesu. Nga tulecita ifi tukapampamina fye pa kulaenda mu cine.

17. Mulandu nshi mumwena ukuti icine calicindama?

¹⁷ Icine bupe ubusuma nga nshi ubo Yehova atupeela. Ubu bupe bwalilenga twakwata icintu icacindamisha, e kutila bucibusa bwesu na Shifwe wa ku muulu. Yehova alitusambilisha ifintu ifingi, kabili akatusambilisha na fimbi! Alitulaya ukuti akatwalilila ukutusambilisha umuyayaya pa kuti tukalelunda pa cine ico twanonka. E ico mulemona icine nga margariti iisuma. Kanshi twalilileni ‘ukunonka icine kabili mwikacishitisha.’ Nga mwacita ifi ninshi mukafishapo ifyo mwalaile Yehova ukuti: “Nkenda mu cine cenu,” nga fintu Davidi acitile.—Amalu. 86:11.